Свет
Полски град му нуди на Маск да купи замок од 13 век за да му биде европско седиште

Градот Глоговек во Полска му нуди на милијардерот Илон Маск да го купи масивен замок од 13 век и да го претвори во негово европско седиште.
Градоначалникот на Глоговек, Пјотр Бујак, денеска изјави дека упатил покана до „Икс“ и испратил писма до неговите компании во кои му нудат на Маск да го купи замокот. Цената не беше објавена, а Маск досега не одговорил на понудата.
Бујак за „Асошиејтед прес“ изјави дека видел медиумски извештаи во Европа дека американскиот милијардер бара добра локација, можеби замок во Италија, како центар за неговите операции на континентот.
„Ние не сме полошо место од Тоскана. Имаме совршена клима и ова е најдоброто место на Земјата“, рече Бујак.
Замокот Глоуни во југозападна Полска има богата историја која датира уште од средниот век. Во него престојувал и композиторот Лудвиг ван Бетовен. Глоговек се смета за идеална локација, релативно блиску до Берлин, Прага, Виена, Братислава и Варшава.
Замокот бара темелно реновирање, но нуди огромен простор за живеење и водење бизнис.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Потресно сведоштво од Мандалај: „Извлеков четворица, тројца мртви, еден ми почина на раце“

Триесет и деветгодишен маж од регионот Мандалај ги опиша драматичните моменти додека се обидувал да спаси лице заробено под урнатините на урната џамија во селото Суле Коне.
Според Ројтерс, тој бил принуден да побегне поради силните последователни потреси.
„Морав да го оставам… Се вратив по втор пат за да се обидам да го извлечам“, рече тој, барајќи анонимност.
„Со свои раце извлеков четворица. За жал, тројца веќе беа мртви, а едно ми почина на рацете“.
Според него, во тоа село загинале најмалку 10 луѓе.
Муслиманите се религиозно малцинство во претежно будистичкиот Мјанмар и со децении властите систематски ги маргинализираа. Во последниве години, ситуацијата дополнително ја влошија ултранационалистичките групи и екстремистичките монаси, кои поттикнуваат омраза и насилство, пренесува Ројтерс. Според извештајот на американскиот Стејт департмент од 2017 година, властите во Мјанмар со децении го отежнувале издавањето дозволи за реновирање или изградба на џамии, а бројни историски места за богослужба се распаѓаат бидејќи не им е дозволено ниту основно одржување.
Во земјотресот сериозно беа оштетени и будистичките згради. Воената хунта наведува дека биле оштетени 670 манастири и 290 пагоди, но во нивниот извештај не се споменува ниту една џамија.
Свет
Жена од Мјанмар спасена од урнатините по 30 часа

Бројот на загинати од силниот земјотрес што вчера го погоди Мјанмар се искачи на повеќе од 1.600, додека спасувачите очајнички ги пребаруваат урнатините во потрага по преживеани лица. Повредени се повеќе од 3.400 луѓе.
Водачот на војската на Мјанмар прогласи вонредна состојба и побара секој кој може да помогне да излезе. ОН веќе се во контакт со властите. Според податоците, епицентарот бил на околу 17,2 километри од градот Мандалеј, кој има околу 1,2 милиони жители. Околу 12 минути по првиот земјотрес, афтершок со јачина од 6,4 ја погоди областа.
Спасувачите извлекоа жива жена од урнатините на урната станбена зграда во Мандалеј денеска, 30 часа по разорниот земјотрес што го погоди Мјанмар, јавија новинарите на агенцијата Франс прес (Франс прес).
Триесетгодишната Фиу Леј Каинг беше извлечена од урнатините, а потоа на носилки ја однесоа кај нејзиниот сопруг Је Аунг, кој ја прегрна пред да биде пренесена во болница, пренесува АФП.
„Искрено, на почетокот не верував дека таа сè уште е жива“, рече Је Аунг додека чекаше неговата сопруга да излезе од под срушените делови на зградата.
„Пресреќен сум што ја слушнав добрата вест“, додаде трговецот, кој со Фју има два сина – осумгодишниот Вилијам и петгодишниот Итан.
Претходно, претставник на Црвениот крст изјави за АФП дека повеќе од 90 луѓе сè уште може да бидат закопани под остатоците од урнатата зграда.
Свет
Се урна контролната кула на аеродромот во Мјанмар

Кулата за контрола на летање на меѓународниот аеродром Најпитав во Мјанмар се урна за време на вчерашниот земјотрес, покажуваат сателитски снимки кои ги анализира Асошиетед прес.
Невладината организација Каритас Австралија, која работи со партнери во Мјанмар, исто така извести дека кулата е целосно урната и дека загинале сите вработени кои тогаш биле на должност.