Свет
Поранешен агент на ФБИ тврди: Коронавирусот излегол од лабораторијата во Вухан
Џејсон Банан, доктор по микробиологија и поранешен висок научник во ФБИ, изјави за дека ФБИ утврдил оти вирусот Ковид-19, причината за глобалната пандемија која уби најмалку седум милиони луѓе, најверојатно потекнува од протекување од лабораторија во Вухан, Кина.
Банан рече дека на ФБИ не му било дозволено да го пријави ова на претседателот Џо Бајден.
„Вирусот избега од лабораторијата“, вели Банан.
Во мај 2021 година, Бајден нареди итна истрага од страна на американските разузнавачки агенции и националните лаборатории за да се утврди дали вирусот бил пренесен од животни на луѓе или излегол од кинеска лабораторија. Една од најпопуларните теории во тоа време беше дека вирусот се пренесувал од лилјаци на пазар во Вухан, каде што вирусот првпат се појавил во 2019 година.
Националниот разузнавачки совет, телото на високи разузнавачи што го организираше прегледот, заклучи дека Ковид-19 се пренесува од животни на луѓе, а истото го заклучија уште четири разузнавачки агенции. Но, не и ФБИ.
„ФБИ не само што заклучи дека е веројатно притекување на вирусот од лабораторијата, туку има и умерена доверба во нејзината проценка, повеќе од која било друга агенција, и тие очекуваа дека ќе можат да го претстават случајот пред Белата куќа, но ниту еден од претставниците на агенцијата не бил повикан да го стори тоа“, пренесува „Волстрит журнал“.
„Како единствена агенција што ја оцени лабораториската теорија како поверојатна и агенција која изрази највисоко ниво на доверба во нејзината анализа за изворот на пандемијата, очекувавме од ФБИ да биде побарано да присуствува на брифингот за разузнавање во Белата куќа“, рече Банан, додавајќи дека тие не биле поканети за да го информираат американскиот претседател за тоа.
„Бајден не ни се јави и тоа беше изненадување“, рече Банан.
Заклучокот од 2021 година беше дека би било тешко да се потврди потеклото без соработката на Кина. Единствената соработка на Кина досега е заедничкиот извештај со Светската здравствена организација (СЗО) во 2021 година, во кој се вели дека вирусот најверојатно бил пренесен од лилјаци на луѓе преку друго животно.
Сепак, неколку американски функционери, исто така, се сомневаат дека „Ковид“ протекол од Институтот за вирологија во Вухан, каде што работеле научници кои генетски модифицирале коронавируси, според декласифицираните документи на американската влада.
Тројца научници од Националниот центар за медицинско разузнавање, дел од Одбранбената разузнавачка агенција на Пентагон (ДИА), спроведоа научна студија која заклучи дека Ковид-19 бил манипулиран во лабораторија во ризично истражувачко опкружување.
Џон Хардам, Роберт Катлип и Жан-Пол Кретјен спроведоа геномска анализа која заклучи дека сегментот кој му дозволува на вирусот да навлезе во човечките клетки е конструиран со помош на техники развиени во лабораторија во Вухан, опишани во кинески научен труд од 2008 година.
Сепак, врвната ДИА ја отфрли таа студија и, како и сите други агенции освен ФБИ, се согласи дека вирусот преминал од животни на луѓе, иако тоа не може да се смета за конечен заклучок.
Портпаролката на канцеларијата на ДНИ рече дека различните гледишта се добро застапени во разузнавачката заедница и дека не е стандардна практика да се покануваат претставници од поединечни агенции на брифинзи за претседателот. Работата на канцелариите на ДНИ и НИЦ за потеклото на Ковид-19 беше конзистентна со сите аналитички стандарди на разузнавачката заедница, вклучително и објективноста, рече портпаролката.
Банан му се придружи на ФБИ како дел од напорите на агенцијата да ја зајакне својата експертиза во бактериско оружје, токсини и биолошка војна по нападите на 11 септември 2001 година, и оттогаш се пензионираше. Банан повикува на преиспитување на доказите што ја поддржуваат теоријата за истекување на лабораторија.
„Она што заврши како заклучок на разузнавачката заедница мора да се преиспита“, рече тој.
Повеќе од три години дебатата за потеклото на Ковид останува силна и продолжува меѓу американските агенции и оддели и во Конгресот, каде што се повикуваат сведоци да изнесат докази.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лавров: Европа се подготвува за војна
Рускиот министер за надворешни работи Сергеј Лавров ја оцени состојбата на безбедносната архитектура во Евроазија на Меѓународната конференција за евроазиска безбедност во Минск, зборувајќи за „агресивните планови на Западот“, проширувањето на НАТО, перспективата за решение на конфликтот во Украина и односите со Вашингтон.
Лавров предупреди дека Русија нема да дозволи Евроазија да стане „феуд на НАТО“, обвинувајќи ги западните земји дека „се подготвуваат за нова голема војна“, објави РИА Новости.
Тој оцени дека Алијансата „ги проширува своите активности кон Арктикот и Тихиот Океан“ со цел да ја ограничи Кина и да ја изолира Русија.
„Многу пати сме рекле дека никогаш немавме, ниту имаме намера да нападнеме која било моментална членка на НАТО или ЕУ. Подготвени сме да ја вклучиме оваа позиција во идните безбедносни гаранции за овој дел од Евроазија, но лидерите на ЕУ избегнуваат да ги разгледуваат овие идни гаранции на вистински колективна основа“, рече Лавров, наведувајќи ги договорите меѓу Франција и Велика Британија за координација на нуклеарните сили и договорот меѓу Лондон и Берлин за воена соработка како доказ за милитаризацијата на Европа.
Зборувајќи за новата безбедносна архитектура на Евроазија, Лавров повика на создавање „панконтинентална структура отворена за сите земји од регионот“, заснована на принципите на суверена еднаквост и неделивост на безбедноста.
„За разлика од Западот, Русија и нашите партнери – Кина, Индија, Иран, земјите од ЗНД – се убедени дека стабилноста и просперитетот бараат еднакви права за сите земји, а не доминација на привилегираните“, рече Лавров.
Осврнувајќи се на конфликтот во Украина, рускиот министер ги обвини европските членки на НАТО за продолжување на војната со „пумпање оружје и пари за режимот во Киев“.
„Европските лидери прават сè за да го убедат Вашингтон да се откаже од решавањето на конфликтот на преговарачка маса“, рече Лавров.
Тој додаде дека Москва ги полага своите надежи на договорите постигнати меѓу претседателите на Русија и САД, Владимир Путин и Доналд Трамп на самитот во Алјаска, велејќи дека Русија очекува САД да останат посветени на тие принципи.
Зборувајќи за билатералните односи со Вашингтон, Лавров рече дека Русија предложила враќање на директниот воздушен сообраќај, но дека „американската страна не му дава приоритет“.
Тој исто така истакна дека Москва очекува одговор од САД на нејзиниот предлог за нов договор за намалување на стратешкото оружје, како и на тестирањето на руските крстосувачки ракети „Буревестник“.
„Не слушнав никаков одговор преку дипломатски канали. Сите молчеа“, заклучи Лавров, пренесува Танјуг.
Фотот: принтскрин
Свет
Пожар на крузер на Нил, евакуирани 60 италијански туристи
Денес избувна пожар на туристичкиот крузер „Емпрес“ што плови по Нил во близина на Луксор во Египет. На бродот имало околу 60 италијански државјани, но никој не е повреден и сите патници се безбедни, потврди италијанското Министерство за надворешни работи Фарнезина, објавува „Ил Месаџеро“.
Фарнезина соопшти дека внимателно ја следат ситуацијата заедно со амбасадата во Каиро и дека министерот Антонио Тајани е информиран за сè. За какви било итни случаи, италијанските граѓани ги имаат на располагање броевите на амбасадата во Каиро и на Кризната единица.
Сите патници се згрижени
Евакуираните туристи веднаш беа згрижени од туристичките оператори Corsini Viaggi и Travco Tours.
Пожар предизвикан од краток спој
Според првичната истрага, пожарот избувнал во кујната на бродот додека бил закотвен во пристаништето на селото Асфун. Причината бил електричен краток спој во еден од кујнските апарати. Пожарникарите брзо го изгаснале пламенот пред да се прошири на остатокот од крузерот, а во инцидентот нема повредени туристи или членови на екипажот.
Истрагата е во тек
Сите патници се префрлени на други бродови од безбедносни причини, додека властите започнаа со инспекција на бродот за да ја утврдат точната причина за пожарот. За инцидентот е известено и државното обвинителство, кое ќе спроведе официјална истрага.
Фото: принтскрин
Свет
Белорусија ќе распореди руски ракетни системи „Орешник“ на своја територија
Белорусија ќе распореди руски ракетни системи „Орешник“ на своја територија во декември, објави денес кабинетот на белорускиот претседател Александар Лукашенко.
Се вели дека подготовките за распоредување на ракетите се при крај, објавува Ројтерс.
Лукашенко изјави дека распоредувањето на хиперсоничните балистички ракети „Орешник“ е одговор на ескалацијата од Западот.
Ракетите „Орешник“ беа вклучени во заеднички маневри меѓу Русија и Белорусија минатиот месец.
Фото: принтскрин

