Поранешен американски дипломат изрази сериозни сомнежи во врска со најновите напори на Белата куќа да посредува за завршување на војната на Русија во Украина тврдејќи дека Москва го експлоатира процесот во своја корист и дека пристапот на претседателот Доналд Трамп е осуден на неуспех. Во интервју за „Киев пост“, амбасадорот на САД, Стивен Пајфер, кој беше на оваа должност во Украина од 1998 до 2000 година, сугерира дека напорите за посредување на Вашингтон се осудени на неуспех без зголемен притисок и сериозни последици за Путин, пишува „Киев пост“.

Пајфер верува дека посетата на претседателот Володимир Зеленски на Белата куќа минатата недела била компромитирана од претходниот ангажман на американскиот претседател со неговиот руски колега. „Јасно е дека претседателот Трамп повторно беше изигран од Путин во телефонскиот разговор во четврток“, рече Пајфер.

Сржта на фрустрацијата, според Пајфер, произлегува од очигледниот притисок на Трамп врз Украина да отстапи територија. „Мора да биде многу фрустрирачки за претседателот Зеленски и за Украинците што Белата куќа изгледа не разбира зошто не се подготвени да се откажат од целиот Донецк“, рече тој.

Тој ја засили оваа поента истакнувајќи подлабоко недоразбирање од американската страна.

„Исто така, ми беше фрустрирачки што очигледно г. Стив Виткоф повторно рече – па ‘бидејќи сите во Донецк зборуваат руски, тие сакаат да бидат Руси’, што мислам дека дефинитивно не е случај“, рече тој. Пајфер нагласи дека држењето на линијата во Донбас е стратешки императив.

„Откажувањето од таа територија би значело предавање на одбранбените линии што ја запреа руската армија веќе три и пол години“, рече тој додавајќи: „Само сум збунет зошто не разбираат зошто во овој момент тоа е нешто што Украина не може да го направи“.

Оваа процена е во согласност со претходните коментари на Трамп дека Украина едноставно треба „да застане на линиите каде што се – бојните линии… да си оди дома, да престане да убива луѓе и да заврши“ ефикасно замрзнувајќи го конфликтот.

Пајфер гледа мала перспектива за значителна поддршка од Белата куќа, особено во вршење притисок врз Русија. Тој тврди дека Трамп „не е подготвен да инвестира во постигнување договор“. „Доколку беше сериозен во врска со тоа“, тврди Пајфер, „Трамп ќе бараше начини да изврши дополнителен притисок врз Русија“.

Поранешниот дипломат го гледа изборот на Будимпешта за претстојниот самит Трамп – Путин како победа за Москва. „Мислам дека Русите секако се среќни што одат во Будимпешта. Тоа е едно од ретките места во Европа на кои, всушност, би можеле да се сретнат“, објасни Пајфер. Тој предупреди дека состанокот може да биде само „повторување на она што се случи на Алјаска, каде што претседателот Трамп се чинеше дека е убеден од Путин да се согласи на ова таканаречено разбирање, кое содржеше низа стапици за Украина“.

Пајфер е многу скептичен дека самитот ќе постигне пробив: „Не сум сигурен, со оглед на тоа што, барем јавно, руската позиција останува непроменета зошто некој би помислил дека Будимпешта ќе донесе поинаков исход од Алјаска?. Претседателот Зеленски веќе јавно го отфрли изборот на место велејќи: „Не верувам дека премиер што ја блокира Украина насекаде може да направи нешто позитивно за Украинците или дури да даде балансиран придонес осврнувајќи се на унгарскиот лидер Виктор Орбан“.