Свет
Претседателот на Сирија: Водиме индиректни преговори со Израел, сакаме да ја смириме ситуацијата

Сирискиот претседател, Ахмед ал Шара, изјави дека неговата влада води индиректни преговори со Израел за да ги запре израелските напади врз Сирија, пишува „Си-Ен-Ен“.
„Има индиректни преговори, преку посредници, со цел да се смири и да се ограничи ситуацијата, за работите да не стигнат до точка кога двете страни ќе ја изгубат контролата“, рече Ал Шара на прес-конференција во Париз, каде што се сретна со францускиот претседател Емануел Макрон.
„Се обидуваме да разговараме со сите земји кои се во контакт со израелската страна за да извршиме притисок врз нив да престанат да се мешаат во сириските работи“, додаде тој.
Ал Шара рече дека целта е Израел да го почитува Договорот за одвојување од 1974 година, постигнат од Обединетите нации со Сирија и да се повлече на границата дефинирана со тој договор за да дозволи враќање на мировниците на ОН. Таа граница ја дели Сирија од Израел и окупираната Голанска Висорамнина, која Израел ја зазеде од Сирија во војната во 1967 година.
По падот на режимот на поранешниот претседател Башар ал Асад во декември, Израел зазеде повеќе територии во Сирија и изврши неколку напади за да спречи обнова на воениот капацитет и да ги искорени милитантните групи за кои вели дека може да ја загрозат нејзината безбедност.
Влегувањето на Израел на сириска територија првично беше опишано како привремено, но официјални лица подоцна објавија дека армијата ќе остане во Сирија на неодредено време.
Израел прогласи безбедна зона на југот на Сирија за заштита на Друзите, а вчера израелската полиција објави дека нивната гранична полиција за прв пат дејствува внатре во Сирија.
„Израелските интервенции го прекршија договорот од 1974 година. Откако пристигнавме во Дамаск, јасно им ставивме до знаење на сите релевантни страни дека Сирија е посветена на почитување на тој договор“, рече Ал Шара.
Ројтерс вчера објави дека Обединетите Арапски Емирати воспоставиле таен канал за преговори меѓу Израел и Сирија, повикувајќи се на неименувани извори. Се вели дека разговорите се фокусирани на безбедносни и разузнавачки прашања и градење доверба. Ал Шара ги посети ОАЕ минатиот месец.
Како што јави Си-Ен-Ен, Лана Нусеибех, помошник-министер за надворешни работи на ОАЕ за политички прашања, негираше дека нејзината земја посредува во преговорите меѓу Израел и Сирија. „Тврдењето дека ОАЕ „посредува во тајните преговори“ меѓу Сирија и Израел е целосно лажно. ОАЕ не се дел од таквите разговори“, рече таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
„Дер Шпигел“: Зеленски ја прекина посетата на Германија поради можна руска инвазија на Суми

Украинскиот претседател Володимир Зеленски не присуствуваше на доделувањето на наградата Карло Велики во германскиот град Ахен. Според весникот „Дер Шпигел“, причината за промената на планот е заканата од руска инвазија на Суми, па претсеедателот отпатувал директно од Берлин до Киев.
Пред две години тој лично ја доби наградата Карло Велики во Ахен. Зеленски овојпат планираше да учествува на церемонијата на доделувањето, која и беше врачена на претседателката на Европската комисија, Урсула фон дер Лајен. Меѓутоа, според германските медиуми, неговите планови за патување наеднаш се промениле.
Поради сериозната ситуација во Украина, Зеленски не летал од Берлин за Дизелдорф и оттаму за Ахен, туку, според безбедносни извори, се вратил директно во Киев.
Според украински извори, Русија собрала околу 50.000 војници за можна офанзива на регионот во североисточниот дел на Украина.
Украинскиот претседател разговараше со канцеларот Фридрих Мерц и доби нови ветувања за воена помош. Зеленски се сретна и со претседателот на Сојузна Република Германија Франк-Валтер Штајнмаер и со претседателката на Бундестагот Јулија Клекнер. Околу 20:00 часот, по повеќе од единаесет часа поминати во Берлин, владиниот авион со делегацијата на Зеленски повторно полета кон исток.
Свет
НАТО цели кон зголемување на бригдите за околу 50 отсто, тврди воен претствник

НАТО ќе побара од Германија да обезбеди уште седум бригади, односно околу 40.000 војници, за одбрана на Алијансата, во рамките на новите цели за вооружување и бројот на војници за кои министрите за одбрана на земјите-членки ќе се договорат следната недела, пренесува Ројтерс повикувајќи се на извори.
Неименуван висок воен претставник рече дека целта на земјите-членки на НАТО во иднина ќе биде да обезбедат меѓу 120 и 130 бригади.
Тоа би значело зголемување за околу 50 отсто во однос на сегашната цел од околу 80 бригади, вели изворот.
Портпаролот на Министерството за одбрана во Берлин рече дека не може да потврди какви одлуки ќе донесат министрите за одбрана на НАТО следната недела, како и лидерите на НАТО на самитот во Холандија на крајот на јуни.
„Покрај тоа, целите на планирањето и капацитетот на силите на НАТО се доверливи од безбедносни причини“, додаде портпаролот.
НАТО не одговори веднаш на барањата за коментар. Во 2021 година, Германија се согласи да обезбеди десет бригади единици, кои обично броjат околу 5.000 војници, за НАТО до 2030 година, а моментално има осум бригади и гради деветта во Литванија, која ќе биде готова од 2027 година.
Се проценува дека обезбедувањето дополнителни 40.000 активни војници ќе биде голем предизвик за Берлин, бидејќи германските вооружени сили, Бундесверот, сè уште не ја исполниле целта од 203.000 војници поставена во 2018 година, а според податоците на германското Министерство за одбрана, моментално имаат недостиг од околу 20.000 редовни војници.
Свет
Аргентинскиот претседател досега укина 48.000 работни места во јавниот сектор

Аргентинскиот претседател Хавиер Милеи тврди дека речиси 48.000 вработени во јавниот сектор во Аргентина се отпуштени откако неговата администрација ја презеде функцијата пред 17 месеци, пишува Буенос Аирес Тајмс.
Севкупно, бројот на вработени беше намален за 9,6 отсто како дел од таканаречената политика за штедење на Милеи со „моторна пила“, еден од неговите главни пристапи за управување.
Ова резултираше со годишни заштеди од околу 1,89 милијарди американски долари (1,67 милијарди евра), според извештајот на Министерството за дерегулација и државна трансформација објавен оваа недела. Околу 942 милиони долари (834 милиони евра) се однесуваат на неисплатени плати, а слична сума се припишува на „инфраструктурните трошоци на работното место“.
Не е јасно дали таа сума ги вклучува трошоците за отпремнина на отпуштените работници.
Најголеми намалувања се забележани во Националната јавна администрација и државните претпријатија
Според извештајот доставен од единицата за оцена на влијанието на Министерството, меѓу декември 2023 година, првиот месец на функцијата на Милеи, и април 2025 година, 47.925 работни места биле отстранети од државниот платен список.
Анализирајќи ги податоците, најголеми намалувања се забележани во Националната јавна администрација (АПН) и државните претпријатија, со пад од 13,7 отсто, односно 16,4 отсто.
Бројот на постојани и привремено вработени опадна за осум проценти, додека бројот на лица вработени според Рамковниот закон се намали за 20 проценти, а бројот на хонорарци се намали за 55,2 проценти.
Министерството за дерегулација и трансформација на државата изјави дека овие податоци „ја одразуваат заложбата на Владата за намалување на јавната потрошувачка и решеноста да ги исполни ветувањата за ефикасност и заштеди во јавната администрација.
Министерството, на чело со Федерико Стурценегер, рече дека пристапот на Милеи со „моторна пила“ ќе биде засилен оваа година со дополнително намалување на несуштинските одделенија.
На натамошните отпуштања веројатно ќе се спротивстават вработените во јавниот сектор, од кои многумина излегоа на улиците оваа година во знак на протест против мерките за штедење. Синдикалните организации организираа серија генерални штрајкови откако Миллеи дојде на власт во декември 2023 година.
Минатата година земјата го забележа првиот буџетски суфицит по една деценија, а неконтролираната инфлација значително падна, но куповната моќ, вработеноста и потрошувачката паднаа.