Свет
Продолжуваат протестите во Франција поради пензиските реформи, блокирана е железницата

Во Франција денеска се обновени протестите и штрајковите против пензиските реформи, со зголемено полициско обезбедување поради ризикот од насилство.
Министерот за внатрешни работи Џералд Дарманен изјави дека 13.000 полицајци се распоредени на улиците, од кои речиси половина во главниот град.
Протестите почнаа мирно, јави АП.
Во Париз железничарите со запалени факли и знамиња ја блокираа пругата на една од главните станици на главниот град Гаре де Лион.
Новиот бран штрајкови и протести е десетти од почетокот на годинава, а денешниот протест се одржува два месеца по почетокот на социјалната мобилизација против спорниот закон.
Синдикатите ги повикаа работниците да ги напуштат работните места и да излезат на улица.
Демонстрации и насилство ја потресоа Франција и пред 16 март кога со вонредно уставно овластување без гласање во Националното собрание беа усвоени контроверзните реформи за одложување на старосната граница за пензионирање од 62 на 64 години.
Протестот против пензиската реформа продолжи во неколку градови во саботата, а се собраа само неколку стотици луѓе, но во четвртокот излегоа од еден до 3,5 милиони луѓе во зависност од изворот.
Тогаш демонстрациите беа придружени со напади врз полицијата, палење на влезот на градското собрание во Бордо, судири и пожари во Париз.
Премиерката на Франција, Елизабет Борн, изјави дека не се откажува од реформата на пензискиот систем.
Реформата е усвоена и „ќе оди по својот тек“ до Уставниот совет, кој ќе се изјасни, а на крајот од процедурата претседателот на Републиката „мора да го прогласи законот“ како што е предвидено во Уставот, рече таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп: Случајот против Марин Ле Пен е лов на вештерки

Американскиот претседател Доналд Трамп денеска и понуди поддршка на лидерката на француската екстремна десница, Марин Ле Пен, откако судот во Париз ја осуди неа и дваесетина луѓе од нејзината партија за проневера на средства од Европската унија.
Судијата ѝ забрани на Ле Пен пет години да се кандидира на избори, што ќе ја спречи да учествува во претседателската трка во 2027 година, освен ако пред тоа не може да поднесе жалба на пресудата. Судијата сега е под полициска заштита откако добил смртни закани, изјави завчера извор за Ројтерс.
Ле Пен, партиските сојузници и поддржувачи го обвинија судот за мешање во демократијата. Францускиот премиер Франсоа Бајру пред три дена пред пратениците изјави дека „безусловно го поддржува“ судството.
Во објава на Truth Social доцна синоќа, Трамп го нарече случајот против Ле Пен „лов на вештерки“ и го пофали лидерот на екстремната десница. „Таа претрпе загуби, но продолжи, а сега, непосредно пред нешто што би било голема победа, ја фатија со помал прекршок за кој веројатно не знаела. Мене ми звучи како книговодствена грешка“, напиша Трамп во објавата.
Активистите за човекови права правеа споредби меѓу Ле Пен и Трамп во текот на годините за нивните антиимигрантски ставови и антималцинската реторика.
Пресудата на францускиот суд претставува пречка за 56-годишната Ле Пен, која до пресудата беше фаворит во анкетите пред претседателските избори во 2027 година.
Свет
Трамп го отпушти шефот на агенцијата за безбедност

Шефот на американската Агенција за национална безбедност (НСА) Тимоти Хог е сменет, објави Вашингтон пост, повикувајќи се на двајца сегашни и еден поранешен американски функционер.
Тимоти Хог, кој исто така ја предводеше американската сајбер команда (USCYBERCOM), беше сменет заедно со неговата заменичка Венди Нобл, објави весникот.
Според „Вашингтон пост“, Нобл е префрлена на работно место во Пентагон. НСА е дел од Министерството за одбрана на САД.
Актуелните и поранешните функционери, наведени од весникот, изјавија дека не ја знаат причината за отпуштањето на Хог или трансферот на Нобл.
Заменик-шефот на USCYBERCOM, Вилијам Хартман, беше именуван за вршител на должноста директор на НСА, а Шејла Томас, која беше извршен управител на агенцијата, беше именувана за негов привремен заменик, објави Пост.
Ниту Пентагон ниту Белата куќа веднаш не одговорија на барањето за коментар.
Демократот Џим Хајмс, висок член на Комитетот за разузнавање на Претставничкиот дом, го осуди разрешувањето на Хог.
Откако ја презеде функцијата на 20 јануари, републиканскиот претседател Доналд Трамп отпушти голем број шефови на американски разузнавачки служби и наместо нив назначи луѓе лојални нему.
Свет
Историска одлука: Уставниот суд го смени претседателот на Јужна Кореја

Уставниот суд на Јужна Кореја одлучи да го смени претседателот Јун Сук Јеол, потврдувајќи го неговото отповикување во парламентот поради прогласување воена состојба минатата година и втурнување на земјата во најголемата политичка криза во последните децении.
Со отстранување на Јун, претседателските избори мора да се одржат во рок од 60 дена, според уставот на земјата.
Премиерот Хан Дак-су ќе продолжи да ја извршува функцијата претседател до инаугурацијата на новиот шеф на државата.
Пресудата стави крај на повеќемесечниот политички хаос што ги засени напорите на земјата да соработува со новата администрација на американскиот претседател Доналд Трамп во време на забавување на економскиот раст.
Без оглед на отказот, Јун (64) се соочува со судење поради обвиненијата за бунт.
На 15 јануари, Јун стана првиот јужнокорејски претседател кој беше уапсен на функцијата, но беше ослободен во март, откако судот го укина налогот за негово апсење.
Политичката криза беше предизвикана од прогласувањето на воена состојба на 3 декември од страна на Јун, за која рече дека е неопходна за да се искорени „антидржавните“ елементи и злоупотребите на парламентарното мнозинство на опозициската Демократска партија, за кое тврдеше дека ја уништува земјата.
Јун ја укина воената состојба шест часа подоцна, откако пратениците се спротивставија на напорите на безбедносните сили да го затворат парламентот и гласаа за негово отпуштање.
Јун рече дека никогаш немал намера целосно да воведе воена состојба и се обидел да ги минимизира последиците, велејќи дека никој не е повреден.
После тоа избија повеќемесечни протести и останува нејасно дали одлуката на судот ќе го олесни политичкиот хаос предизвикан од прогласувањето на вонредна состојба од страна на Јун.