Американското Министерство за правда може да продолжи со разгледување на доверливите документи запленети од ФБИ во имотот на поранешниот американски претседател Доналд Трамп на Флорида додека трае жалбената постапка, одлучи денеска федералниот суд.

Единаесеттиот Окружен апелациски суд на САД, со седиште во Атланта, дозволи да продолжи истрагата на федералното обвинителство за 100-ина запленети документи означени како доверливи, пренесува „Ројтерс“.

Апелацискиот суд исто така рече дека ќе се согласи да поништи дел од наредбата на понискиот суд, со која се бара владата да поднесе доверливи записи на специјална проверка од независен арбитер.

Комисијата додаде дека одлуката е од ограничена природа бидејќи Министерството за правда само побарало делумно задржување во очекување на жалбата и дека не можело да одлучува за основаноста на самиот случај.

Адвокатите на Трамп сега потенцијално би можеле да побараат од Врховниот суд на САД да донесе одлука за ова прашање, според „Ројтерс“.

Трамп е под истрага од Министерството за правда за чување владини документи, од кои некои се класифицирани како високо доверливи, вклучително и строго тајни документи на неговиот имот Мар-а-Лаго во Палм Бич по напуштањето на функцијата во јануари 2021 година.

И Министерството за правда истражува евентуално попречување на истрагата.

Окружниот судија на САД, Ајлин Канон, минатата недела го овласти новоименуваниот независен арбитер, Рејмонд Дири, да го разгледа целиот сет на документи запленети во претресот на ФБИ во имотот на Трамп во Мар-а-Лаго на 8 август и да одреди краен рок за неговата работа во ноември, пренесе „Блиц.рс“.