Свет
Путин би заминал во Турција, но сака да биде придружуван од руски борбени авиони

Портпаролот на Кремљ, Дмитриј Песков, изјави дека во тек се подготовките претседателот Владимир Путин да ја посети Турција, каде што ќе разговара со турскиот претседател Реџеп Таип Ердоган.
Песков исто така изрази надеж дека Путин и Ердоган ќе имаат можност да разговараат на маргините на претстојниот самит на БРИКС, што ќе се одржи во рускиот град Казан, пренесува Ројтерс.
Од минатата година рускиот претседател Владимир Путин неколкупати ги одложуваше официјалните посети на Турција.
Официјалните лица наведоа различни причини за одложувањата. Некои тврдат дека од почетокот на војната во Украина, Путин избегнувал да ги посетува земјите кои не биле дел од Советскиот Сојуз, додека други тоа го припишуваат на одржувањето на руските избори претходно оваа година.
Сепак, извори запознаени со руските позиции за „Мидл Ист Ај“ велат дека условите на Путин за посета на Анкара се главната причина за постојаното одложување.
Имено, според тие извори, Путин сака да дојде во Турција придружуван од руски борбени авиони бидејќи веројатно се плаши дека Украинците би можеле да го соборат неговиот авион.
Дополнителни компликации создава и барањето на Москва Путин да патува во придружба на руски борбени авиони, со можност дури и да слета на турска територија. Системите за воздушна одбрана на НАТО во Турција би можеле да ги перцепираат таквите авиони како потенцијални непријателски цели.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
„Шпионирала за Киев, планирала да труе војници“: Русите уапсија готвачка на Крим

Федералната служба за безбедност (ФСБ) на Русија објави дека уапсила 45-годишна Русинка, главен готвач во ресторан во Севастопол, на Крим, под сомнение за шпионажа за Украина и планирање труење на руски војници, објави „Киев пост“.
Неименуваната жена, која е во притвор, е обвинета дека работела за Главната дирекција за разузнавање на Украина (ХУР) во последните две години. ФСБ тврди дека таа ги понудила своите услуги на украинската разузнавачка служба уште во септември 2023 година.
Таа наводно користела WhatsApp за да споделува информации со своите врски за локациите и рутите на рускиот воен персонал и опрема во Севастопол, поранешното главно пристаниште на руската Црноморска флота. ФСБ конкретно тврди дека таа фотографирала бродови на Црноморската флота стационирани во Севастополскиот залив, кои подоцна биле користени од украинските вооружени сили за планирање ракетни напади.
Таа е обвинета и за планирање труење на припадници на руските специјални сили кои го посетувале ресторанот каде што работела.
Кримскиот одред на ФСБ соопшти дека жената е обвинета за „велепредавство“ според член 275 од Рускиот кривичен законик, додавајќи дека истрагата за нејзините „криминални активности“ е во тек. Во соопштението за медиумите на ФСБ се наведува дека ова е уште еден пример за тоа како „украинските специјални служби ја дестабилизираат општествено-политичката ситуација и предизвикуваат економска штета на државата со активно регрутирање сторители на саботажи и терористички напади“.
фото: принтскрин
Регион
(Видео) Општа тепачка на свадба во Србија: гостинка ја удри невестата, возврати младоженецот

Свадбена прослава во Горњи Милановац се претвори во вистинска драма кога избувна масовна тепачка меѓу гостите.
Според порталот 192.рс, инцидентот започнал кога гостинка на свадбата, од причини кои засега се непознати, физички ја нападнала невестата и ја удрила.
Потоа реагирал младоженецот, обидувајќи се да ја заштити својата сопруга, а конфликтот набрзо се проширил и на другите гости.
Според снимката, во салата владеел целосен хаос, додека некои од присутните се обидувале да ја смират ситуацијата.
фото: принтскрин
Регион
Дојава за бомба на имотот на Милорад Додик

Утрово, во Бања Лука е примена пријава за поставена бомба на имотот на Милорад Додик, поранешниот претседател на Република Српска.
Според Радио Сараево, полицијата веднаш излегла на местото на настанот и спроведува контрадиверзиска инспекција на имотот.
Претходно наутро, е примена и пријава за бомба во хотелот „Палас“ во Бања Лука. Министерството за внатрешни работи на РС извршило увид и утврдило дека станува збор за лажна пријава.
фото: принтскрин