Свет
Путин во Монголија: Нашите односи се развиваат во сите правци

Односите меѓу Руската Федерација и Монголија се развиваат во сите правци, нагласи рускиот претседател Владимир Путин за време на разговорот со својот монголски колега Унагин Хурелсух во Улан Батор.
Разговорите меѓу рускиот и монголскиот лидер се одржаа во јурта, традиционален монголски номадски шатор поставен во зградата на државната палата во главниот град на Монголија, пренесува „РИА новости“.
„Покрај економската и политичката сфера, каде што активно соработуваме, би сакал да ја истакнам и ефективната работа во хуманитарните области, особено во областа на образованието. И покрај сите тешкотии, вклучително и оние што ги спомна претседателот на Монголија, како и историјата на Ковид-19, сепак влеговме на патот на раст на трговските односи и трговскиот промет“, рече рускиот претседател и додаде дека „билатералната меѓувладина комисија активно работи и неговата работа дава резултати“.
Претседателот на Монголија ја прифати поканата на Путин да присуствува на самитот на БРИКС+ во Казан во октомври оваа година.
„Ви благодарам, ја прифаќам вашата покана“, рече монголскиот претседател Хурелсух.
Ова е прво патување на Путин во земја потписничка на статутот на Меѓународниот кривичен суд, кој пред 18 месеци издаде налог за негово апсење, што особено го посочуваат западните медиуми. Одговарајќи на новинарско прашање дали имало преговори со монголските власти за ова прашање, портпаролот на Кремљ, Дмитриј Песков, рече дека сите аспекти од патувањето биле внимателно подготвени. Претходниот совет на судот, чија јурисдикција Русија не ја признава, издаде налог за апсење на Путин и детскиот правобранител Марија Лвова-Белова.
Украина ги повика монголските власти да го уапсат рускиот претседател Владимир Путин по наредба на Меѓународниот кривичен суд за време на неговата посета.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп за жестокиот напад на Киев: Владимире, престани!

Американскиот претседател Доналд Трамп денеска ги осуди најновите руски напади врз Киев на платформата Truth Social и го повика рускиот претседател Владимир Путин да ги запре.
„Не сум задоволен од руските напади врз Киев. Тие не се потребни и доаѓаат во многу лошо време. Владимире, престани! 5.000 војници умираат неделно. Ајде да го завршиме мировниот договор!“, напиша Трамп.
Реакцијата доаѓа откако руските сили го извршија најтешкиот напад врз главниот град на Украина од летото минатата година. Киев синоќа беше цел на комбинирани напади со беспилотни летала и проектили, при што загинаа најмалку девет лица, а беа повредени повеќе од 70, меѓу кои шест деца. Нападите предизвикаа пожари и урнаа згради во пет градски кварта, а спасувачките тимови сè уште трагаат по преживеани под урнатините.
Украинскиот претседател Володимир Зеленски ја прекина официјалната посета на Јужна Африка и најави враќање во својата татковина. За време на состанокот со јужноафриканскиот претседател Кирил Рамафоса, Зеленски повтори дека Украина нема да се согласи на мировен договор кој вклучува територијални отстапки, вклучувајќи го и Крим.
Свет
Истанбул погоден од 300 последователни потреси, сеизмолозите очекуваат уште еден силен земјотрес

Серија земјотреси го погодија Истанбул и денеска, а турската агенција за катастрофи АФАД извести за речиси 300 последователни потреси, од кои еден бил со јачина од 4,6 степени.
Од вчерашниот силен земјотрес, кој беше со јачина од 6,2 степени според Рихтеровата скала, АФАД забележа уште стотици земјотреси по должината на тектонските раседи во Мраморното Море.
Министерот за здравство Кемал Мемишоглу изјави дека 236 лица се повредени, од кои 173 во Истанбул. Петнаесет од нив морало да бидат хоспитализирани, а некои се повредени панично скокајќи од зградите.
Канцеларијата на гувернерот на Истанбул соопшти дека нема извештаи за урнати згради. Министерот за урбан развој Мурат Курум објави дека 12 згради се евакуирани како мерка на претпазливост.
Сеизмолозите и геолозите цитирани во турските медиуми, генерално, се согласуваат дека сè уште се очекува голем земјотрес. Иако не е познато кога би можело да се случи, експертите предвидуваат дека би можел да достигне магнитуда 7,4, а некои дури проценуваат и потенцијална магнитуда од 7,7.
Турција се наоѓа во еден од сеизмички најактивните региони во светот.
Локалните медиуми објавуваат дека жителите ја поминале ноќта во паркови и на отворени простори поставувајќи шатори наместо да се вратат во своите домови. АФАД ги повика луѓето да избегнуваат потенцијално небезбедни згради предупредувајќи дека последователните потреси би можеле да траат некое време.
Свет
Шведски новинар се соочува со 12 години затвор поради навреда на Ердоган

Шведскиот новинар Јоаким Медин може да биде осуден на 12 години затвор во Турција под обвинение за навреда на претседателот Реџеп Таип Ердоган и наводна поврзаност со терористичка организација, објави шведскиот весник „Дагенс ЕТЦ“ за кој работи Медин.
Медин беше уапсен минатиот месец по пристигнувањето во Турција, каде што требаше да известува за протестите што избувнаа по приведувањето на градоначалникот на Истанбул, Екрем Имамоглу, водечки опозициски политичар и ривал на Ердоган, објави бриселски „Политико“.
Обвинителството го товари за навреда на претседателот, што предвидува максимална казна затвор од три години во Турција, како и за членство во Курдистанската работничка партија (ПКК), која Анкара ја смета за терористичка организација, што е казниво со затвор до девет години.
„Тој само си ја вршеше работата. Јоаким не е криминалец, а камоли терорист“, изјави главниот уредник на весникот, Андреас Густавсон.
Тој посочи дека обвинувањата се политички мотивирани и дека е обид да се прикаже новинарската работа како тероризам.
Шефицата на шведската дипломатија Марија Малмер Стенергард рече дека разговарала за случајот со својот турски колега и побарала на Медин да му се дозволи да се врати во Шведска.
Односите меѓу Шведска и Турција веќе беа затегнати, особено во контекст на турското противење на шведското членство во НАТО, делумно поради шведската политика кон курдските групи.
Медин и претходно бил уапсен поради известување – во 2015 година поминал една недела во притвор во Сирија по што со посредство на курдски функционери бил ослободен.
Судењето на Медин е закажано за 30 април.