Свет
Путин му ја честита победата на Ердоган: „Драг пријателе“

Актуелниот турски претседател Реџеп Таип Ердоган прогласи победа во вториот круг од претседателските избори што денеска се одржаа во Турција.
Според првите официјални резултати по пребројани 75 отсто од гласовите, Ердоган води со 53,41 отсто, а Киличдароглу има 46,59 отсто.
Рускиот претседател Владимир Путин испрати писмо до Ердоган во кое му ја честита победата. Во писмото упатено до Ердоган пишува:
„Почитуван господине Ердоган, драг пријателе,
Прифатете ги моите искрени честитки за вашиот реизбор за претседател.
Победата на изборите е природен резултат на вашата несебична работа на чело на Република Турција, јасен доказ за поддршката на турскиот народ за вашите напори за зајакнување на државниот суверенитет и водење независна надворешна политика.
Високо го ценам вашиот личен придонес за зајакнување на пријателските руско-турски односи и заемно корисна соработка во различни области. Би сакал да ја потврдам нашата подготвеност за продолжување на конструктивниот дијалог за актуелните теми од билатералната, регионалната и меѓународната агенда. Придаваме големо значење на доследно спроведување на планираните заеднички проекти, пред се изградбата на нуклеарната централа Аккују и создавање на гасен центар во Турција.
Од се срце ви посакувам нови успеси во ваквата одговорна дејност како шеф на државата, како и добро здравје и благосостојба.
Искрени честитки,
Владимир Путин“.
Честитки претходно упатија и унгарскиот премиер, Виктор Орбан, српскиот претседател, Александар Вучиќ, како и лидерите на Катар, Сомалија и Пакистан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп воведе царини за увоз од сите земји, за ЕУ царина од 20 отсто

Претседателот Доналд Трамп денеска објави царини од најмалку 10 отсто за практично сите стоки кои доаѓаат во Соединетите држави, плус уште повисоки стапки за десетици земји кои имаат најголем трговски дефицит со Соединетите држави.
Новата политика претставува драматична промена во глобалната трговска и економска политика. Таа е насочена кон обновување на производствената моќ на САД и трговската рамнотежа. Но, тоа се заканува да ескалира нова глобална трговска војна и да ги зголеми цените за американските потрошувачи во несигурно време за економијата, пишува „Си-ен-ен“.
Политиката на Трамп ќе воспостави основна царина од 10 проценти за сите стоки од сите земји, освен оние кои се во согласност со договорот за слободна трговија USMCA меѓу Мексико, Канада и Соединетите држави (стоките што не се усогласени ќе продолжат да се наплаќаат по стапка од 25 отсто). Увозниците на стоки од други нации ќе почнат да ја плаќаат основната тарифа од 10 отсто во сабота.
На група од околу 60 земји, кои високи функционери на администрацијата на Трамп ги нарекоа „најлоши престапници“, ќе им се наплаќа тарифа по половина од тарифата што ја наплаќаат од САД. Тие реципрочни тарифи ќе стапат на сила на 9 април часот по средноевропско време.
Трамп држеше голем графикон со наслов „Реципрочни тарифи“, на кој се прикажани новите царини што САД ги воведуваат кон одредени земји и оние што тие земји веќе и ги наметнуваат на Америка.
Според прикажаното, увозот од Обединетото Кралство ќе биде оптоварен со царина од 10 отсто, а увозот од Европската унија со 20. Кина ќе плаќа царини од 34 посто, а Србија дури 37 отсто.
Тој повторно жестоко ги критикуваше Кина и ЕУ, велејќи: „Не’ дерат. Тажно е да се гледа. Мизерно е“.
Трамп рече дека компаниите кои ги произведуваат нивните производи во Соединетите држави нема да плаќаат никакви царини.
„Нема тарифа ако го правите вашиот производ овде во Америка“, рече претседателот. Тој најави и дека наскоро ќе почне да добива повици од „кралеви, кралици и амбасадори“ кои ќе бараат ослободување од царините.
Неговата порака до нив е: „Отстранете ги сопствените царини, отстранете ги бариерите, престанете да манипулирате со валутите… и почнете да купувате десетици милијарди долари американски стоки“.
Свет
Трамп: Воведуваме царини од 25 отсто за сите возила произведени надвор од САД, стапуваат во сила на полноќ

Американскиот претседател, Доналд Трамп најави дека САД ќе воведат царина од 25 отсто за сите автомобили произведени надвор од САД почнувајќи од полноќ.
Критикувајќи го трговскиот дисбаланс, Трамп рече дека понекогаш „пријателите се полоши од непријателите“ кога станува збор за трговијата.
„На пример, повеќе од 80 проценти од автомобилите произведени во Јужна Кореја се продаваат во Јужна Кореја, а повеќе од 90 отсто од автомобилите што се продаваат во Јапонија се произведени во Јапонија“, рече тој. Додаде дека автомобилите произведени во САД, како што е Форд, имаат само симболично присуство на тие пазари, што, според него, ја опустоши американската автомобилска индустрија.
„Затоа, почнувајќи од полноќ, ќе стапи на сила царината од 25 отсто за сите возила од странско производство“, најави Трамп.
Рече дека работните места и домашното производство ќе се вратат во Америка и дека неговата политика ќе ги принуди другите пазари да се отворат за американските производи.
Тој најави засилена пазарна конкуренција и пониски цени за потрошувачите.
„Ова навистина ќе биде златното доба на Америка“, додаде претседателот.
Доналд Трамп рече дека Соединетите Американски Држави со децении се искористени од измамници и странски земји, кои профитирале на сметка на американската економија.
Царините ги опиша како реципрочни, а денешниот ден како еден од најважните денови во американската историја.
Свет
(Видео) Камерата ги снимила последните моменти на студентката Сара пред убиството

Видеото од надзорна камера на бензинската пумпа е емитувано ексклузивно на „Тг1“, а на него се прикажани последните моменти од животот на студентката Сара Кампанела.
На видеото се гледа како Сара Кампанела и Стефано Аргентино заедно пешачат на кратко растојание во близина на стадионот Гази во Месина. Двајцата поминуваат зад бензинска пумпа. Потоа, дваесетина секунди исчезнуваат од кадарот, можеби потоа застанале да разговараат.
Сара потоа се гледа како оди и продолжува кон автобуската станица, кога и се придружува Сатефано. Набргу потоа ја избол со нож, а потоа избегал.
Il femminicidio di #SaraCampanella a #Messina. Interrogatorio di garanzia in carcere per Stefano Argentino. In esclusiva al Tg1 il video degli ultimi minuti di vita della ragazza.#Tg1 Lorenzo Santorelli pic.twitter.com/7cqLuv5oMB
— Tg1 (@Tg1Rai) April 2, 2025
Таа починала истата вечер со две убодни рани.
Очигледно трето лице му помогнало да избега. Откако ја избол Сара, младиот човек стигнал до Ното и се засолнил во пансион во сопственост на неговата мајка.
„Лесно избега веднаш по настанот, додека можеше да смета на поддршка од трети лица, кои во моментов се идентификуваат, за да му ги покријат трагите“, се вели во соопштението на обвинителството.
Млад човек од истиот колеџ го видел убиството, се обидел да стигне и да го фати убиецот, но за жал не успеал.
Полицијата се уште трага по оружјето со кое била убиена Сара.
Сара по нападот веднаш со автомобил била пренесена во болница, но лекарите не можеле да направат ништо бидејќи изгубила премногу крв.
Полицијата смета дека мотив за убиството била невозвратена љубов, поточно Стефано бил заљубен во Сара, а таа не сакала да биде со него, по што тој ја демнел.
Полицијата продолжува да го истражува злосторството.