Свет
Путин: Ние сме за примирје, но многу прашања прво треба да бидат одговорени

Рускиот претседател, Владимир Путин, изрази подготвеност за примирје во Украина, но нагласи дека е неопходно да се решат клучните прашања пред неговото воспоставување.
Toj првин, му се заблагодари на претседателот на САД, Доналд Трамп за учеството во решавањето на конфликтот. Путин ја нагласи потребата од сеопфатен мировен договор што би обезбедил долгорочен мир.
„Се чини дека Украина ја донесе одлуката под американски притисок. Убеден сум дека Украина прифати затоа што Американците ги убедиле, имајќи ја предвид ситуацијата на теренот. Бев во Курск, ситуацијата е целосно под наша контрола. Групата што влезе во оваа област е опколена. Украинското воено раководство е елиминирано, изгубија таму. Потоа се обидуваа да избегаат во мали групи, но сè е под наша контрола. Оставија опрема. Во следните неколку дена ќе ја блокираме регијата, никој нема да може да замине. Ќе има само два начина за излез – смрт или предавање“, рече Путин.
Додаде дека за украинската страна би било добро да има 30 дена примирје, и Русија се согласува, но прашува што значи тоа за Курск.
„Дали тоа значи дека Украинците слободно ќе си заминат, дури и оние кои извршиле злосторства? Што ќе се случи на првата линија? Русија моментално е во офанзива на сите фронтови. Како ќе ги искористат тие 30 дена? За да продолжат со присилната мобилизација во Украина, да добиваат оружје и да тренираат единици? Како ќе се спроведува контролата, како може да ни биде гарантирано дека тоа нема да се случува? Кој ќе ги издава наредбите за прекин на огнот? Станува збор за 2000 километри – кој ќе одлучува кој и каде го прекршил примирјето? Ова се прашања што мораат детално да бидат разгледани од двете страни. Идејата како таква е добра, но мора да се дискутира. Мораме да разговараме со американските партнери, можеби да разговараме со претседателот Трамп. Но, поддржуваме решение на конфликтот со мирен пат,“ изјави Путин.
„Ги знаеме нашите интереси и цели, разговаравме со Трамп. Гледавме како Зеленски беше понижен во Белата куќа и насекаде. Сега мора да размислува за мир. Немаше ни збор за договор за минералите, а сега се согласуваат на тоа,“ додаде тој.
Според Путин, ако Русија и САД се договорат да соработуваат во областа на енергетиката, тогаш гасоводите кон Европа можат повторно да се активираат, и Европа ќе добие евтин гас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Украина: Русите употребиле хемиско оружје 888 пати само во мај

Организацијата за забрана на хемиско оружје (OPCW) потврди дека Русија систематски користи хемиско оружје против вооружените сили на Украина. Според податоците од Генералштабот на Украина, објавени од Ukrinform, 888 случаи на руска употреба на хемиски агенси на бојното поле се регистрирани само во мај 2025 година.
Ова го објави на Фејсбук Центарот за стратешки комуникации и безбедност на информациите, коментирајќи го најновиот извештај на OPCW.
„Извештајот потврдува дека Русија систематски користи солзавец, кој е класифициран како контрола на немири, во борбени операции, што е изрично забрането како метод на војување според меѓународното право“, се вели во соопштението.
Овие забранети супстанции се пронајдени во гранати што ги користеле руските сили против украинските бранители.
Ова е веќе трет извештај на ОЗХО што потврдува дека Русија намерно и постојано ја крши Конвенцијата за хемиско оружје.
„Според податоците на Генералштабот, само во мај 2025 година, агресорот употребил опасни хемиски соединенија 888 пати во борбени зони. Со извршување на вакви систематски и целни воени злосторства, Русија се стреми да ги поткопа темелите на меѓународното право“, нагласи Центарот.
Свет
Иран призна дека е направена голема штета на нуклеарните постројки

Министерот за надворешни работи на Иран призна дека нуклеарните постројки на Иран претрпеле „значајна и сериозна“ штета во неодамнешните напади на САД и Израел.
Абас Арагчи изјави за државната телевизија дека Организацијата за атомска енергија на Иран моментално го проценува обемот на уништувањето.
Но, само неколку часа претходно, врховниот лидер ајатолахот Али Хамнеи изјави дека нападите не ја попречиле нуклеарната програма на Иран. Со тоа, тој одговори на изјавата на американскиот претседател Доналд Трамп дека три нуклеарни постројки биле „целосно уништени“ од бомбардирањето. Хамнеи тврди дека нападите не „постигнале ништо значајно“.
Врховниот лидер, кој се крие од почетокот на војната со Израел на 13 јуни, го обвини Трамп дека ги „претерува“ ефектите од бомбардирањето и прогласува победа над САД и Израел. Но, изјавите на Арагчи прикажуваат поинаква слика.
Министерот, исто така, рече дека Иран во моментов нема планови да продолжи со преговорите со САД. Шестата рунда разговори беше договорена, но беше откажана откако Израел ги започна нападите.
„Сакам да разјаснам дека не е постигнат никаков договор, не е договорено никакво решение и не е водена никаква дискусија за започнување нови преговори“, рече тој.
Додаде дека владата разгледува што е во „најдобар интерес на иранскиот народ“ и објави дека нејзиниот дипломатски пристап ќе „преобликува“. Тој не прецизираше што точно мисли.
Свет
Шпанскиот премиер: ЕУ има двојни стандарди кон Израел

Шпанскиот премиер Педро Санчез ја обвини Европската Унија за двојни стандарди поради тоа што не презема конкретни мерки кон Израел, и покрај наодите од извештајот на ЕУ што укажуваат на можни кршења на човековите права во Газа, пишува dw.com.
Санчез рече дека ситуацијата во Појасот Газа е „катастрофална“ и дека Унијата мора да го суспендира Договорот за асоцијација со Израел.
„Имавме 18 пакети санкции против Русија, а Европа не може да суспендира еден договор со Израел“, рече Санчез.
Според локалните власти, израелската воена операција во Газа резултираше со повеќе од 55.000 палестински смртни случаи во последните 18 месеци. Израел ги негира обвиненијата за геноцид, велејќи дека се бори против Хамас, исламистичката милитантна група одговорна за нападот во 2023 година.
Шефицата за европска надворешна политика, Каја Калас, нагласи дека целта на извештајот не е да се казни Израел, туку да се поттикне подобрување на ситуацијата во Газа. Лидерите на ЕУ „го забележаа“ извештајот и најавија дека темата ќе биде повторно разгледана во јули.