Свет
Путин: Русија знае кои се осомничените за инцидентот во Солсбери

Рускиот претседател Владимир Путин апелира до двајцата што Лондон ги осомничи дека се вклучени во случајот со Скрипал да се појават и да разговараат со медиумите, пренесува „Спутник“. Руските власти ги идентификуваа двајцата осомничени за труење на поранешниот руски шпион Сергеј Скрипал и неговата ќерка Јулија во Солсбери, изјави во средата Путин.
„Ние знаеме кои се, ги најдовме“, изјави Путин на пленарната сесија на Источниот економски форум (ЕЕФ) во Владивосток.
Рускиот претседател истакна дека осомничените се цивили.
„Се надевам дека тие ќе се појават и ќе кажат сè за себе. Нема ништо особено криминално, ве уверувам“, рече тој и ги повика двајцата да разговараат со медиумите.
Минатата недела британската полиција соопшти дека идентификувала двајца руски државјани за труењето на Скрипал, а британската премиерка Тереза Меј ја обвини руската воена разузнавачка служба за организирање на труењето по наредба на централните руски власти. Русија, од своја страна, рече дека фотографиите и имињата на осомничените, Александар Петров и Руслан Боширов, не докажуваат вмешаност на Москва во нападот.
Обидот за труење на поранешниот руски шпион Скрипал и неговата во британскиот град Солсбери на 4 март предизвика тензии помеѓу Русија и Обединетото Кралство бидејќи Лондон и неговите сојузници ја обвинуваат Москва дека го организира нападот, а Москва го негира тоа. Неодамна, властите на Велика Британија тврдеа дека двајца руски државјани, осомничени за нападот, биле поврзани за руската разузнавачка служба ГРУ.
Инцидентите ги поттикнаа САД да воведат нови санкции против Русија на 27 август, а голем број земји од ЕУ ги протераа некои од руските дипломати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Џими Кимел се враќа на екранот

Американскиот водител Џими Кимел утре се враќа на екранот со својот популарен ноќен шоу-програм, откако продукцијата беше привремено стопирана поради неговите контроверзни коментари за убиството на Чарли Кирк, соопшти Дизни.
„Емисјата ја суспендиравме за да избегнеме дополнителни тензии во чувствителен момент за земјата“, порачаа од компанијата, додавајќи дека по разговори со Кимел, одлучиле да продолжат со снимањето.
Кимел, познат по својата критика кон Доналд Трамп, на 14 септември коментираше дека осомничениот напаѓач, Тајлер Робинсон, бил поддржувач на поранешниот претседател. Тој ја исмеа и реакцијата на Трамп по убиството на Кирк, прикажувајќи изјава во која претседателот зборува за реновирање на Белата куќа.
„Ова не е начин на кој возрасен човек тагува по убиство на пријател. Вака четиригодишно дете тагува за златна рипка“, саркастично додаде Кимел.
Емисјата на Кимел се емитува на „Еј-би-си“, телевизија во сопственост на Дизни.
Свет
Франција ја призна Палестина

Францускиот претседател Емануел Макрон вечерва на Генералното собрание на ОН потврди дека Франција ја признава Палестина како независна држава.
Со ова, Франција се приклучува на земји како Обединетото Кралство, Канада и Австралија, кои го направија истиот чекор во последните недели.
„Светот е на чекор до губење на шансата за мир. Време е да се стави крај на војната во Газа“, порача Макрон, додавајќи дека решението со две држави е единствен пат.
Израел остро реагираше, оценувајќи дека признавањето е награда за тероризмот и повтори дека палестинска држава нема да се случи.
Палестинските власти го поздравија чекорот и го оценија како неповратен пат кон дводржавно решение.
Со Франција, вкупно 153 земји-членки на ОН – речиси 80 отсто ја имаат признато Палестина.
Во меѓувреме, Израелската офанзива продолжува. Според здравствени власти во Газа, во последните 24 часа загинале 61 лице, со што вкупната бројка од 7 октомври 2023 достигнува 65.344 загинати.
Свет
Голем напад со беспилотни летала врз Москва, небото е затворено

Москва вечерва беше нападната со беспилотни летала.
Градоначалникот на Москва, Сергеј Собјанин, објави дека противвоздушните сили собориле вкупно девет дронови , а подоцна уште два. Жителите на Московскиот регион слушнале експлозии на пристапот кон градот, а според првите информации што ги објавија руските медиуми, нема повредени или голема материјална штета.
Многу откажани и одложени летови
Повеќе од 35 летови беа откажани и одложени на московските аеродроми Шереметјево, Домодедово и Внуково во вечерните часови поради украински напади со беспилотни летала. Работата на аеродромот Шереметјево беше привремено суспендирана.
„До 20:19 часот по московско време, 21 лет беше одложен, а уште еден откажан во Шереметјево. Девет одложувања и две откажувања беа регистрирани во Домодедово, а четири летови беа одложени во Внуково“, објавуваат руските медиуми.
Руските медиуми наведуваат дека по нападот, тајната служба на ФСБ и Истражниот комитет ќе спроведат истрага и дека се очекува кривична постапка за тероризам. Оперативните служби на терен ги проверуваат остатоците од беспилотните летала и проверуваат дали предизвикале дополнителна штета.