Свет
Путин: Русија ќе направи сè за Египет да се интегрира во БРИКС

Русија ќе се обиде да направи сè за да го интегрира Египет во БРИКС во времето кога Русија е претседавач со таа организација, изјави денеска рускиот претседател, Владимир Путин.
Рускиот претседател и неговиот египетски колега Абдел Фатах ел-Сиси во вторникот преку видеоврска ја почнаа изградбата на новиот блок во египетската нуклеарна централа „Ел-Даба“, објави новинската агенција „РИА новости“.
„Се отвораат нови ветувачки можности за зголемување на нашата плодна соработка во врска со пристапувањето на Египет во БРИКС. Сакам да нагласам дека Русија од самиот почеток искрено ја поддржува желбата на египетската страна да стане полноправна членка на оваа организација“, рече Путин и додаде дека Москва планира да одржи повеќе од 200 настани поврзани со БРИКС, како и дека очекува египетските претставници да земат активно учество во нив.
На 1 јануари Русија го презеде претседателството со БРИКС.
На почетокот на годината, покрај Бразил, Русија, Индија, Кина и Јужноафриканската Република, членки на БРИКС станаа и Египет, Етиопија, Иран, Обединетите Арапски Емирати и Саудиска Арабија.
Во исто време, откако Хавиер Милеј стана претседател на Аргентина, оваа земја се откажа од членството во БРИКС.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
По критиките на претходната средба со Трамп, Зеленски овојпат доби комплименти за облеката

Денешната средба помеѓу лидерите на САД и Украина, Доналд Трамп и Володимир Зеленски, се одвиваше во многу попријатен тон од претходната, а двајцата лидери во повеќе наврати и се шегуваа.
Новинарот Брајан Глен, кој го критикуваше Зеленски во февруари затоа што не носел одело, сега му рече: „Изгледаш фантастично во тоа одело. Се извинувам за нападот во февруари“.
На тоа, Доналд Трамп додаде: „И јас му го кажав тоа“, истакнувајќи дека Глен го „нападнал“ Зеленски минатиот пат.
Зеленски се насмеа и одговори: „Се сеќавам на тоа“, а потоа се пошегува дека Глен носел исто одело како и тогаш: „Јас се пресоблеков, ти не“.
Темата во што денес ќе се појави облечен Зеленски деновиве беше во фокус во Вашинтон.
Свет
Трамп до Зеленски: Ако сме во војна, значи нема избори?

Кога новинарите го прашаа дали е отворен за одржување избори во Украина, претседателот Володимир Зеленски одговори потврдно, но нагласи дека тоа може да се случи само во безбедни околности.
„Бидејќи за време на војна, не можете да одржувате избори“, рече Зеленски, додавајќи дека за тоа можеби ќе биде потребно примирје.
Според него, тоа треба да вклучува копно, море и воздушен простор за да се овозможат „демократски“ и „легални“ избори.
На тоа, американскиот претседател Доналд Трамп рече: „Значи, велите дека не можете да имате избори за време на војна?
„Значи, да речеме за три и пол години – значи, ако случајно бидеме во војна со некого, повеќе немаме избори?“
Зеленски се насмеа, а Трамп се насмевна додека се прекинуваа еден со друг. Украинскиот претседател рече: „Дали ви се допаѓа таа идеја?“
Забелешката на Трамп се однесува на следниот американски изборен циклус, во кој тој во моментов не би можел повторно да учествува, според законот.
Свет
Војната ќе заврши, на целиот свет му е доста од тоа – Трамп верува дека можно е да се договори мир додека траат борбите

Претседателот на САД, Доналд Трамп беше прашан дали ги разбира „коренските причини“ за војната за време на состанокот со украинскиот лидер Володимир Зеленски пред новинарите во Белата куќа.
„Војната ќе заврши. Овој господин сака да ја заврши, Владимир Путин сака да ја заврши, мислам дека на целиот свет му е доста од неа и ние ќе ја завршиме“, рече Трамп.
„Јас завршив шест војни“, тврди американскиот претседател.
„И мислев дека можеби оваа може да биде најлесната. И не е – тешка е, има многу причини за тоа и ќе се зборува за неа долго време.“
Тој додаде: „Се чувствувам уверен дека ќе можеме да ја решиме.“
Американскиот претседател верува дека може да се постигне мировен договор дури и додека војната продолжува.
„Не мислам дека прекинот на огнот е неопходен. Знаете, ако ги погледнете шесте договори што ги склучив оваа година, сите беа договорени додека војната сè уште траеше. Ниту еден од нив не вклучуваше прекин на огнот“, им рече Трамп на новинарите во Белата куќа.
„Знам дека прекинот на огнот би можел да биде корисен, но исто така разбирам зошто едната или другата страна не би го сакале тоа, од стратешки причини. Се случува прекин на огнот, а потоа тие се обновуваат и се обновуваат и се обновуваат, и можеби не им се допаѓа.“