Свет
Пјонгјанг и’ се заканува на Америка: Секое мешање во нашите операции е објава на војна

Северна Кореја соопшти дека секое мешање во операциите на нејзините извидувачки сателити ќе го смета за објава на војна.
Пјонгјанг рече дека ќе ги употреби своите сили доколку оцени дека неjзините стратешки средства се загрозени.
Пјонгјанг ќе одговори на секое американско мешање со оневозможување на американските шпионски сателити, изјави портпаролот на севернокорејското Министерство за одбрана, пренесе КЦНА.
„Ако САД гледаат на извидувачкиот сателит на КНДР како воена закана, безбројните американски шпионски сателити кои секојдневно летаат над регионот на Корејскиот Полуостров со задача да ги надгледуваат нашите главни стратешки точки треба да се сметаат за примарна цел што треба да се уништи од вооружените сили на Северна Кореја“, соопшти севернокорејското министерство.
Пјонгјанг посочи дека извидувачкиот сателит „Малијонг-1“ е дел од територијата на Северна Кореја над која има суверенитет.
Беше наведено и дека сателитите за извидување не се сметаат за вселенско оружје според меѓународното право, поради нивните технички карактеристики насочени кон набљудување.
Северна Кореја тврди дека успешно го лансирала својот прв воен извидувачки сателит на 21 ноември, од кој добила фотографии од воени објекти на копното на САД, Јапонија и американската територија Гуам.
Портпаролот на американската вселенска команда, на прашањето дали Вашингтон има способност да ги запре извидувачките операции на севернокорејскиот сателит, рече дека САД на различни начини можат да ги елиминираат вселенските способности на противникот, пренесува Ројтерс повикувајќи се на американски медиуми.
Поради лансирањето на извидувачки сателит во четвртокот, САД воведоа нови санкции кон Пјонгјанг во координација со Австралија, Јапонија и Јужна Кореја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Италијанската полиција фати Албанец со над 27 килограми кокаин

Италијанската полиција уапси 47-годишен албански државјанин, откако во автомобилот му биле пронајдени 27,6 килограми кокаин.
Дрогата била скриена во посебен простор под предните седишта на возилото.
Покарај кокаинот, полицијата го конфискува и возилото, а приведениот е однесен во притвор во затворот во Катанија.
Според албанските медиуми во италијанските затвори се наоѓаат над 2.000 албански државјани, осудени главно за трговија со дрога.
Свет
Албанија продолжува со рекордни бројки на странски туристи

Албанија продолжува со рекордни бројки на странски туристи, која во периодот јануари – август ја посетиле околу девет милиони.
Албанскиот Институт за статистика објави податоци што потврдуваат дека влезот на странски државјани е за 5,2 отсто поголем ако се спореди со истиот период пред една година, кога беа регистрирани вкупно 8,5 милиони странски државјани.
Само во август бројот на странски државјани кои влегле на албанска територија е 2,3 милиони, што е зголемување од 9,9 отсто, во споредба со истиот месец минатата година.
Албанската економија имаше корист од странските туристи од 2,1 милијарди евра за само шест месеци, до кога ја посетиле 4,76 милиони странци. Овие бројки потврдуваат дека 2025 година ќе биде уште пооптимистичка во однос на туризмот во земјата, додека приходите се очекува да се зголемат за околу 7,7 отсто во споредба со лани.
Се очекува приливот на туристи да продолжи и есенва, со што ќе се продолжи туристичката сезона во земјата. Туроператорите известуваат дека резервациите се високи и за септември и за октомври.
Минатата година Албанија ја посетиле над 11,7 милиони туристи или 15,2 отсто повеќе од претходната година. Очекувањата за годинава се над 12 милиони туристи.
Свет
Жена убиена на свадба во центарот на Шибеник, ја погодила ракета

Жена е повредена кога пиротехничко средство – сигнална ракета – било испукано во близина на катедралата „Свети Јаков“ во Шибеник синоќа, и починала од повредите во болница, соопшти хрватската полиција.
Во соопштението од полициската управа Шибеник-Книн се додава дека е уапсен 52-годишен маж, пренесува Хина. Во тек е кривична истрага, соопшти полицијата.
Хрватските медиуми неофицијално известуваат дека несреќата се случила за време на свадбена прослава, кога осомничениот испукал ракета.