Свет
Работниците во Индија речиси 200 часа се заробени во тунелот
Индиски официјални лица предупредија дека градежните работници, кои се заробени во урнатиот тунел повеќе од една недела, би можеле да поминат уште неколку дена таму бидејќи разчните спасувачки напори досега не успеаја. Стравовите за здравјето и благосостојбата на работниците продолжуваат да растат бидејќи тие поминаа речиси 200 часа заробени во темен тунел во државата Утараханд.
Патниот тунел долг речиси пет километри, кој беше во изградба во хималајската држава, се урна во раните утрински часови на 12 ноември по лизгање на земјиштето во планинска област. Официјалните лица најпрвин објавија дека во тунелот се задржани 40 работници, но подоцна тој број се зголеми на 41.
Иако властите ја уверија јавноста дека работниците ќе бидат бргу спасени, операцијата сега влезе во осмиот ден бидејќи машините и операциите за спасување се отежнати од тешкиот шут и нестабилниот терен. Баскар Хулбе, дел од специјалистичкиот тим од кабинетот на премиерот, истакна дека пет владини агенции сега се вклучени во спасувачката операција.
Сепак, тој вчера предупреди дека може да поминат уште четири до пет дена пред да се дојде до работниците. Голема специјализирана машина беше донесена од Делхи, но операцијата беше прекината во петокот од безбедносни причини кога се слушнаа силни звуци на пукање.
Националната корпорација за развој на автопати и инфраструктура предупреди дека постои „голема можност за дополнителен колапс“. Владата рече дека сега е во сила нов „план од пет точки“, кој вклучува дупчење тунели од три правци, вклучително и вертикално и хоризонтално од двете страни. Беа изградени и нови патишта за да се донесат повеќе машини до градилиштето.
Индиската влада потврди дека се консултирала со експертите вклучени во познатото спасување на тимот млади фудбалери од пештера на Тајланд во 2018 година. Кислород и пакети со храна им биле доставени на мажите преку мал цевковод, кој се користи и за комуникација.
Во тек е операција за вметнување поголема цевка во шуплината за лебот и овошјето да им се пренесат на работниците. Сепак, лекарите предупредуваат дека колку подолго трае спасувањето, толку е поголема заканата за здравјето и психолошката стабилност на заробените работници. Лекарите на самото место предупредија минатата недела дека некои работници се пожалиле на гадење и главоболки.
За време на посетата на локацијата, министерот за патен транспорт и автопати, Нитин Гадкари, рече дека спасувачките тимови „се соочуваат со предизвици поради сложената и кревка геологија на Хималаите”. Гадкари се обиде да ја увери јавноста дека заробените работници се „безбедни и во добро расположение”. .
„Одржувањето на моралот на заробените работници и на членовите на нивните семејства треба да биде колективна одговорност на сите во овој момент“, додаде тој. Тунелот се градеше во областа Утаркаши како дел од шемата за патишта ‘Чар Дам’, водечки проект на премиерот Нарендра Моди вреден 1,5 милијарда долари, чија цел е подобрување на поврзувањето низ Утаракханд, популарно хинду верско место.
Проектот се покажа контроверзен бидејќи еколозите и локалните жители тврдат дека тешкото дупчење и градбата предизвикале слегнување на земјиштето, лизгање на земјиштето и голема еколошка штета во ранливиот регион на Хималаите, пишува „Гардијан“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик му се заблагодари на Трамп
Поранешниот претседател на Република Српска, Милорад Додик, се огласи откако САД ги укинаа санкциите против него, заблагодарувајќи му се на американскиот претседател Доналд Трамп за исправката, како што тврди, на големата неправда. Тој ја нарече одлуката морална рехабилитација на вистината за Република Српска.
Во објава на социјалните мрежи, Додик му се заблагодари на американскиот претседател Доналд Трамп и неговите соработници за „исправката на големата неправда нанесена врз Република Српска, нејзините претставници и нивните семејства“, која, како што наведува, „ја создадоа администрациите на Обама и Бајден“.
„Одлуката за укинување на санкциите не е само правна, туку и морална рехабилитација на вистината за Република Српска и сите оние кои чесно ѝ служат. Уште еднаш се покажа дека сè што беше кажано против нас беше лага и пропаганда, врз која беше изграден големиот хаос што го создаде Кристијан Шмит – хаос што сега мора да се исчисти“, рече Додик.
Тој додаде дека може да им прости сè на оние кои се фалеле и верувале во туѓите лаги во изминатите години, „освен годините што ги изгубиле затоа што верувале дека Република Српска ќе падне“. „Денес е јасно – таа никогаш нема да падне“, рече Додик.
Фото: ЕПА
Свет
Ураган ги погоди Карибите, 75% од Јамајка без струја, најмалку 25 загинати во Хаити
Екстремно моќниот ураган Мелиса стигна до Куба откако вчера ја опустоши Јамајка. Тоа е најмоќната бура со која островската земја некогаш се соочила.
Досега нема потврдени смртни случаи, но голем дел од Јамајка е без струја и интернет, а со оглед на силата на бурата и обемот на штетата, се очекува да има. Хуманитарните организации велат дека се „подготвуваат за најлошото“.
Кубанскиот новинар Луис де Хесус е во Сантијаго де Куба, каде што ураганот стигна до копното преку ноќ.
„Во средината на ураганот, чувството е силно, се слушаат секакви звуци“, изјави тој за Би-Би-Си од источна Куба. „Се обидов да спијам, но беше тешко.“
Силата на ветерот скрши прозорци во неговиот хотел и оштети некои врати.
„Излегов утрово да ја проценам штетата и видов дека дрвјата се соборени, електричните кабли се скршени, а некои згради се оштетени“, додаде тој.
Државниот секретар на САД, Марко Рубио, потврди во објава на социјалната мрежа X дека американската влада е во близок контакт со Јамајка, Хаити, Доминиканската Република и Бахамите додека се соочуваат со „разорните влијанија на ураганот Мелиса“.
„Нашите тимови за спасување и реагирање се движат кон погодените области заедно со критични залихи за спасување животи“, рече Рубио, чии родители се Кубанци.
Градоначалникот на јужниот крајбрежен град Пети-Говав изјави за АП дека 25 лица загинале откако реката Ла Диг се излеала од своите корита поради ураганот.
Десетици домови се поплавени и срушени, а луѓето сè уште се заробени под урнатините, изјави градоначалникот Жан Бертран Субрем.
Тој побара од владата да помогне во спасувањето на жртвите. „Преплавен сум од ситуацијата“, додаде тој.
Свет
(Видео) Се урна седумкатница во Турција, меѓу загинатите има дете
Седумкатна зграда се урна денеска во северозападниот турски град Гебзе, при што загинаа две лица, а тројца други беа повредени. Службениците потврдија дека сите пет жртви се од исто семејство, објави Euronews. Според државниот радиодифузер ТРТ, станува збор за 43-годишен маж, 37-годишна жена и нивните три деца.
Gebze'de çöken binada 18 yaşındaki Dilara, 8 saat sonra enkaz altından sağ olarak çıkarıldı. https://t.co/z3NhGJtWw4
— Söylenti Haber (@soylentihaber) October 29, 2025
Гувернерот на Гебзе, Илхами Акташ, потврди дека спасувачите го извлекле телото на 12-годишниот Мухамед Емир Билир од урнатините, додека идентитетот на второто починато лице сè уште не е утврден. Стотици вработени во Агенцијата за управување со катастрофи и вонредни состојби (AFAD) беа вклучени во спасувачките операции на местото на несреќата.
Според државната агенција Анадолија, причината за уривањето на зградата во моментов е непозната. Сепак, градоначалникот на Гебзе, Зинур Бујукгоз, им изјави на локалните новинари дека се сомнева дека блиската метро станица може да биде причина.
Овој инцидент се случи само неколку дена откако земјотрес со јачина од 6,1 степени ја погоди западна Турција во понеделникот. Земјотресот предизвика уривање на три згради и една двокатна зграда во градот Синдирги, но официјалните лица разјаснија дека овие згради биле ненаселени по штетите во претходниот земјотрес.
Иако немаше жртви во урнатините на зградите, 22 лица беа повредени во падови предизвикани од паника, потврди Исмаил Устаоглу, гувернер на покраината Баликесир. Земјотресот во понеделник е регистриран во 22:48 часот по локално време на длабочина од речиси 6 км и е почувствуван во Истанбул и околните покраини.
Експертите повторно ги повикаа турските власти да ги спроведуваат модерните градежни прописи, велејќи дека непочитувањето претставува значителен ризик. Во јануари, две лица загинаа откако се урна четирикатна зграда во Коња, а сопствениците на продавници се судат за наводно отстранување на потпорни столбови.
Фото:принтскрин

