Севернокорејскиот лидер Ким Џонг-ун и рускиот претседател Владимир Путин вчера се сретнаа на редок самит на кој разговараа за воени прашања, војната во Украина и за можната руска помош за сателитската програма на Северна Кореја.

Путин му го покажа на Ким најнапредниот руски вселенски тест-полигон на рускиот Далечен Исток и разговараа за можноста за испраќање севернокорејски космонаут во вселената. Ким, кој пристигна со воз од Северна Кореја, поставуваше детаљни прашања за ракетите додека беше на обиколка на Источниот космодром.

По обиколката, Путин и Ким разговарале неколку часа заедно со своите министри, а потоа разговарале за светските прашања и за можната билатерална соработка. Потоа ручаа руски равиоли полнети со рак и есетра со печурки и компири.

Со чаша руско вино Ким наздравуваше за здравјето на Путин, победата на големата Русија и корејско-руското пријателство пророкувајќи ја победата на Москва во светата битка со Западот во војната во Украина.

„Цврсто верувам дека херојската руска армија и народот брилијантно ќе ги наследат нивните победи и традиции и решително ќе го докажат своето благородно достоинство и чест на двата фронта на воените операции и градењето силна нација“, рече Ким.

„Руската армија и народот сигурно ќе извојуваат голема победа во светата борба за казнување на големото зло што сака хегемонија и се храни со експанзионистичката илузија“, додаде тој.

САД и Јужна Кореја изразија загриженост дека Ким би можел да ѝ продаде оружје и муниција на Русија. Москва и Пјонгјанг го негираат ова. Путин постојано укажуваше дека се разговарало за воена соработка, но не навлегува во детали. На разговорите присуствуваше и министерот за одбрана, Сергеј Шојгу. Кремљ објави дека чувствителните прашања меѓу соседите се приватна работа.

На прашањето на руските медиуми дали Москва ќе му помогне на Ким да изгради сателити, Путин рече: „Затоа дојдовме овде“.

Вашингтон предупреди дека ќе воведе дополнителни санкции поради продажбата на оружје меѓу Русија и Северна Кореја велејќи дека Путин го моли Ким за помош по претрпените големи загуби во Украина.

Генералниот секретар на ОН, Антонио Гутереш, изјави дека Москва мора да биде внимателна во однос на санкциите воведени кон Северна Кореја. Путин рече дека Ким планира да ги посети фабриките за воени и цивилни авиони во Комсомолск на Амур и да изврши инспекција на руската Пацифичка флота во Владивосток. Лавров ќе го посети и Пјонгјанг следниот месец, соопшти Кремљ.