Свет
Расте бројот на престрелки во Шведска и покрај акциите против насилството и пандемијата

Бројот на престрелки се зголемува во Шведска и покрај националните напори да се спречи насилството меѓу бандите во екот на епидемијата на коронавирусот, пренесува СВТ.
Иако од 1 јануари до 15 април годинава се застрелани вкупно 15 лица во земјата со над 10 милиони жотели, што е целосно споредливо со истиот период лани, вкупниот број на престрелки и повредени, 86 и 32, се зголемил.
Овој неповолен тренд продолжува и покрај националната кампања за спречување на насилството меѓу бандите – во тек е операцијата „Харфрост“. Нејзината цел е да се намали насилството со ставање на криминалните банди под притисок.
„Можам со сигурност да кажам дека спречивме сериозни насилнички злосторства, затоа велам дека го намаливме смртоносното насилство“, вели Стефан Хектор, национален командант на операцијата „Харфрост“, за СВТ.
За време на операцијата „Харфрост“, што критичарите ја нарекоа „операција Снегулка“, полицијата спроведе стотици претреси во куќи, заплени 545 парчиња оружја, 100 кг експлозив, 2,3 милиона шведски круни во готово (околу 200.000 долари) и уапси повеќе од 200 лица за разни кривични дела.
Полицијата исто така посочи дека епидемија на коронавирусот, спротивно на очекувањата на некои луѓе, немала големо влијание врз криминалот. Ова веројатно се должи на фактот дека Шведска, за разлика од повеќето европски нации, не воведе режим на ограничено движење.
Дури и протокот на дрога не е нарушен во голема мера, вели полицијата. Сепак, сè уште постои ризик дека намалениот пристап до дрога може да го зголеми насилството.
„Видовме дека во случаи кога снабдувањето со дрога се намалува, стануваме сведоци на изнудувањето како метод за добивање пари во криминалната средина. И тоа обично се спроведува преку насилство“, рече Хектор.
Во последните години бомбардирањата и пукањата толку редовно го нарушуваа мирот на најголемите градови во земјата, како Стокхолм, Гетеборг и Малме, што локалното население се навикнало на тоа.
Дури и шефот на шведската полиција, Андерс Торнберг, насилството меѓу бандитего нарече „ново нормално“ и им рече на своите сонародници да се навикнат на тоа. Според него, смртоносните престрелки се тесно поврзани со трговијата со дрога.
Една студија од 2018 година покажа дека ризикот да станете жртва на насилство од огнено оружје е зголемен петпати од 1996 година, а вината се префрла на недоволните напори за спречување на криминалот. Истата студија заклучи дека стапката на насилство со огнено оружје во Шведска е 10 пати поголема отколку во Германија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Дописник на Би-би-си: Заборавете на Томахавките, состанокот Трамп-Путин е ладен туш за Украинците

Доналд Трамп повторно се обидува да ги комбинира дипломатијата и политиката на моќ – овој пат помеѓу Москва и Киев.
Само неколку часа пред планираната средба со украинскиот претседател Володимир Зеленски, американскиот претседател му се јави на Владимир Путин, што предизвика загриженост и сомнеж во Киев за американските намери.
Трамп му рече на Путин дека наскоро ќе следи состанок на високи американски и руски претставници, по што ќе следи нова средба во Будимпешта.
Двајцата претседатели последен пат се сретнаа во Алјаска во август. Портпаролката на Белата куќа, Каролин Ливит, изјави дека Трамп „верува дека е сè уште можно“ да ги донесе Путин и Зеленски на иста маса, но нема планови украинскиот претседател да се придружи на самитот.
Вашингтон, исто така, разгледува дали Украина може да добие крстосувачки ракети Томахавки, но набљудувачите веруваат дека таквата одлука би била тешко да се донесе во време кога САД се обидуваат да отворат нов канал кон Москва.
„Трамп се врати на идејата за прекин на огнот од самитот во Алјаска, сега со надеж дека крајот на војната во Газа би можел да поттикне и мир во Украина“, пишува дописникот на „Скај њуз“ од САД, Дејвид Блевинс.
Би-би-си: Ова е политички ладен туш
Сепак, во Киев тоа е ладен туш. Дописникот на Би-би-си, Џон Садворт, вели дека повикот на Трамп до Путин, за кој Кремљ тврди дека е инициран од Русија, „нема да биде сфатен како добар знак“ во Украина.
Пред неговото патување во Вашингтон, помошниците на Володимир Зеленски рекоа дека забележале промена во тонот во Белата куќа – тие верувале дека Трамп почнува да „го гледа светот низ нивните очи“. Тие се надевале дека оваа недела ќе биде моментот кога тој ќе добие одобрение за испорака на американските ракети Томахавк и можност за удар подлабоко на руска територија.
Наместо тоа, пишува дописникот на Би-би-си во Киев, Путин е награден со уште еден состанок со американскиот претседател. „Заборавете ги Томахавките – ова изгледа како политички ладен туш“, заклучува Садворт.
Свет
Путин до Западот: Купија билет и не патуваа, само за да се налутат на кондуктерот: рускиот енергетски систем работи беспрекорно

Рускиот претседател Владимир Путин изјави дека одбивањето на европските земји да се потпираат на руските енергетски ресурси сериозно ја поткопа конкурентноста на нивните економии и доведе до пад на индустриското производство и пораст на цените низ целиот континент.
Зборувајќи на пленарната сесија на Руската недела на енергија во Москва, Путин истакна дека постапките на западните политички елити „ја уништија глобалната енергетска инфраструктура“, нагласувајќи дека политичкиот притисок довел до ирационални одлуки во ЕУ, според западните медиуми.
„Многу европски земји, под политички притисок, одбија да купуваат руски енергетски производи. Веќе неколку пати предупредив за последиците – не за Русија, туку за самите тие земји. Гледаме пад на индустриската активност и пораст на цените поради поскапата нафта и гас од странство“, рече Путин.
Тој додаде дека, по забраната за соработка со Русија, западните компании почнаа да ја губат својата технолошка предност и да го намалуваат производството, додека руските експерти станаа „технолошки лидери“ на пазарот.
„Што направија? Купија билет и не патуваа – само за да се налутат на кондуктерот. Каква глупост.
Нашиот енергетски систем е еден од најголемите во светот. Овој огромен комплекс работи сигурно и ефикасно“, заклучи претседателот на Русија.
Свет
Кремљ: Путин го предупреди Трамп за време на разговорот

Во денешниот телефонски разговор, рускиот претседател Владимир Путин го предупреди американскиот претседател Доналд Трамп дека испраќањето крстосувачки ракети „Томахавк“ во Украина ќе го загрози мировниот процес и ќе им наштети на односите меѓу САД и Русија. Веста беше потврдена од Кремљ во официјално соопштение, пренесуваат медиумите во регионот.
Според Кремљ, Путин изразил загриженост поради можноста напредното американско оружје во рацете на украинските сили да доведе до понатамошна ескалација на конфликтот. Предупредувањето јасно посочи дека таков потег од страна на Вашингтон би имал директни негативни последици врз билатералните односи на двете сили.
Советникот на Путин, Јуриј Ушаков, им изјави на новинарите дека Путин во разговорот нагласил дека руските сили во моментов имаат „целосна стратешка иницијатива“ по целата линија на фронтот во Украина.
Ушаков додаде дека денешниот повик, кој траел речиси два и пол часа, бил инициран од руска страна. Тој, исто така, објави дека на планираниот нов самит меѓу двајцата претседатели ќе му претходи разговор меѓу државниот секретар на САД, Марко Рубио, и рускиот министер за надворешни работи, Сергеј Лавров, кој се очекува да се одржи во наредните денови, пренесува index.hr.
Фото: принтскрин