Свет
Расте кризата во ОН поради неиздавањето американски визи за руски делегати

САД продолжуваат да не издаваат визи за руските делегати кои планираат да учествуваат во настани на ОН или да работат во Руската мисија во Обединетите нации, изјави заменикот на постојаниот претставник на Русија во ОН, Генадиј Кузмин, на седницата на Комитетот на ОН за односи со земјата домаќин во вторникот, пренесува ТАСС.
„Кризата со неиздавањете визи за претставниците на земјите членки само расте. САД не им издаваат визи на руските делегати кои би требало да работат во руската мисија. Визите на дипломати кои веќе работат во мисијата не се продолжуваат. Руските граѓани кои биле избрани да работат во Секретаријатот на ОН не добиваат визи. Оваа политика, исто така, влијае и на другите земји“, вели Кузмин.
Претходно во февруари шефот на руската делегација на сесијата на Комисијата за разоружување на ОН, Константин Воронцов, не доби американска виза навреме, а седницата беше одложена за 10 дена.
„Денес не би сакале да продолжиме со бесмислени разговори туку би сакале да работиме на решавање на проблемот“, рече Кузмин.
„Прво сакам да го прашам американскиот претставник дали ќе бидат издадени бараните визи. Дали Константин Воронцов ќе добие виза како што требаше за да пристигне во ОН на 17 февруари, а седницата на Комисијата за разоружување беше одложена поради ова отсуство? Дали Воронцов ќе добие виза за да учествува на седницата на 28 февруари?“, праша тој.
Од почетокот на 74. седница на Генералното собрание на ОН на повеќе од 20 руски делегати не им се издадени визи за САД. Во декември 2019 година ГС на ОН ги повика САД навреме да издаваат визи за делегатите од неколку земји, вклучително и Русија, Иран и Венецуела.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Кремљ: Ги поддржуваме мировните напори на Трамп, но ги отфрламе гаранциите на ЕУ за Украина

Кремљ на денешниот редовен брифинг за медиумите изјави дека ги смета напорите на САД за постигнување мир во Украина за „многу важни“ и дека тие би можеле да помогнат во решавањето на долготрајниот конфликт. Сепак, портпаролот Дмитриј Песков јасно стави до знаење дека Москва има негативен став кон европските предлози за безбедносни гаранции за Украина.
Песков го повтори долгогодишниот став на Русија дека не треба да има распоредени трупи од земјите-членки на НАТО на украинска територија. На прашањето за можни мировни разговори на високо ниво, тој рече дека ваквите состаноци мора внимателно да се подготвуваат за да бидат ефикасни.
По извештаите дека руските напади во текот на ноќта биле насочени кон украинската енергетска инфраструктура, Песков рече дека Русија ги таргетирала само воените и воено поврзаните цели.
Песков, исто така, објави дека се во тек интензивни подготовки за претстојната посета на рускиот претседател Владимир Путин на Кина.
Путин ќе присуствува на самитот на Шангајската организација за соработка, кој ќе се одржи од 31 август до 1 септември во кинескиот пристанишен град Тјенџин. Според Песков, на самитот ќе учествуваат повеќе од 20 светски лидери.
Потоа, Путин ќе го посети Владивосток, голем руски пристанишен град во близина на кинеската и севернокорејската граница, на 5 септември.
фото: принтскрин
Свет
Папата апелира за траен прекин на огнот во Газа и ослободување на заложниците

Папата денес упати силен апел до глобалната заедница да го прекине речиси двегодишниот конфликт меѓу Израел и Хамас повикувајќи на траен прекин на огнот, ослободување на заложниците во Газа и обезбедување хуманитарна помош.
„Уште еднаш упатувам силен апел да се прекине конфликтот во светата земја, кој предизвика толку многу терор, уништување и смрт“, рече папата на својата неделна аудиенција во Ватикан.
„Барам ослободување на сите заложници, постигнување траен прекин на огнот, олеснување безбеден влез на хуманитарна помош и целосно почитување на меѓународното хуманитарно право“, рече тој.
Папата не ги именува Израел или палестинската милитантна група Хамас, но рече дека меѓународното право бара „обврска за заштита на цивилите, забрана за колективно казнување, неселективна употреба на сила и присилно раселување на населението“.
Фото: принтскрин
Свет
Стаб: Само притисок може да ја принуди Русија да преговара

Финскиот претседател Александар Стаб изјави дека е потребно да се изврши силен притисок врз Русија за да се постигне напредок во наоѓањето мирно решение за конфликтот во Украина.
По телефонскиот разговор со украинскиот претседател Володимир Зеленски, Стаб напиша на социјалната мрежа X дека „се спроведува планот за сигурна поддршка на безбедноста на Украина“ нагласувајќи дека Киев е подготвен за мир, а „Русија само чека време“.
„Мора да извршиме притисок врз Русија да седне на преговарачка маса“, рече финскиот претседател додавајќи дека Хелсинки, заедно со своите партнери, ќе продолжи да се стреми кон „праведен мир за Украина“.
Еден ден претходно Стаб истакна дека рускиот претседател Владимир Путин не може да биде убеден во мирот преку Западот, туку преку влијанието на земјите од Истокот, кои одржуваат трговски врски со Москва. Затоа предложи воведување тарифи против земјите што ја продолжуваат економската соработка со Русија.
Финскиот претседател исто така изрази надеж дека „трпението на американскиот претседател Доналд Трамп со Москва набргу ќе истече“ нагласувајќи дека само нови санкции и царини може да ја принудат Русија да го прекине конфликтот.
Фото: принтскрин