Од мистериозни исчезнувања на авиони до морничави бродови без екипаж, Бермудскиот Триаголник со децении го освојуваше вниманието како место на некои од најнеобичните феномени на Земјата. Сега еден научник тврди дека конечно пронашол рационално објаснување за мистеријата што го мачи светот повеќе од еден век.

Триаголникот помеѓу Флорида, Порторико и Бермуда е познат по многубројни фатални несреќи, што предизвика многубројни теории за паранормалното. Но д-р Сајмон Боксал, океанограф на Универзитетот во Саутемптон, верува дека одговорот не лежи во вонземјаните или фантастичните димензии, пишува „Дејли мејл“. Според него, причината за исчезнувањата во областа се таканаречените џиновски бранови.

Овие ненадејни, огромни бранови – познати и како екстремни бури – може да бидат двојно повисоки од околните бранови и да достигнат висина до 30 метри. Не само што се екстремно стрмни туку често доаѓаат од неочекувани насоки, без оглед на преовладувачкиот ветер.

Д-р Боксал тврди дека брод заглавен на патот на таков бран би можел да потоне за неколку минути. Мистеријата на Бермудскиот Триаголник доби посебен замав по исчезнувањето на американскиот брод USS Cyclops во 1918 година. Овој голем носач на јаглен, кој служел како брод за снабдување на морнарицата за време на Првата светска војна, исчезнал без трага или сигнал за помош додека пловел од Бразил кон Соединетите Американски Држави. И покрај обемното пребарување, бродот долг 165 метри и неговите 306 члена на екипажот никогаш не биле пронајдени. Се развиле многу теории за таквото ненадејно исчезнување, од вонземјани до временски дупки. Сепак, д-р Боксал верува дека Cyclops веројатно настрадал од разорен џиновски бран.

Во документарецот „Мистеријата на Бермудскиот Триаголник“ тој објаснува дека областа е особено склона кон вакви бранови поради судирот на бури од север и од југ, со дополнителни временски нарушувања од областа на Флорида. Тој и неговиот тим изградија намален модел на USS Cyclops за да тестираат како би се однесувал во услови на џиновски бран. Се покажа дека поради неговото рамно дно и големата маса бродот бргу бил преплавен.

Боксал продолжува да објаснува дека бранот може да биде толку стрмен што бродот би останал заглавен помеѓу два врва на брановите, со неговиот труп изложен и неподдржан во средината. Во таква ситуација,ж бродот би можел да се скрши на половина. „Овие бранови се неверојатно стрмни и високи – некои се евидентирани и над 30 метри“, рече Боксал. „Ако бродот наиде на ваков бран, може да потоне во рок од две до три минути“. Тоа исто така би објаснило зошто многу бродови и авиони никогаш немале време да повикаат помош – тие, едноставно, би исчезнале без предупредување. „Колку е поголем бродот, толку се поразорни последиците“, додава Боксал.

И покрај неговите тврдења, некои научници не го сметаат Бермудскиот Триаголник за нешто посебно. Многу истражувачи истакнуваат дека бројот на несреќи во областа не е поголем отколку во другите делови од океанот со густ сообраќај.

Националната океанска и атмосферска администрација на САД (NOAA) наведува: „Нема докази дека Бермудскиот Триаголник доживува повеќе необјаснети исчезнувања отколку другите големи и прометни делови од океанот“. Исто така, податоците од британската осигурителна компанија „Лојдс од Лондон“ покажуваат дека стапката на загуби на бродови во Бермудскиот Триаголник е во согласност со глобалниот просек. Инцидентите што се случуваат обично може да се припишат на природни феномени, како што се џиновските бранови, или, едноставно, на фактот дека пловидбата во Карипското Море е исклучително тешка. NOAA додава: „Факторите на животната средина би можеле да ги објаснат повеќето, ако не и сите, исчезнувања. Големиот број острови во Карипското Море создава многубројни плитки области, што претставуваат сериозен ризик за морскиот сообраќај“.

фото: принтскрин

Министерот за финансии на Соединетите Американски Држави, Скот Бесент, изјави дека приходите од царините, кои постепено ги воведува претседателот на оваа земја, Доналд Трамп, би можеле да достигнат 500 милијарди долари годишно.

Вчера, на состанок на кабинетот во Белата куќа, Бесент рече дека неговата претходна процена за годишни приходи од 300 милијарди долари е прениска, објави „Ројтерс“.

„Имавме значителен скок од јули до август, а мислам дека ќе видиме уште поголем скок од август до септември. Оваа администрација забележа значително намалување на буџетскиот дефицит“, рече тој.

Приходите од царините би го компензирале зголемувањето на буџетскиот дефицит предизвикано од намалувањето на даноците и законот за трошоци, кој републиканците го усвоија оваа година.

Бесент во понеделникот изјави дека американската влада собрала 29,6 милијарди долари од царинење во текот на август.

Тој додаде дека Канцеларијата за буџет на Конгресот (CBO) ја ревидирала процената на федералните приходи од царините на Трамп и предвидела дека тие би можеле значително да го намалат буџетскиот дефицит.

Токио забележа рекордни 10 последователни дена со температури од најмалку 35 Целзиусови степени. Цела Јапонија ги доживеа своите најжешки јуни и јули досега. Топлотните бранови стануваат сè поинтензивни и почести во целиот свет поради климатските промени предизвикани од човекот, велат научниците, а Јапонија не е исклучок.

„Ова е првпат откога почнаа набљудувањата во 1875 година да се забележи таква серија високи температури“, соопшти Јапонската метеоролошка агенција. Од друга страна, град на островот Хокаидо беше преплавен со рекордни врнежи од дожд во вторникот, објави „Јапонија тајмс“.

Јапонија ги имаше најжешките јуни и јули откога почнаа да се водат евиденции, а во август земјата ја забележа највисоката температура досега. Живата достигна 41,8°C во градот Исесаки, префектурата Гунма.

Јапонските власти ги повикуваат граѓаните да останат во затворени и климатизирани простории во текот на летото за да избегнат топлотен удар. Постарите лица во Јапонија, која има второ најстаро население во светот по Монако, се особено ранливи. Повеќе од 8.400 луѓе беа хоспитализирани во Јапонија минатата недела, а 12 починаа.

Минатогодишното јапонско лето беше најжешкото досега изедначувајќи се со 2023 година, а по него следуваше најтоплата есен откога почнаа евиденциите пред 126 години. Експертите предупредуваат дека омилените цветови на цреши во Јапонија цветаат сè порано поради потоплата клима или понекогаш воопшто не цветаат бидејќи веќе во есен и во зима не е доволно ладно за да се поттикне цветањето.

Познатата снежна капа на планината Фуџи беше отсутна најдолго време досега минатата година појавувајќи се само на почетокот на ноември во споредба со просекот од почетокот на октомври. Од сите континенти, Европа доживеа најбрзо затоплување по деценија од 1990 година, веднаш по неа следува

Азија.

Фото: прнтскрин