Европа има два месеца да преговара за олеснување на санкциите за Техеран, во спротивно Иран ќе ја иницира „фазата 3“ за повлекување од обврските од нуклеарниот договор од 2015 година, рече иранскиот претседател Хасан Рохани, пренесува РТ.

„Европа има уште два месеца рок за преговори, спогодби и враќање на своите обврски“, предупреди Рохани на состанокот на кабинетот.

Техеран ја повика ЕУ да му обезбеди ослободување од строгите санкции што ги воведе Вашингтон кога САД еднострано го напуштија договорот од 2015 година, познат како ЈЦПОА. Иранските власти предупредија дека постепено ќе ги намалуваат обврските од договорот ако тоа не се случи.

Во почетокот на јули Иран ја активира првата фаза на оваа стратегија со зголемување на резервите од збогатен ураниум над ограничувањето од 300 килограми, наметнато од ЈЦПОА. Втората фаза, збогатување на ураниум над 3,66 отсто, беше реализирана набргу потоа.

Рохани не прецизира кој ќе биде следниот чекор, но навести дека тоа ќе игра важна улога во трансформацијата на нуклеарната програма на нацијата.

„Третиот чекор е од исклучително важна природа и значително ќе ги забрза активностите за нуклеарната енергетска организација на земјата“, рече тој.

Рохани истакна дека влијанието на овој потег ќе биде исклучително огромно.

Франција претходно предложи да му се понуди на Иран 15 милијарди долари кредитни линии ако во целост се врати во согласност со JЦПOA. Овој потег ќе му помогне на Иран да ги неутрализира санкциите на САД, кои беа насочени кон неговата трговија со нафта и кон финансискиот сектор.

Заменик-министерот за надворешни работи на Иран, Абас Аракчи, потврди дека земјата ќе се врати на договорот ако ЕУ продолжи да купува нафта од Иран или ако обезбеди соодветна кредитна линија.

Вашингтон инсистира дека санкциите се неопходни за да се изврши притисок врз Иран да ги затвори своите нуклеарни и балистички ракетни програми, како и да ги прекине врските со неколку милитантни групи на Блискиот Исток. Меѓутоа, Техеран негира какво било дело и тврди дека санкциите се неоправдани и незаконски според меѓународното право.