Свет
Русија објави планови за ракети кои би можеле да изведат нуклеарен напад врз САД

Русија планира најдоцна до есен да ја распореди првата воена единица вооружена со нуклеарни балистички ракети „Сармат“, изјави денеска генералниот директор на руската вселенска агенција Роскосмос, Дмитриј Рогозин.
Единицата ќе биде сместена во Ужур, во областа Краснојарск, на околу 3.000 километри источно од Москва. Се вели дека балистичките ракети се способни за нуклеарни напади врз САД.
Рогозин претходно објави видео на платформата Телеграм, на кое се гледа колку побрзо по лансирањето интерконтиненталната балистичка ракета „Сармат“ ја зголемува својата брзина во однос на својот претходник „Војвода“.
На видеото се гледа излезот на возилото со проектили, истрелувањето на ракетите и првите неколку секунди по лансирањето на старите и новите ракети.
Се наведува дека во споредба со „Војвода“, „Сармат“ може да погодува цели на практично неограничени растојанија, пренесува Танјуг.
Русија во средата објави дека ја тестирала интерконтиненталната балистичка ракета РС-28 Сармат, нов додаток на нејзиниот нуклеарен арсенал, за кој претседателот Владимир Путин рече дека ќе им даде на непријателите на Москва храна за размислување.
Нејзиниот прекар е син на Сатана, а Русите тврдат дека тој може да ја избрише Франција од лицето на земјата.
„Сармат“ е нова тешка интерконтинентална балистичка ракета и се очекува Русија да ја опреми секоја со десет или повеќе боеви глави, соопшти Истражувачката служба на американскиот Конгрес.
Ракетата се развива со години и нејзиното пробно лансирање не е изненадување за Западот, но се случи во време на екстремни геополитички тензии поради руската војна во Украина и секако претставува не само демонстрација на моќта на Русија, туку и закана за Западот.
Во секој случај, ова е најмоќната ракета што Путин сега ќе ја има на располагање, а тоа и самиот јасно го кажа по лансирањето.
– Новиот комплекс има највисоки тактичко-технички карактеристики и е способен да ги совлада сите современи средства за противракетна одбрана. Слични нема во светот и нема да има уште долго време – рече Путин.
„Ова навистина уникатно оружје ќе го зајакне борбениот потенцијал на нашите вооружени сили, сигурно ќе ја гарантира безбедноста на Русија од надворешни закани и ќе ги натера да размислуваат оние кои во жарот на бесната агресивна реторика се обидуваат да ја загрозат нашата земја“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) „Таа е неверојатна, ама не сакам да влезам во неволја“- Трамп за сопругата на британскиот премиер

Американскиот претседател Доналд Трамп упати пофалби за Викторија Стармер, сопругата на британскиот премиер Кир Стармер, за време на средбата на двајцата државници во Тернбери, Шкотска.
Иако звукот од гајдите го надвладеа Трамп, се слушна како американскиот претседател вели: „Сакаме да го усреќиме премиерот.“
Говорејќи за Викторија Стармер, Трамп додаде:
„Таа е почитувана личност низ целите Соединети Американски Држави. Не знам што работи тој, но таа е многу почитувана, подеднакво почитувана како и тој. Не сакам да кажам повеќе, ќе влезам во неволја. Но, таа е многу, таа е прекрасна жена и многу е почитувана“, пренесува Express.
🚨🇬🇧🇺🇸 Trump welcomes Britains most hated Prime Minister ever & all round Global Communist Keir Starmer along with his estranged Wife to his Residence in Turnberry, Scotland pic.twitter.com/3T9a4oB4hh
— Concerned Citizen (@BGatesIsaPyscho) July 28, 2025
По долгиот разговор помеѓу премиерот и претседателот на врвот од скалите, Трамп се сврти да одговори на новинарските прашања додека гајдите продолжија да свират гласно.
Меѓу другото, едно прашање се однесуваше на царините на виски.
„Ќе разговараме за тоа, не знаев дека вискито е проблем. Не сум голем љубител на виски, но можеби треба да бидам“, рече Трамп.
За време на кратката средба пред официјалниот разговор, лидерите се осврнаа на теми од нелегална миграција до војната во Газа.
Свет
Американскиот потпретседател: Бајден, Обама и Буш го прикриваа случајот Епштајн

Американскиот потпретседател Џеј Ди Венс денес изјави дека претседателот Доналд Трамп сака целосна транспарентност во случајот со Џефри Епштајн.
Тој додаде дека поранешните претседатели Џо Бајден, Барак Обама и Џорџ В. Буш „го прикриле овој случај“.
„Претседателот (Трамп) му наложи на државниот обвинител да ги објави сите веродостојни информации и, искрено, да пронајде дополнителни веродостојни информации поврзани со случајот Џефри Епштајн. Тој е неверојатно транспарентен во врска со овие работи, но дел од тоа бара време“, изјави Венс при обраќање во Кантон, Охајо, пренесува „Си-ен-ен“.
Венс додаде дека „постојано“ е во контакт со државната обвинителка Пем Бонди, која во моментов, како што рече, „вредно работи на ова прашање“.
Тој посочи дека администрациите на Обама и Буш биле „млаки“ во однос на Епштајн, кого го нарече посрамен финансиски магнат и „педофилски олош“.
„Ниту целосно го истражија случајот, ниту покажаа некакво вистинско интересирање за него, а сега Доналд Трамп бара од своето Министерство за правда да покаже целосна транспарентност – и некако тоа станува критика за Трамп, наместо за Обама и Буш“, рече Венс.
Во времето на администрацијата на Буш, американскиот обвинител Алекс Акоста – кој подоцна служеше и во првата администрација на Трамп како министер за труд – одби да го гони Епштајн, што му овозможи да избегне федерални обвиненија.
Свет
Трамп тврди: Моето претседателство спречи шест големи војни

Американскиот претседател, Доналд Трамп, изјави дека неговото присуство во Белата куќа, односно тоа што е на позицијата претседател на САД, спречило избувнување на шест големи војни низ целиот свет, вклучувајќи и потенцијален вооружен конфликт меѓу Индија и Пакистан.
„Да не бев тука, ќе имавте шест големи војни во моментов. Индија ќе се бореше против Пакистан“, рече Трамп во Шкотска, пред средбата со британскиот премиер Кир Стармер, тврдејќи дека неговата администрација одиграла клучна улога во деескалацијата на кризите во неколку глобални жаришта, пишува Гардијан.
Како пример, тој го наведе спорот меѓу Тајланд и Камбоџа, за кој посочи дека благодарение на неговата интервенција, вклучително и заканата за прекин на трговските преговори, е постигнато примирје.
Трамп, исто така, посочи на придонесот на неговата администрација за намалување на тензиите и поддршка на мировните напори меѓу Руанда и Демократска Република Конго.