Украинскиот претседател, Володимир Зеленски, пристигна во Париз во пресрет на европскиот самит за Украина, кој е закажан за утре, потврди неговиот портпарол.

Францускиот претседател Емануел Макрон го пречека Зеленски во Елисејската палата, а се очекува да остварат средба во текот на денот.

Макрон утре ќе биде домаќин на група европски лидери за да разговараат за Украина и безбедноста во Европа.

Овој самит е продолжение на собирите на Макрон на европските и НАТО лидерите во февруари и март, каде што тие разговараа за безбедносните гаранции за Украина.

Официјални лица претходно најавија дека на состанокот ќе се разговара за низа теми, вклучително и како дополнително да се зајакнат воените капацитети на Украина за да се одвратат идните напади и како да се следат ограничените прекини на огнот поврзани со поморските цели и енергетската инфраструктура.

Претседателот на Република Српска, Милорад Додик, кој престојува во Израел и покрај потерницата што е распишана по него во БиХ, изјави дека, иако се соочува со кривично гонење, нема да се откаже од својата политика.

Во интервју за новинската агенција Jewish News Syndicate (JNS), објавено денеска, Додик ја спореди својата ситуација со онаа на израелскиот премиер Бенјамин Нетанјаху, кој исто така е под истрага во својата земја.

– Политички суд носи политички пресуди, изјави Додик, тврдејќи дека со злоупотреба на правосудниот систем се обидуваат да го тргнат од политиката.

Додик е неправосилно осуден на една година затвор од Судот на БиХ затоа што потпишал указ за стапување во сила на закони што претходно ги поништи високиот претставник на меѓународната заедница. Дополнително, против него се води нова истрага за загрозување на уставниот поредок, за што му се заканува казна од најмалку пет години затвор.

– Нема да се повлечам. Одам напред, одам во Израел, кај пријатели, и секаде ќе ги бранам интересите на луѓето што ме избрале, изјави тој.

Додик тврди дека Србите во БиХ се единствените вистински пријатели на Евреите, додека во „муслиманскиот дел“ на земјата се слават Хамас и Исламска држава.

Во изјава за медиумите во Република Српска тој додаде: „Кај дел од радикалните муслимани постои нагон за одмазда… Некои не сакаат мир, туку сакаат смрт. Ние мора да бидеме свесни за тоа

Украинците објавија дека имало излевање гориво во нуклеарната централа Запорожје. Управата на електраната која ја постави Русија, ги отфрли тврдењата, нарекувајќи ги лажни.

Претходно Украина ја обвини Москва дека не е способна да управува со безбедноста на електраната, повикувајќи се на наводи за големо излевање на гориво.

„Тоа гориво беше доволно за напојување на генераторите за итни случаи на електраната дури 25 дена“, рече портпаролот на украинското Министерство за надворешни работи Хеорхи Тихи.

Тој не откри од каде се овие извештаи, ниту кога и како настанала штетата, туку само рече дека сето тоа е директна последица на неодговорната замена на лиценцираните украински експерти со руски персонал.

Минатата недела, актуелниот американски претседател Доналд Трамп сугерираше дека САД би можеле да помогнат во управувањето, па дури и евентуално поседување на украинските нуклеарни централи. Сепак, Володимир Зеленски рече дека не е разговарано за сопственоста и јасно ја отфрли таквата можност.