Свет
Русија прва во светот регистрира вакцина против коронавирусот за животни
Првата вакцина против коронавирус за животни е регистрирана во Русија, изјави денеска заменик-директорот на Федералната служба за ветеринарен и фитосанитарен надзор на Русија, Константин Савенков, најавувајќи дека нејзиното масовно производство може да почне веќе во април.
„Вакцината ‘карнивак-ков’, која е изработена од Федералниот центар за здравје на животните, е регистрирана во Русија. Таа е прва во светот против Ковид-19 за животни“, рече Савенков.
Клиничките испитувања на „карнивак-ков“, кои почнале во октомври минатата година, биле извршени врз кучиња, мачки, лисици и други животни.
„Резултатите од истражувањето ни овозможуваат да заклучиме дека вакцината е безопасна и високоимуногена бидејќи 100 проценти од вакцинираните животни имаат развиено антитела на коронавирусот“, нагласи Савенков.
Во моментот научниците продолжуваат да истражуваат колку долго се развива имунитетот по вакцинацијата, а Савенков вели дека во моментот овој индикатор е најмалку шест месеци.
Тој посочи дека и други земји се заинтересирани за оваа вакцина, вклучувајќи ги Грција, Полска, Австрија, САД, Канада и Сингапур. Савенков посочи дека вакцината е од особено значење бидејќи некои животински видови се чувствителни на коронавирусот, а случаи на Ковид-19 кај животни се регистрирани во многу земји.
До денес официјално се идентификувани два случаја на зараза на мачки во Москва и Тјумен. Според руските научници, употребата на вакцината за животни може да спречи развој на мутации на вирусот, кои најчесто се јавуваат при пренесување патогени микроорганизми помеѓу видовите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Судир помеѓу автобус полн со ученици и автомобил: има загинати и повредени во Италија
Во сообраќајна несреќа во која учествувале автобус со 50 студенти и автомобил што преминал во спротивната лента, едно лице загинало, а 15 се повредени утрово во италијанската покраина Тревизо, објавува RAI денес.
Несреќата се случила во 7:45 часот наутро, а по судирот, двете возила завршиле во канал покрај патот.
Поради силата на ударот, возачот на автомобилот починал на лице место, а патниците во автобусот се здобиле со полесни повреди.
Возачот на автобусот и петте повредени студенти се префрлени во болница на лекување и прегледи.
Автобусот со студенти тргнувал од Сан Дона ди Пјаве во близина на Венеција, а несреќата се случила веднаш откако возилото поминало остра кривина, кога автомобил што доаѓал од спротивната насока преминал во спротивната лента.
Возачот се обидел да го избегне судирот, но не успеал, а двете возила завршиле во канал од патот на спротивните страни.
Карабинерите во моментов ги истражуваат околностите на несреќата.
Фото: принтскрин
Свет
Трамп: Не ми е дозволено да се кандидирам за трет мандат, што е тажно
Американскиот претседател Доналд Трамп денес изјави дека не му е дозволено да се кандидира за трет мандат признавајќи ги ограничувањата утврдени во Уставот на САД, објави АФП.
Трамп и неговите поддржувачи постојано го иницираат прашањето за кандидатурата на 79-годишниот лидер во 2028 година, што предизвика загриженост кај неговите противници и радост кај поддржувачите, забележува агенцијата.
„Имам највисок рејтинг на одобрување досега и, знаете, врз основа на она што го читам, претпоставувам дека не ми е дозволено да се кандидирам, па ќе видиме што ќе се случи… Тоа е многу жално“, рече Трамп во авионот „ер форс уан“.
Уставот на САД ги ограничува претседателите на два мандата, а Трамп го почна својот втор мандат во јануари.
Трамп честопати забележуваше дека неговите поддржувачи го поттикнуваат да владее и по сегашниот мандат и покрај уставните ограничувања. Неодамна дури и ги покажа познатите црвени капи во Овалната соба, но со зборовите „Трамп 2028“ напишани на нив.
Обновените разговори за трет мандат доаѓаат откако Стив Бенон, поранешниот главен стратег на Трамп и клучен идеолог на неговото движење „Да ја направиме Америка повторно голема“, минатата недела изјави дека постои план претседателот да остане во Белата куќа.
„Тој ќе има трет мандат… Трамп ќе биде претседател во 2028 година. И луѓето, едноставно, ќе мора да го прифатат тоа“, изјави Банон за „Економист“.
Запрашан за 22. амандман, кој го ограничува бројот на мандати, Банон рече: „Постојат многу алтернативи. Во соодветно време ние ќе го изложиме планот“.
Свет
Саркози под закана и зад решетки: затворениците сакаат одмазда за Гадафи
Поранешниот француски претседател Никола Саркози, кој моментно издржува затворска казна, продолжува симболично да ја претставува својата земја – дури и зад решетки. Како што објави порталот „Атлантико“, неодамнешните закани од одредени затвореници за одмазда за Моамер Гадафи покажуваат колку е длабок јазот помеѓу француското општество и дел од мигрантското население.
Според анализата на француските новинари, случајот открива отворен презир кон државата што примила многу од овие луѓе и им обезбедила нов живот. „Постои јасна врска помеѓу фактот дека криминалецот не ги признава законите на земјата што го посвоила и фактот дека покажува поголема лојалност кон либискиот диктатор Моамер Гадафи отколку кон поранешниот шеф на француската држава“, наведува „Атлантико“.
Авторите на текстот предупредуваат дека станува збор за поширок проблем – отфрлање на француските вредности и правила како наводна форма на потчинување, а колонијалното минато се користи како постојан изговор за одбивање интеграцијата и повикување на одмазда.
„Би било погрешно да се минимизира значењето на она што се случува“, истакнуваат француските коментатори заклучувајќи дека овој случај е само еден во низата индикатори за длабока криза на идентитетот и социјалната кохезија во современа Франција.
Фото: принтскрин

