Свет
Русија прогласена за виновна за соборувањето на патничкиот авион, во кој загинаа 298 луѓе
Советот на Меѓународната организација за цивилно воздухопловство (ICAO) вчера заклучи дека Русија е одговорна за соборувањето на патничкиот авион MH17 во јули 2014 година.
Летот MH17, Боинг 777 на „Малезија ерлајнс“, полета на 17 јули 2014 година од аеродромот „Схипхол“ во Амстердам до Куала Лумпур.
Три часа по полетувањето, тој беше погоден над украинскиот регион Донецк со ракета земја-воздух „Бук“ испукана од проруските сепаратистички сили.
Сите патници и членови на екипажот, вкупно 298 лица, вклучувајќи 196 холандски државјани, загинаа.
Иако Русија никогаш не ја презеде одговорноста за нападот, таа систематски ширеше теории на заговор за да ја префрли одговорноста на други.
Според соопштението на холандското Министерство за надворешни работи, „огромно мнозинство“ од членовите на ICAO гласале во корист на Холандија и Австралија, кои во 2022 година покренаа постапка против Русија пред оваа меѓународна организација.
Во пресудата се наведува дека Русија е „одговорна за соборувањето на летот MH17“ и дека нејзините постапки „ја прекршиле Конвенцијата за меѓународно цивилно воздухопловство.
„Во наредните недели, Советот на ICAO ќе разгледа која форма на репарација е соодветна“, рече холандскиот министер за надворешни работи Каспар Велдкамп. „Во овој контекст, Холандија и Австралија бараат од ICAO да ѝ наложи на Русија да започне преговори со двете земји и да посредува во процесот.“
Семејствата на жртвите од MH17 претходно побараа руското признавање на одговорноста да биде составен дел од секој иден мировен договор за ставање крај на руската инвазија на Украина, потсетува „Европска правда“.
Амбасадорот на Украина во Канада и претставник на Киев во ICAO, Јулија Ковалив, за „Европа правда“ изјави дека оваа одлука претставува „уште еден важен чекор кон одговорност на Русија“.
„Цивилната авијација е болна тема за Русија и ние ќе продолжиме да работиме на тоа да ги повикаме на одговорност сите што ја прекршуваат Конвенцијата, вклучувајќи ги Русија и Иран“, додаде Ковалив.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
САД ги укинаа санкциите за Додик
САД одлучија да ги укинат санкциите за неколку лица од Република Српска, што е поврзано со неофицијален договор меѓу Милорад Додик и новата американска администрација.
Санкциите беа укинати за Милорад Додик, Жељка Цвијановиќ, семејството Додик, нивните компании и многу други блиски соработници.
Во петок, 17 октомври, САД ги укинаа санкциите за четворица блиски соработници на Додик, кои првично беа ставени на црната листа за организирање и промовирање на неуставниот „Ден на РС“. Тие се Јелена Пајиќ Баштинац, Данијела Драгичевиќ, Горан Раковиќ и Дијана Миланковиќ.
Неофицијални извори тврдат дека укинувањето на санкциите е резултат на договор меѓу САД и Додик, според кој Додик морал да ја напушти функцијата претседател на РС по конечната пресуда и да назначи вршител на должноста претседател.
Откако Ана Тришиќ-Бабиќ беше избрана за вршител на должноста претседател на Република Српска, со што се исполни тој дел од договорот, Америка постепено ги укинува санкциите за другите соработници на Додик, а тој процес треба да биде завршен до крајот на овој месец.
Свет
„Тоа не е повлекување на САД од Европа“: Американската војска за намалување на силите
Повлекувањето на американската бригада од Романија не значи „повлекување“ од европскиот континент, објави денес американската армија.
„Ова не е повлекување на САД од Европа, ниту е знак за намалена посветеност на НАТО и Член 5, кој предвидува дека секоја од 32-те земји на Алијансата мора да ѝ помогне на земја-членка во случај на напад“, нагласи американската војска во соопштение од нејзиното европско седиште.
„Напротив, тоа е позитивен знак за зголемени капацитети и одговорности во Европа“, соопшти американската војска.
Армијата појасни дека Втората борбена пешадиска бригада на 101-та воздушно-десантна дивизија, со седиште во Романија, ќе се врати во своето седиште во Кентаки и нема да биде заменета.
Во соопштението не е наведено колку војници биле вклучени, но бригадата обично брои помеѓу 3.000 и 5.000.
Романските власти објавија дека 1.000 војници ќе останат стационирани по прераспоредувањето.
Фото: принтскрин
Свет
Специјалниот пратеник на Путин: Не сакаме конфликтот во Украина да ескалира во нешто поголемо
Специјалниот пратеник на рускиот претседател Владимир Путин, Кирил Дмитриев, на инвестициска конференција во Саудиска Арабија изјави дека војната во Украина би можела да заврши во рок од една година.
Дмитриев го изјави ова по состанокот со претставници на американската администрација во САД минатиот викенд.
„Сигурни сме дека сме на патот кон мир“
Неговата посета доаѓа по одлуката за одложување на самитот меѓу американскиот претседател Доналд Трамп и рускиот претседател Владимир Путин.
„Сигурни сме дека сме на патот кон мир и како миротворци мора да го оствариме тоа“, изјави Дмитриев, кој е и извршен директор на Рускиот фонд за директни инвестиции, на конференција во Ријад.
На прашањето дали мирот во Украина е можен во рок од една година, Дмитриев рече: „Верувам дека е“.
Дмитриев во САД рече дека САД и Русија се блиску до „дипломатско решение“ за војната.
Пофалби за соработката меѓу САД, Саудиска Арабија и Русија
Дмитриев ја пофали соработката меѓу САД, Саудиска Арабија и Русија како земји со најголеми резерви на природни ресурси во светот и рече дека таквата соработка ќе го направи светот побезбеден.
„Луѓето сега се фокусирани на регионалниот конфликт околу Русија, но не сакаме тој да ескалира во поголем конфликт. И за да се случи тоа, треба да направиме подобро отколку што правиме, а не полошо“, рече тој.

