Свет
Русија прогласена за виновна за соборувањето на патничкиот авион, во кој загинаа 298 луѓе

Советот на Меѓународната организација за цивилно воздухопловство (ICAO) вчера заклучи дека Русија е одговорна за соборувањето на патничкиот авион MH17 во јули 2014 година.
Летот MH17, Боинг 777 на „Малезија ерлајнс“, полета на 17 јули 2014 година од аеродромот „Схипхол“ во Амстердам до Куала Лумпур.
Три часа по полетувањето, тој беше погоден над украинскиот регион Донецк со ракета земја-воздух „Бук“ испукана од проруските сепаратистички сили.
Сите патници и членови на екипажот, вкупно 298 лица, вклучувајќи 196 холандски државјани, загинаа.
Иако Русија никогаш не ја презеде одговорноста за нападот, таа систематски ширеше теории на заговор за да ја префрли одговорноста на други.
Според соопштението на холандското Министерство за надворешни работи, „огромно мнозинство“ од членовите на ICAO гласале во корист на Холандија и Австралија, кои во 2022 година покренаа постапка против Русија пред оваа меѓународна организација.
Во пресудата се наведува дека Русија е „одговорна за соборувањето на летот MH17“ и дека нејзините постапки „ја прекршиле Конвенцијата за меѓународно цивилно воздухопловство.
„Во наредните недели, Советот на ICAO ќе разгледа која форма на репарација е соодветна“, рече холандскиот министер за надворешни работи Каспар Велдкамп. „Во овој контекст, Холандија и Австралија бараат од ICAO да ѝ наложи на Русија да започне преговори со двете земји и да посредува во процесот.“
Семејствата на жртвите од MH17 претходно побараа руското признавање на одговорноста да биде составен дел од секој иден мировен договор за ставање крај на руската инвазија на Украина, потсетува „Европска правда“.
Амбасадорот на Украина во Канада и претставник на Киев во ICAO, Јулија Ковалив, за „Европа правда“ изјави дека оваа одлука претставува „уште еден важен чекор кон одговорност на Русија“.
„Цивилната авијација е болна тема за Русија и ние ќе продолжиме да работиме на тоа да ги повикаме на одговорност сите што ја прекршуваат Конвенцијата, вклучувајќи ги Русија и Иран“, додаде Ковалив.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
САД нудат 50 милиони долари за апсење на претседателот на Венецуела

Соединетите Американски Држави ја удвоија наградата за информации што би довеле до апсење на венецуелскиот претседател Николас Мадуро на 50 милиони долари, обвинувајќи го дека е еден од најголемите трговци со дрога во светот, пишува „Би-би-си њуз“.
Американскиот претседател, Доналд Трамп, е долгогодишен критичар на Мадуро, кој повторно ја презеде функцијата во јануари по изборите обележани со обвинувања за фалсификување на гласови, чии резултати во голема мера беа отфрлени од меѓународната заедница. Генералниот обвинител, Пам Бонди потврди дека САД ќе ја удвојат претходно објавената награда од 25 милиони долари, тврдејќи дека Мадуро е директно поврзан со операции за трговија со дрога.
Венецуелскиот министер за надворешни работи Иван Гил ја нарече новата награда „патетична“ и ја нарече „политичка пропаганда“. „Не сме изненадени, со оглед на тоа од каде доаѓа“, рече Гил, обвинувајќи ja Бонди за „очајно одвлекување на вниманието“ од негативните наслови околу справувањето со случајот со педофилот Џефри Епштајн.
За време на првиот мандат на Трамп, американската влада ги обвини Мадуро и други високи венецуелски функционери за низа кривични дела, вклучувајќи наркотероризам, корупција и трговија со дрога. Во тоа време, Министерството за правда на САД тврдеше дека Мадуро соработувал со колумбиската бунтовничка група ФАРК за „да користи кокаин како оружје за „совладување“ на САД“.
Во видео објавено во четврток, Бонди го обвини Мадуро за координација со групи како што се Трен де Арагва – венецуелска банда означена како терористичка организација од администрацијата на Трамп – и картелот Синалоа, моќна мексиканска криминална мрежа. Се тврдеше дека Агенцијата за борба против дрога на САД (ДЕА) „запленила 30 тони кокаин поврзан со Мадуро и неговите соработници, со речиси седум тони поврзани со самиот Мадуро“. Мадуро претходно ги отфрли тврдењата на САД за директна вмешаност во трговијата со дрога.
Мадуро, лидерот на Обединетата социјалистичка партија, кој го наследи Уго Чавез во 2013 година, се соочи со повеќекратни обвинувања за потиснување на опозициските групи и задушување на несогласувањето во Венецуела, вклучително и употреба на насилство. Тој ги преживеа протестите по спорните избори минатата година и ја задржа власта.
Сепак, во јуни Уго Карвахал, поранешниот шеф на воената разузнавачка служба на Венецуела, беше осуден по неколку обвиненија за трговија со дрога откако беше уапсен во Мадрид и екстрадиран во САД. Карвахал, познат по прекарот Ел Поло, беше моќен шпион кој избега од Венецуела откако ја повика војската да поддржи кандидат на опозицијата и да го собори Мадуро.
Иако првично ги негираше обвиненијата, подоцна се изјасни за виновен, поттикнувајќи шпекулации дека склучил договор со американските власти во замена за помала казна и инкриминирачки информации за Мадуро. Обединетото Кралство и ЕУ, исто така, објавија санкции против владата на Мадуро по неговото враќање на функцијата претходно оваа година.
Свет
Либанската влада го поддржа американскиот план, луѓето на Хезболах ја напуштија седницата

Министерот за информации на Либан објави дека владата ги одобрила целите на американскиот предлог за разоружување на Хезболах до крајот на годината и прекин на израелските воени операции во земјата. Тој додаде дека владата не ги разгледала сите детали од предлогот.
Соединетите Американски Држави му презентираа на Либан предлог за разоружување на Хезболах до крајот на годината, со прекин на израелските воени операции во земјата и повлекување на израелските војници од пет позиции во јужен Либан.
Тој план, предложен од претставникот на американскиот претседател Доналд Трамп во регионот, Том Барак, ги утврдува најдеталните чекори досега за разоружување на Хезболах, група поддржана од Иран. Таа организација досега ги отфрлаше сè погласните повици за разоружување откако влезе во разорна војна со Израел минатата година.
Планот беше дискутиран на седница на либанската влада. Хезболах сè уште не го коментираше предлогот, но три извори за Ројтерс изјавија дека министрите од групата поддржана од Иран и нивните шиитски муслимански сојузници ја напуштиле седницата во знак на протест поради дискусиите за предлогот.
Целите на американскиот предлог вклучуваат постепено укинување на вооруженото присуство на недржавни актери, вклучувајќи го и Хезболах, потоа распоредување на либански сили во клучните гранични и внатрешни области, повлекување на Израел од петте позиции што ги држи, решавање на прашањето со затворениците преку индиректни преговори и трајно обележување на границите на Либан со Израел и Сирија.
Вчера, Хезболах ја обвини либанската влада дека направила голем грев со тоа што планирала да го прифати американскиот предлог, велејќи дека потегот е резултат на американски диктати и дека ќе се третира како да не постои.
„Владата на премиерот Наваф Салам направи голем грев со тоа што одлучи да одземе оружје од Либан за да се спротивстави на израелскиот непријател. Одлуката целосно им служи на интересите на Израел“, се вели во соопштението.
Свет
Украинските воени регрутери ќе мора да носат камери на телото

Украинското Министерство за одбрана објави дека сите вработени во украинските канцеларии за регрутирање ќе мора да носат камери на своите тела и да ги снимаат своите постапки при проверка на документи и доставување на известувања за регрутирање. Одлуката стапува на сила на 1 септември.
„Овој чекор ќе помогне да се обезбеди транспарентност и легалност во работата на тимовите на канцелариите за регрутирање, како и да се заштитат правата на двете страни“, рече министерот за одбрана Денис Шмихал.
Во услови на тековните напори за мобилизација на Украина, канцелариите за регрутирање често се обвинуваат за присилно регрутирање без почитување на основните граѓански права и злоупотреба на регрутите. Министерството објави дека ќе бидат преземени дисциплински мерки во случаи на прекршување на барањето за носење камери на телото и снимање на постапките.
Во јуни и јули, руските сили извршија неколку напади врз канцеларии за регрутирање во градовите Кривји Рог, Полтава, Кременчук, Харков и Запорожје, оштетувајќи ја инфраструктурата и предизвикувајќи цивилни и воени жртви. Овие неодамнешни напади се сметаат за ескалација на тактиките насочени кон попречување на напорите за мобилизација на Украина и поттикнување социјални немири.
Демонстрантите се собраа во украинскиот град Виница минатата недела за да побараат ослободување на мажите приведени во канцелариите за регрутирање. На крајот, тие упаднаа во стадионот каде што беа држени мобилизираните мажи.