Свет
Русија распиша потерница по американскиот сенатор Линдзи Греам за русофобија

Министерството за внатрешни работи на Русија објави потерница за американскиот републикански сенатор Линдзи Греам, пренесува „РТ Балкан“.
Кривичната постапка ја поведе претседателот на Истражниот комитет на Руската Федерација, Александар Бастрикин, поради видеото што се појави на веб-страницата на претседателот на Украина, Володимир Зеленски, на кое Греам во разговор со украинскиот лидер вели дека САД „никогаш толку успешно не трошеле пари“ како за време на украинскиот конфликт.
„Русите умираат. Никогаш толку добро не сме трошеле пари“, рече Греам за време на состанокот.
На средбата со Зеленски, на која претседателот на Украина го пофали републиканскиот сенатор од Јужна Каролина за неговиот придонес во зајакнувањето на одбранбените способности на украинската армија, Греам вели дека „смртта на Русите е најуспешното трошење на американските пари“ како дел од помошта за Украина мислејќи на 38-те милијарди долари што Американците ги издвоија за Украина од февруари минатата година, пренесе „РИА новости“.
Во обид да го одбрани американскиот сенатор „Ројтерс“ истакна дека, всушност, се работи за видеомонтажа и дека Греам, зборувајќи за помошта што Вашингтон му ја доделува на Киев, рекол дека „тоа се најдобрите пари што некогаш сме ги потрошиле“.
US Senator Lindsey Graham speaking with Ukraine’s president Zelensky about military aid. pic.twitter.com/WjmUzcRvwa
— The Spectator Index (@spectatorindex) May 28, 2023
Како што понатаму објави овој медиум, американскиот сенатор во вториот дел од видеото вели дека она што го прават денеска Украинците го потсетува на историјата на САД кога Американците се бореле до последен здив.
„Зеленски тогаш рече дека САД денес се слободна земја, а слободни ќе бидат и Украинците, на што Греам коментира: „И Русите умираат,“ пишува „Ројтерс“.
Официјална Москва ги осуди зборовите на Греам велејќи дека такви изјави не му прилегаат на функционер и дека се срам за една земја. Поранешниот руски претседател Дмитриј Медведев го нарече Греам „стар будала“.
Греам, од друга страна, ја нарече реакцијата на Москва пропаганда иако руската страна само го коментира видеото што го монтира, а потоа го објави Киев.
За потсетување, ова не е прва русофобна изјава на Греам, кој, коментирајќи го падот на американското беспилотно летало во Црното Море, претходно рече дека САД треба да го соборат секој руски воен авион што се приближува до американски авион во воздушниот простор над отвореното море.
Во март минатата година Греам рече дека „некој треба да го убие рускиот претседател Владимир Путин“ и на „Твитер“ праша дали во руската армија има предавник како Брут, кој би бил подготвен да го ликвидира рускиот претседател.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Европа
Човек на Трамп: Предлогот на Путин е апсурден

Кит Келог, специјалниот претставник на американскиот претседател Доналд Трамп за Украина и Русија, го отфрли предлогот на рускиот претседател Владимир Путин за тридневен прекин на огнот. Келог истакна дека Вашингтон бара долгорочно примирје.
Коментирајќи го напредокот на мировните преговори во последните денови, тој изрази верување дека САД „се во прилично добра позиција кога станува збор за Украинците“. „А тридневно примирје е апсурдно“, нагласи тој, осврнувајќи се на предложеното примирје од 8 до 10 мај.
Тој додаде дека Трамп се залага за сеопфатен прекин на огнот „на море, во воздух и на копно“ што ќе трае најмалку 30 дена. „И потоа можеме да го продолжиме“, изјави тој.
„Кога ќе погледнете на сè околу што Украинците се подготвени да соработуваат, сега е до Русите, до Путин. Имаме една страна, ни треба друга страна. И мислам дека сме блиску“, продолжи тој.
Путин најави уште едно примирје кое ќе започне на полноќ на 8 мај и ќе трае до полноќ на 11 мај. Италијанската премиерка Џорџа Мелони изјави дека тридневното примирје објавено од Кремљ не е доволно, туку дека е потребен праведен и траен мир.
Британската одбранбена разузнавачка агенција верува дека тридневниот прекин на огнот што го објави Путин на Денот на победата има за цел да ја прикаже Русија како отворена за преговори и да ги ограничи украинските напади со долг дострел.
Свет
Израелски министер: Војната нема да заврши сè додека стотици илјади луѓе не ја напуштат Газа

Израелскиот министер за финансии, Безалел Смотрич, изјави денес дека Израел нема да ја заврши војната во Појасот Газа сè додека стотици илјади Палестинци не ја напуштат енклавата.
„Ќе ја завршиме оваа кампања кога Сирија ќе биде уништена, Хезболах ќе биде тешко поразен, Иран ќе биде лишен од својата нуклеарна закана, Газа ќе биде исчистена од Хамас и кога стотици илјади жители на Газа ќе избегаат во други земји, нашите заложници ќе бидат вратени, некои во своите домови, а некои во гробовите на Израел“, рече Смотрич за време на говорот во населбата Ели во централниот Западен Брег.
Тој изјави дека ова не се само цели на владата, туку и консензус на израелскиот народ и војниците. Смотрич апелираше до премиерот Бенјамин Нетанјаху да „направи сè за да ја зајакне безбедноста на Израел“ и го предупреди да не „ја пропушта оваа можност“.
Израелската војска го обнови нападот врз Газа на 18 март, прекршувајќи го договорот за прекин на огнот и размена на затвореници со палестинската милитантна група Хамас од 19 јануари.
Над 52.300 луѓе, претежно жени и деца, се убиени во Газа во израелската офанзива од октомври 2023 година, која започна по нападот на Хамас врз Израел на 7 октомври 2023 година, во кој беа убиени 1.300 луѓе.