Свет
Руси што војувале во Украина за регрутацијата: „Сите ќе загинат таму“

Руските регрути, чија мобилизација неодамна ја најави претседателот Владимир Путин, се испраќаат директно на фронтот, без никаква обука или медицински прегледи, се наведува на канал на „Телеграм“.
„Новите регрути не учествуваат во вежби, не се прегледани од лекарска комисија и не поминуваат никаква обука“, се наведува во групата „Прво одделение“ во објава на „Телеграм“.
Групата сподели видео објавено од неименуван регрут, кој бил повикан да се бори, пренесе „Република.рс“.
„Здраво на сите, првиот тенковски полк е тука. Официјално ни беше кажано дека нема да има обука пред да бидеме испратени во воена зона. Командантите на полкот го потврдија тоа. На 29 септември ќе бидеме испратени во Херсон“, вели руски војник во видеото објавено на „Телеграм“.
Русија има намера да регрутира речиси 300.000 војници како дел од делумната мобилизација со цел да ја промени ситуацијата на бојното поле, која во последните недели беше во корист на Киев.
Во исто време, по обелоденувањето на мобилизацијата, голем број Руси побрзаа да ја напуштат земјата.
Рускиот портал „Медуза“ ги праша Русите што веќе беа на фронтот во Украина што мислат за мобилизацијата. Нивните одговори ги пренесе „Индекс“.
Кирил
„Искрено, сите ќе загинат таму. Тоа не е обучена војска! На пример, служев долго време како војник со договор, а потоа решив да одам на фронтот во Украина. Но, сè уште не бев подготвен за она што ме чекаше таму. „Првиот ден сфатив дека ја направив најголемата грешка во животот“, изјави Кирил.
„Кога решив да одам во Украина, тоа го направив од патриотизам. Верував дека таму има некакви нацистички организации. Сите канали во Русија промовираа таква пропаганда. Но, штом ја минавме границата, сфатив дека ние сме окупатори, дека ние сме фашисти“, додаде тој.
„Од камионот ги погледнав сцените околу мене. Сите тие уништени села во Харков. Сфатив дека, всушност, ја уништуваме земјата заедно со цивилите. Мојот свет се преврте наопаку, се чувствував празно внатре. Сфатив дека мојот претходниот живот беше фикција“, рече Кирил.
Анатолиј
„Не ми е јасно што сакаат да постигнат со оваа толпа луѓе. Ако Украинците се погрижија за нас професионалците, што ќе прават со нив. Најдоброто сценарио е да останат во резервите во Донбас, а најлошото е да умираат со херојска смрт. Имаат две опции. Особено ако ги пуштат на терен по една недела тренинг. Недела, тоа не е ништо! На борбените единици им требаат најмалку месец или еден и пол месец да се навикнат“, вели Анатолиј.
Џингис
„Оваа мобилизација е доказ дека руската армија е поразена и регрутира секого. Многу луѓе не разбираат, но тоа е така. Во последната половина година руската професионална армија беше уништена, а сега ја регрутираа целата резерва. Јас служев според договор, а ни ние немавме соодветен тренинг“, изјави Чингиз.
„Каква разлика ќе направат овие регрути на линијата на фронтот? Тие ќе загинат за ништо. Тие се само цивили што во одреден момент ја отслужиле својата задолжителна воена служба. Сите што моментно се во Украина само сакаат да си одат дома, сакаат некој да ги замени. Сакаат да се вратат и моите колеги војници што ја поддржуваат војната: ‘Мораме барем да се одмориме дома еден-два месеца, а потоа можеме да се вратиме и да ги победиме фашистичките ѓубриња’“, рече тој.
„Имам пријател кој е регрутиран и за две недели треба да оди во Украина. Се обидов да го предомислам, но тој е премногу послушен. Вели дека во спротивно би завршил една година во затвор и дека подобро е да им помагаш на другите на фронтот. Тоа стана стандардна фраза: „Морам да им помагам на другите. Но, сите нормални момци веќе избегаа од таму“, додаде тој.
„Отидов во Украина во јануари и точно е, сите мислевме дека одиме таму само на воени вежби. Видов колку е неподготвена руската армија. Само отидовме напред и нѐ бомбардираа. Потоа стигнавме во Киев и повторно почнаа да нѐ бомбардираат. Тоа беше војна. Цивилите бегаа, ние постојано влегувавме во празни села. Семејствата што останаа закачија бели знамиња и останаа во своите куќи“, рече Чингиз.
„Во едно село во близина на Киев видов семејство со дете што има болки. Мајка му плачеше и му велеше дека не може да повика брза помош поради војната. Детето имаше силни болки, имаше пет години. Неколку дена подоцна дознав дека умрело, што значи дека умрело поради нас. Затоа што отидовме во Украина“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Србија ќе се приклучи на развојот на руската вакцина против рак

Претседателот на Србија, Александар Вучиќ, изјави дека разговарал со Александар Кецман, директор на Институтот „Гамалеја“ во Москва, кој го информирал дека во Русија се развива вакцина против рак.
„Ми објаснија одредени работи. Имаме голем процент на заболени од рак. Оваа вакцина е поинаква, бидејќи им помага на веќе болните луѓе — не е превентивна. Може да биде успешна до 85 проценти,“ рече Вучиќ.
Тој додаде дека Србија ќе се вклучи во проектот веднаш штом Русија го дозволи тоа:
„Ќе подготвиме целосна инфраструктура за да бидеме спремни за два до три месеци. Не можеме уште да ја произведуваме, но ќе направиме сè за да бидеме подготвени.“
Вучиќ нагласи дека во Србија има повеќе случаи на малигни заболувања отколку во другите земји, што, според него, е поврзано со последиците од бомбардирањето во 1999 година.
Свет
Ројтерс: Зеленски ќе му презентира на Трамп план за користење на ракетите „Томахавк“

Украинскиот претседател Володимир Зеленски подготвува презентација за Доналд Трамп во која ќе објасни како Украина би ги користела крстосувачките ракети „Томахавк“ доколку САД одобрат нивна испорака, објави Ројтерс повикувајќи се на висок извор.
Според агенцијата, Киев смета дека овие ракети со домет од над 1.600 километри би можеле да го променат текот на војната, овозможувајќи напади врз цели длабоко во Русија, вклучувајќи енергетски постројки и воени бази.
Сепак, не е извесно дали Трамп ќе ја прифати украинската аргументација. Тој вчера изјави дека на САД им се потребни сопствените залихи на „Томахавк“ и изрази загриженост поради нивното исцрпување.
Свет
Орбан и Путин разговарале за можниот самит со Трамп во Будимпешта

Унгарскиот премиер Виктор Орбан телефонски разговарал со рускиот претседател Владимир Путин за планираниот состанок меѓу Путин и американскиот претседател Доналд Трамп во Будимпешта, соопшти Кремљ. Според соопштението, иницијативата за разговорот дошла од унгарската страна.
„Орбан ја изрази подготвеноста да помогне во организирањето на можниот руско-американски самит во Будимпешта“, се наведува во соопштението на Кремљ.
Путин го информирал Орбан за неговиот неодамнешен телефонски разговор со Трамп и изјавил дека планираниот состанок ќе го искористи за дискусија околу „алгоритамот на понатамошни чекори“ со цел пронаоѓање начин за завршување на војната во Украина.
По разговорот, Орбан на социјалните мрежи напиша дека „подготовките се во полн ек“, очигледно алудирајќи на можниот самит во унгарската престолнина.
Трамп и Путин разговарале вчера, првпат по речиси два месеца. Американскиот претседател потоа најави дека планира состанок со рускиот лидер во Будимпешта — што би билa првa неговa посетa на главен град на земја членка на ЕУ од почетокот на инвазијата врз Украина.
Трамп изјави дека Путин не ја поддржува идејата САД да ѝ испорачаат на Украина ракети „Томахaвк“ и додаде дека „можеби сега не е совршен момент“ за воведување дополнителни санкции насочени кон руските енергетски приходи.