Свет
Руските пранкери го насамарија Дејвид Камерон: британскиот министер зборуваше за Трамп и Путин

Руските пранкери кои често целат кон политичари од интерес на руската држава денеска објавија видео од видео повик со британскиот министер за надворешни работи Дејвид Камерон во кој го убедија дека разговара со поранешниот украински претседател, Порошенко.
Британското Министерство за надворешни работи на почетокот на овој месец соопшти дека Камерон остварил видео повик со некој кој се претставил како поранешниот украински претседател Петро Порошенко пред да сфати дека е жртва на измама.
Повикот во траење од околу 15 минути, во кој Камерон може да се види како разговара на мобилен телефон некаде надвор, облечен во неформална облека, е дело на руските пранкери кои ги користат прекарите „Вован и Лексус“.
Двајцата станаа познати во Русија откако измамија голем број политичари во изминатите неколку години, вклучително и експремиерот, Зоран Заев.
Воксан и Лексус во минатото ги негираа обвинувањата од западните земји дека имаат врски со руските разузнавачки служби, иако често на своите жртви им поставуваат прашања кои би биле од политички интерес за руската држава.
Лобирање на Трамп
На снимката, Камерон може да се слушне како зборува за приватната вечера што ја имал со американскиот претседателски кандидат Доналд Трамп во април, за време на која лобирал Трамп да им дозволи на републиканците да гласаат за американската воена помош за Украина.
Се слуша како Камерон вели дека Републиканската партија е поделена околу Украина и му кажува на Трамп дека не е во право ако мисли дека Путин го сака само Крим, кој Русија го анектираше во 2014 година, како и регионот Донбас, кој се состои од Доњецк и Луганск, два од четирите украински региони кои Москва ги присвои како руска територија.
„Вашингтон пост“ во април објави дека Трамп приватно разговарал за опцијата да му дозволи на Путин да ги задржи Крим и Донбас во замена за мир, нешто што кампањата на Трамп не го потврди. Се слуша како Камерон вели дека таквата идеја пропаднала.
„Трамп е убеден дека може да се постигне договор, но тоа не е така бидејќи Путин сака многу повеќе“
„Трамп е убеден дека може да се постигне договор, но тоа не е така затоа што Путин сака многу повеќе“, вели Камерон и додава дека мисли оти Трамп, доколку победи на изборите, ќе ја поддржи победничката страна на првата линија и затоа летните битки се толку важни.
Камерон, исто така, вели дека Украина нема да биде поканета на самитот на НАТО следниот месец, бидејќи Вашингтон се противи на идејата. Камерон понатаму вели дека не мисли оти потенцијалниот француски план за испраќање војници во Украина е вистинскиот пристап бидејќи таа војска би станала цел на Путин.
Тој потсетува и на средбата со министерот за надворешни работи на Казахстан во април. Вели дека министерот му рекол оти централноазиската нација се плаши дека Русија „сака парче“ од северен Казахстан, кој е дом на многу етнички Руси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Се огласи Путин по воведувањето на санкциите од страна на САД

Рускиот претседател, Владимир Путин, го даде својот прв директен одговор на американските санкции воведени врз Русија.
Тој рече дека санкциите нема да влијаат на руската економија, но ги опиша како „непријателски чин“ што не придонесува за зајакнување на односите со САД. Тој потврди дека ќе има одредени загуби, но дека руската енергетска индустрија се чувствува безбедно. Путин рече дека Русија спаѓа во групата земји кои се почитуваат себеси и немаат намера да донесуваат одлуки под притисок, додавајќи дека дијалогот е секогаш подобар од војната.
Според него, замената на руската нафта на светскиот пазар ќе трае долго и ќе доведе до пораст на цените.
Зборувајќи за откажаниот самит со Доналд Трамп во Будимпешта, Путин рече дека средбата била предложена од американската страна.
Тој додаде дека Трамп веројатно не мислел дека средбата е откажана, туку одложена, кога зборуваше вчера во Белата куќа, објави Скај.
Во меѓувреме, Володимир Зеленски одржа серија средби со неколку од 27-те европски лидери на состанокот на Европскиот совет во Брисел.
Пред своето обраќање, украинскиот претседател сподели објави на социјалните мрежи за неговите разговори со полскиот премиер Доналд Туск, германскиот канцелар Фридрих Мерц и финскиот премиер Петери Орп.
Претходно се сретна и со францускиот претседател Емануел Макрон и чешкиот премиер Петр Фиал.
Свет
Зеленски: Путин знае дека едно оружје може да го промени текот на војната

Украинскиот претседател, Володимир Зеленски им се обрати на лидерите на состанокот на Европскиот совет утрово. Украинскиот претседател рече дека постои едно оружје кое, како што истакна, може да „го промени текот на војната“.
„Само погледнете колку стана нервозен Путин кога се појави оваа тема, тој разбира дека оружјето со долг дострел може да го промени текот на војната“, рече Зеленски. Зборувајќи за видовите на такво оружје, тој меѓу другите ги спомена ракетите Томахавк.
Американскиот претседател Доналд Трамп досега одби да испорача Томахавк на Украина, но затоа синоќа потврди строги санкции против руските нафтени гиганти Роснефт и Лукоил.
Зеленски им се заблагодари на собраните лидери, но рече дека одлуката за замрзнатите руски средства мора да се донесе што е можно поскоро. Доколку биде одобрена, рече Зеленски, тој ќе искористи значаен дел од тие пари за купување европско оружје.
„Мора да ги искористиме тие замрзнати средства на начин што ќе ѝ даде до знаење на Русија дека мора да плати за сопствената војна што ја води. Затоа, ве молам да донесете одлука што е можно поскоро – руските средства треба целосно да се искористат за одбрана од руската агресија“, рече тој.
Според дипломатски извори, лидерите на земјите-членки се согласиле дека Русија не е подготвена да се вклучи во значајни разговори за постигнување мир и завршување на војната и дека е потребно да се продолжи со притисокот за да се принуди Путин да седне на преговарачка маса.
Дискусијата за Украина ќе продолжи попладне, додека за време на работниот ручек ќе разговараат за зајакнување на европската одбрана.
Унгарскиот премиер Виктор Орбан не учествуваше во дискусијата, кој остана во Будимпешта, каде што денес се одбележува годишнината од Унгарската револуција од 1956 година. Тој ќе пристигне во Брисел подоцна попладне.
Унгарија не сака да ги поддржи заклучоците од самитот за Украина, па затоа најверојатно ќе биде објавена изјавата на другите 26 земји-членки.
Свет
Русија: Отворени сме за можноста за средба меѓу Трамп и Путин

Руското Министерство за надворешни работи е отворено за продолжување на контактите со американскиот Стејт департмент за можна средба меѓу американскиот претседател Доналд Трамп и рускиот претседател Владимир Путин, изјави денес портпаролката Марија Захарова.
„Руското Министерство за надворешни работи, од своја страна, е отворено за продолжување на контактите со американскиот Стејт департмент во спроведувањето на договорите постигнати за време на телефонскиот разговор меѓу претседателите на Русија и САД на 16 октомври“, изјави Захарова пред новинарите.
Вчера, Трамп го објави откажувањето на планираниот состанок со Путин во Будимпешта.
Американскиот претседател рече дека состанокот „може да биде губење време во моментов“. Сепак, неговата администрација ја остави отворена можноста разговорите да продолжат, и покрај санкциите воведени синоќа против двете најголеми руски нафтени компании.