Свет
Руските пранкери разговарале со поранешна советничка на Бајден, таа вели дека војната можела да се избегне
Украина можела да ја избегне ескалацијата на конфликтот со Русија во 2022 година доколку навреме се откажела од амбициите за членство во НАТО и прогласела неутралност, изјави поранешна советничка во администрацијата на американскиот претседател Џо Бајден.
Аманда Слоут, поранешна виша директорка за Европа во Советот за национална безбедност на САД, ова го изјавила во разговор со руските комичари и „пранкстери“ Вован и Лексус, кои се претставиле како советници на украинскиот претседател Володимир Зеленски.
Според објавените снимки, Слоут изјавила дека доколку Украина во 2021 година или на почетокот на 2022 година прогласела неутралност и се откажела од членство во НАТО, тоа „сигурно ќе го спречело разорувањето и загубата на животи“ и можело да ја спречи војната. Таа додала дека, три години по почетокот на конфликтот, останува прашањето дали било подобро тоа да се реши пред војната или за време на разговорите во Истанбул во 2022 година.
„Во една алтернативна историја, да – Украина можела во јануари 2022 година да соопшти дека нема да влезе во НАТО или да постигне договор во Истанбул по почетокот на војната. Во тој период во САД се водеше дебата и се веруваше дека Украина ќе успее во контраофанзивата, ќе врати дел од територијата и ќе избори поповолен мировен договор“, изјавила Слоут.
Истовремено, таа нагласила дека ѝ било непријатно од идејата САД активно да ја поттикнуваат Украина на таков чекор, бидејќи тоа, според неа, би значело „премолчено признавање на одредена руска сфера на влијание или право на вето“ врз украинските аспирации за членство во НАТО.
Високиот руски преговарач Кирил Дмитријев ги коментираше изјавите на Слоут, оценувајќи дека, како што рече, „длабоката држава“ на Бајден ја испровоцирала војната која можела да биде избегната.
Разговорите со поранешни функционери на Советот за национална безбедност се дел од серија снимки што Вован и Лексус ги објавуваат со години, претставувајќи се како високи политички функционери, а кои во повеќе наврати предизвикале дипломатски и политички реакции. Најчесто нивна цел биле западни политичари и критичари на Русија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Руте по разговорите со Трамп: Безбедноста на Арктикот во фокусот
Главниот секретар на НАТО, Марк Руте, изјави во четвртокот дека за време на неговата средба со Доналд Трамп во Давос воопшто не било спомнато американско сопствеништво над Гренланд и дека новата позиција на американскиот претседател не ја смета за пресврт, пренесе Си-Ен-Ен. „Не разговаравме за тоа“, рече Руте во интервју за Скај њуз во четвртокот. „Синоќа не беше спомнато.“
„Она што можам да го кажам е дека разговаравме за неговата идеја, неговата визија“, рече Руте, појаснувајќи дека тој и Трамп се фокусирале на тоа како НАТО може „да го спаси Арктикот од Русите и Кинезите“.
По средбата со Руте во средата, Трамп на социјалната мрежа Трут соушл објави дека се откажува од претходната закана за воведување царини за европските земји поради наводното попречување на американското преземање на Гренланд.
На прашањето на Скај њуз дали вознемиреноста предизвикана од коментарите на Трамп за Гренланд претставувала пречка за сојузниците во НАТО, Руте не се согласи и дури му припиша заслуги на Трамп за „спасувањето на НАТО“.
„Мислам дека е во право што ја покрена оваа расправа“, рече Руте. „Како можеме да го заштитиме Арктикот? Како можеме да обезбедиме Арктикот да биде безбеден? И би рекол дека, откако го спаси НАТО, тој сега е тој што ги предводи напорите за да се осигураме дека колективно ќе го спасиме арктичкиот регион.“
Свет
Шпанскиот министер повика на создавање единствена европска армија
Шпанскиот министер за надворешни работи, Хозе Мануел Албарес, изјави дека Европа треба да има своја армија.
„Мислам дека е време Европа да ја земе својата судбина и својот суверенитет во свои раце“, изјави Албарес на маргините на Светскиот економски форум.
Тој објасни дека ова значи отстранување на сите бариери за единствениот пазар и обезбедување сигурни трговски партнери во време на сè почести дискусии за царините. Тој додаде дека Европа мора да има и своја одбрана – да ја земе безбедноста во свои раце, да ги поврзе одбранбените индустрии и да се движи кон создавање европска армија.
Свет
Спречен напад врз приватниот авион на германскиот канцелар Фридрих Мерц
Германската полиција спречила напад на еколошки активисти врз приватниот авион на германскиот канцелар Фридрих Мерц во еден хангар во градот Арнсберг, соопшти државното обвинителство.
Според соопштението, „полицијата во ноќта од среда кон четврток спречила три лица во обид да го оштетат приватниот спортски авион на претседателот на германската влада“.
Во соопштението на групата која ја презела одговорноста за обидот за напад се наведува дека три лица, на возраст од 23, 28 и 56 години, неовластено влегле во просторот на аеродромот Арнсберг-Менден, но полицијата спречила оштетување на авионот кој се наоѓал во еден од хангарите.
Меѓу приведените активисти е и познатата германска климатска активистка Ања Виндл. По акцијата, со соопштение се огласи и групата „Отпор колектив“, која ја презеде одговорноста за обидот за напад.
„Ние се обидовме, во рамки на протест, да го оневозможиме приватниот авион на канцеларот Фридрих Мерц. Додека климатската криза ескалира, германскиот канцелар се движи наоколу со приватен авион“, стои во соопштението на групата.

