Началникот на Генералштабот на руската војска минатата недела го повика американскиот претседател на Здружениот Генералштаб за да ги предупреди Соединетите држави дека Русија ќе изврши пробно лансирање на хиперсонични ракети во источниот Медитеран, додавајќи дека бродовите на американската морнарица треба да се држат настрана од областа за вежби од безбедносни причини.

Минатата среда, генералот Валери Герасимов го повика генералот Ц.К. Браун, началникот на Здружениот Генералштаб на американската армија, за да му го пренесе ова предупредување и да разговара за Украина, односно за начините како да се избегнат можните погрешни пресметки меѓу САД и Русија.

Тестирањето на руската хиперсонична ракета беше извршено во источниот дел на Средоземното Море, област каде американската морнарица има три амфибиски бродови со 2.200 маринци, како и разорнувачи кои обезбедуваат ракетна одбрана на Израел.

Информациите за првиот разговор меѓу двајцата највисоки воени лидери беа објавени дури вчера, еден ден откако руското Министерство за одбрана објави дека руски воени бродови во областа лансирале хиперсонични ракети во меѓународни води.

Сепак, деталите за предупредувањето на Герасимов до Браун не се официјално објавени.

„Началникот на Здружениот Генералштаб, генерал Ц.К. Браун, Џуниор, разговараше телефонски со началникот на рускиот Генералштаб, генерал Валери Герасимов на 27 ноември на барање на руското Министерство за одбрана“, рече портпаролот на Браун, капетанот Џ.Д. Дорси, се вели во соопштението доставено за Еј-би-си Њуз.

„Ова беше првпат лидерите да зборуваат откако генералот Браун стана претседател на Здружениот Генералштаб. Лидерите разговараа за низа глобални и регионални безбедносни прашања, вклучително и тековниот конфликт во Украина“, се вели во соопштението.

Во разговорот, Браун и Герасимов разговарале и за тоа како да се избегнат можните погрешни пресметки и ескалација меѓу двете земји кога станува збор за Украина, рече американскиот претставник.

Поточно, тие разговараа за тоа што САД и дозволуваат на Украина да користи ракети со долг дострел ATACMS против цели во Русија, како и последователно тестирање на Русија на балистичка ракета со среден дострел (IRBM) против цел во Украина. Русија рече дека нападот на IRBM бил одмазда за тоа што и дозволила на Украина да користи ракети ATACMS во Русија.

Руското Министерство за одбрана завчера преку соопштение објави дека фрегатите „Адмирал Горшков“ и „Адмирал Головко“ „испукале хиперсонични ракети Циркон, а подморницата Новоросијск лансирала крстаречка ракета „Калибр“ кон цел на површината на морето.

„Целите беа директно погодени“, се додава во соопштението.