Министерството за трговија на Кина објави дека воведува царини за неколку производи од САД како одговор на одлуката на американскиот претседател Доналд Трамп. Кина истовремено објави и други мерки поврзани со трговијата, вклучително и истрага против Гугл, пренесува АП.

Според официјалното соопштение, Кина ќе применува царина од 15 отсто за јаглен и течен природен гас и 10 отсто за сурова нафта, земјоделски машини и автомобили со голем капацитет. Оваа одлука доаѓа како одговор на американските царини наметнати од претседателот Доналд Трамп, кои стапија на сила утрово.

Додека американските и европските берзански индекси беа во пораст по вчерашните добри вести од Канада и Мексико, тие утрово повторно се во пад бидејќи инвеститорите стравуваат од трговска војна меѓу САД и Кина, слична на онаа од првиот мандат на Трамп.

„Мислам дека треба да се навикнеме на ова, еден вид ролеркостер на јавни преговори за царини и други политики“, вели Рос Мејфилд, аналитичар во компанијата Baird.

„Едностраното зголемување на царините на САД сериозно ги крши правилата на Светската трговска организација“, се вели во соопштението на кинеското Министерство за трговија. „Не само што не помага во решавањето на сопствените проблеми, туку и штети на нормалната економска и трговска соработка меѓу Кина и САД“.

Царините од 10 отсто наредена од Трамп за Кина стапи на сила денеска, иако тој планираше да разговара со кинескиот претседател Си Џинпинг во следните неколку дена во обид да ги намали тензиите меѓу двете најголеми светски економии.

Европската комисија е подготвена да примени флексибилност во примената на Пактот за стабилност и раст, кој пропишува фискална дисциплина, доколку земјите-членки финансираат одбранбени проекти од нивните буџети, изјави претседателот на Европската комисија.

„Националните буџети се ограничени со правилата на Пактот за стабилност и раст, но во вонредни времиња е можно да има вонредни мерки и мислам дека живееме во вонредни времиња“, рече Фон дер Лејен на прес-конференција по неформалниот самит на Лидерите на ЕУ, што се одржа, а беше целосно посветен на одбраната и безбедноста.

Пактот за стабилност и раст предвидува дека буџетскиот дефицит на земјите-членки не смее да надминува 3 отсто од БДП, а јавниот долг не смее да надмине 60 отсто од БДП. Најавата на претседателот на Комисијата би значела дека земјите-членки би можеле да имаат уште поголеми дефицити доколку овие средства се наменети за одбранбени проекти.

„Ние во Комисијата ќе размислиме да користиме поголема флексибилност во Пактот за стабилност и раст за да им дадеме повеќе фискален простор на земјите-членки да ги зголемат трошоците за одбрана“, рече фон дер Лајен.

Претседателот на Европскиот совет Антонио Коста рече дека дискусијата на неформалниот состанок се фокусирала на идентификување на приоритетните области во одбраната каде заедничкото дејствување на ниво на ЕУ дава подобри резултати отколку кога земјите-членки дејствуваат поединечно.

„Во денешната дискусија, јасниот фокус беше на воздушната и ракетната одбрана“, рече Коста.

„Денес никој не ја доведе во прашање потребата од заедничка поддршка на проектите за противвоздушна одбрана. Тоа е заеднички интерес на целата Европска унија“, изјави полскиот премиер Доналд Туск, чија земја во моментов претседава со Советот на ЕУ.

На средбата се разговараше и за трансатлантските односи кои се карактеризираат со голема неизвесност поради најавата на американскиот претседател Доналд Трамп дека ќе воведе царини за производите од ЕУ.

Фон дер Лајен рече дека Европската унија е подготвена решително да одговори доколку тоа се случи.

Ел Салвадор вчера им понуди на Соединетите Држави да ги прифатат депортираните „опасни криминалци“ во нивните затвори, изјави американскиот државен секретар Марко Рубио по средбата со претседателот на централноамериканската земја, Наиб Букеле.

Шефот на американската дипломатија, на својата прва турнеја во странство, бара поддршка од земјите во регионот во напорите на администрацијата на претседателот Доналд Трамп да депортира голем број илегални мигранти.

🇸🇻🤝🏼🇺🇸 pic.twitter.com/IBHielgYvI

— Nayib Bukele (@nayibbukele) February 3, 2025

Рубио разговарал со Букеле и неговите соработници речиси три часа, а на средбата се договориле да примат и депортирани кои не се државјани на Ел Салвадор. „Секој илегален имигрант во САД кој е опасен криминалец, МС-13, Трен де Арагва, од каде и да се – Букеле ни ги понуди нивните затвори за да можеме да ги испратиме и да ги приведеме таму“, рече Рубио, именувајќи некои криминални групи.

Букеле, исто така, понуди да и дозволи на неговата земја да прифати опасни криминалци кои се американски државјани, но не е познато дали САД ќе ја прифатат понудата, пренесува Ројтерс. Во објава на платформата Икс, Букеле објави дека понудил да им даде дел од затворскиот систем на САД. Цената би била релативно ниска за САД, но значајна за Ел Салвадор бидејќи ќе го направи одржлив целиот затворски систем на таа земја, додаде Букеле.