Свет
САД ги зголемуваaт царините на челик и алуминиум, aвтоиндустријата испрати предупредување

Министерството за трговија на САД објави дека ги зголемува царините на челик и алуминиум за повеќе од 400 производи, меѓу кои се и ветерни турбини, домашни апарати, тешка механизација, железнички вагони, мотоцикли, бродски мотори, мебел и стотици други производи.
Министерството соопшти дека на списокот на деривати од челик и алуминиум опфатени со секторските царини се додаваат 407 категории производи, при што на содржината на челик и алуминиум во тие производи ќе се применува царина од 50 проценти, а на преостанатата содржина ќе важи државната стапка.
Финансиските аналитичари на компанијата Evercore ISI во истражувачка белешка наведоа дека мерката се однесува на повеќе од 400 производи, чиј увоз минатата година изнесувал над 200 милијарди долари, и се проценува дека ќе ја зголеми вкупната ефективна царинска стапка за околу еден процентен поен.
Министерството со новите тарифи опфати и увозни делови за издувни системи на автомобили, електричен челик потребен за производство на електрични возила, компоненти за автобуси и клима-уреди, како и домашни апарати како фрижидери, замрзнувачи и сушари.
Одбиено барањето на Тесла
Група странски производители на автомобили го повикаа Министерството да не ги додава тие делови, предупредувајќи дека САД нема домашни капацитети за задоволување на тековната побарувачка.
Компанијата Тесла безуспешно бараше од Министерството за трговија да го одбие барањето за додавање на челични производи кои се користат во моторите на електрични возила и ветерни турбини, тврдејќи дека во САД нема достапни капацитети за производство на челик потребен за погонски склопови на електрични возила.
Новите тарифи стапуваат на сила веднаш и вклучуваат компресори, пумпи и метал.
„Денешната акција го проширува опфатот на царините на челик и алуминиум и ги затвора вратите за нивно заобиколување, поддржувајќи ја континуираната ревитализација на американската индустрија за челик и алуминиум“, порача заменик-секретарот за трговија, индустрија и безбедност Џефри Кеслер.
Производителите на челик поднесоа петиција до администрацијата да ги прошири царините со цел да ги опфатат дополнителни челични и алуминиумски автоделови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Катар го прифати извинувањето на Нетанјаху

Катар го поздрави извинувањето и ветувањето на израелскиот премиер Бенјамин Нетанјаху дека Израел нема повторно да изврши напад врз Доха, соопшти Белата куќа.
Нетанјаху претходно денеска од Белата куќа телефонски разговарал со катарскиот премиер Мохамед бин Абдурахман Ал Тани, извинувајќи се за нападот насочен кон раководството на Хамас, со кој била нарушена катарската сувереност.
Во заедничкото соопштение беше потврдено дека е воспоставен „трилатерален механизам“ за подобрување на односите. Катарскиот премиер ги поздравил гаранциите од Израел, нагласувајќи ја подготвеноста на Доха за понатамошна соработка во интерес на регионалната безбедност и стабилност.
Свет
„Ројтерс“: Нетанјаху му се извинил на Катар за нападот врз Доха

Израелскиот премиер, Бенјамин Нетанјаху, се извинил на Катар поради израелскиот воздушен напад врз Доха од почетокот на месецов, во кој цел биле функционери на Хамас, јави „Ројтерс“.
Според извор близок до израелскиот премиер, тој телефонирал со катарскиот премиер Мохамед бин Абдурахман Ал Тани од Белата куќа, каде што во исто време американскиот претседател Доналд Трамп остварил контакт со Катар.
Извинувањето доаѓа во момент кога Нетанјаху престојува во Вашингтон на средба со Трамп. Главна тема е новиот мировен план од 21 точка, со кој се предвидува прекин на огнот, ослободување на израелските заложници и воспоставување ново управување со Газа без учество на Хамас.
Катар претходно го осуди израелскиот напад како „подмолен“ и „груб прекршок на меѓународното право“. Во исто време, Нетанјаху е под силен притисок да го прифати американскиот план кој ја исклучува анексијата на Западниот Брег и бара формирање нова палестинска влада.
Свет
Осомничениот во случајот со Медлин Мек Кен: „Вратете ми го животот!“

Кристијан Брукнер, осомничен во истрагата за исчезнувањето на Медлин Мек Кен, за првпат јавно проговори по излегувањето од затвор. Во интервју за „Скај њуз“ рече дека е жртва на „лов на вештерки“ и побара да му се врати нормалниот живот.
„Не се чувствувам слободен. Носам нараквица и под 24-часовен надзор сум. Сакам ова да престане и некој да преземе одговорност,“ изјави Брукнер.
Тој се обиде да влезе во канцеларијата на германскиот обвинител Ханс Кристијан Волтерс, кој претходно јавно тврдеше дека има докази дека Брукнер ја киднапирал и убил Медлин, иако призна дека тие не се доволни за подигнување обвинение.
Брукнер (49) неодамна беше ослободен по издржана казна за друго кривично дело. Германските медиуми јавуваат дека по неговото ослободување бил сместен во привремено живеалиште, но по јавниот притисок и протестите на граѓаните, бил преместен од градот Нојминстер.
На директно прашање дали има врска со исчезнувањето на британското девојче, Брукнер одговори дека по совет на адвокатите нема да зборува на таа тема.
Тригодишното девојче исчезна од апартмански комплекс во Праја да Луз во Португалија на 3 мај 2007 година, што предизвика истрага низ цела Европа и стана еден од најпознатите случаи на исчезнати лица. Нејзините родители вечерале со пријателите во блискиот ресторан додека таа и нејзините помали браќа и сестри близнаци спиеле во станот. Нејзината мајка Кејт открила дека Медлин ја нема околу 22 часот по локално време.
Случајот останува нерешен, но германските обвинители велат дека имаат докази кои сугерираат дека Брикнер можеби бил во областа кога исчезнала Медлин. Волтерс рече дека иако тој и другите обвинители не веруваат дека имаат доволно докази за формално да го обвинат Брикнер во случајот Меккен, нивните напори ќе продолжат.