Свет
САД нема намера да ги укине санкциите за кинескиот министер за одбрана

САД не планираат да ги укинат санкциите за кинескиот министер за одбрана, Ли Шангфу, став што се чини дека отстапува од коментарите дадени еден ден претходно од претседателот Џо Бајден на самитот на Г-7 во Јапонија, пренесува „Ал Арабија“.
Говорејќи пред новинарите во Вашингтон, портпаролот на Стејт департментот, Метју Милер, негираше во понеделникот дека американската влада размислува за укинување на санкциите за Ли.
Тој додаде дека претседателот Бајден јасно кажал оти САД не планираат ниту размислуваат да укинат некои санкции кон Ли или кон Кина пошироко.
Прашан во неделата дали САД ќе ги укинат санкциите кон Ли за да може да се сретне со американскиот секретар за одбрана Лојд Остин, Бајден рече: „Тоа е во тек на преговори во моментов.
Освен тоа, Бајден изрази оптимизам дека односите меѓу САД и Кина ќе почнат да се затоплуваат откако соборувањето на наводниот кинески шпионски балон го спречи позитивниот моментум што произлезе од средбата меѓу американскиот претседател и кинескиот лидер Шји Џинпинг минатата година.
Тензиите меѓу двете нации остануваат високи на голем број фронтови.
Кина ги обвинува САД дека се обидуваат да го потиснат нејзиниот подем со ограничување на пристапот до напредна технологија и со поддршка на Тајван, за кој Пекинг тврди дека е нејзина територија.
Поради санкциите, Кина го отфрли барањето на Остин да се сретне со Ли следниот месец на Форумот за одбрана во Сингапур.
Но и покрај вжештената реторика, Белата куќа во последно време почна да комуницира со Кина на повеќе фронтови.
Американскиот советник за национална безбедност Џејк Саливан се сретна претходно овој месец со највисокиот кинески дипломат Ванг Ји во Виена, а кинескиот министер за трговија Ванг Вентао треба да се сретне неделава со американскиот министер за трговија, Џина Раимондо, во Вашингтон и со американската трговска претставничка Кетрин Таи во Детроит.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел со одговор на Британија: Промената на ставот го наградува Хамас и им штети на мировните напори

Министерството за надворешни работи на Израел реагираше на најавата на Велика Британија дека ќе ја признае Палестина доколку Израел не преземе конкретни чекори кон прекин на конфликтот во Газа и обновување на мировниот процес што води кон решение за две држави.
„Промената на ставот на британската влада во овој момент, по францускиот потег и внатрешниот политички притисок, претставува награда за Хамас и им штети на напорите за постигнување прекин на огнот во Газа и рамка за ослободување на заложниците“, се вели во соопштението на израелското Министерство за надворешни работи на X.
Британскиот премиер Кир Стармер го објави потенцијалниот потег неколку дена откако францускиот претседател Емануел Макрон изјави дека Париз ќе ја признае палестинската држава на Генералното собрание на Обединетите нации во септември.
Во официјалното соопштение од Даунинг стрит се наведува дека признавањето на Палестина е „неотуѓиво право на палестинскиот народ“ и дека ставот на британската влада отсекогаш бил дека признавањето ќе биде дел од поширокиот мировен процес, според медиумите.
Сепак, се наведува дека поради „сè понеподносливата ситуација во Газа и намалената надеж за мировен процес“, сегашниот контекст бара порешителна акција.
Стармер истакна дека признавањето ќе следи ако израелската влада не се согласи на итен и траен прекин на огнот, јасна посветеност на мировен процес што води кон решение за две држави и недвосмислена посветеност дека нема да има анексија на територија на Западниот Брег.
Тој, исто така, повтори дека „нема еквивалентност меѓу Израел и Хамас“ и дека барањата на Велика Британија кон Хамас остануваат: ослободување на сите заложници, прифаќање на прекин на огнот, откажување од каква било политичка улога во идното управување со Газа и целосно разоружување.
Фото: принтскрин
Свет
Велика Британија: Ќе ја признаеме Палестина во септември ако Израел не се согласи со нашите услови

Велика Британија ќе признае палестинска држава во септември ако Израел не се согласи на прекин на огнот во Газа, не дозволи помош од ОН и не преземе други чекори кон долгорочен мир, објави британскиот премиер Кир Стармер, според светските медиуми.
Стармер свика редок летен состанок на кабинетот за да се разговара за ситуацијата во Газа.
Тој им рече дека Велика Британија ќе ја признае државата Палестина пред Генералното собрание на Обединетите нации, „освен ако израелската влада не преземе значајни чекори за да ја заврши ужасната ситуација во Газа, не постигне прекин на огнот, не вети дека нема да има анексија на Западниот Брег и не се обврзе на долгорочен мировен процес што ќе обезбеди решение за две држави“.
Тој исто така рече дека Хамас мора да ги ослободи сите заложници што ги држи, да се согласи на прекин на огнот, „да прифати дека нема да игра никаква улога во владата на Газа и да се обврзе на разоружување“. Во телевизиска изјава, Стармер рече дека неговата влада ќе го процени „степенот до кој страните ги исполниле овие чекори“ во септември пред да донесе конечна одлука за признавање.
Велика Британија долго време ја поддржува идејата за постоење на независна палестинска држава покрај Израел, но верува дека признавањето треба да дојде како дел од договореното решение за конфликтот.
Притисокот за формално признавање на палестинската државност се зголеми откако францускиот претседател Емануел Макрон објави дека неговата земја ќе стане првата голема западна сила што ќе признае палестинска држава.
Повеќе од 250 од вкупно 650 пратеници во Долниот дом потпишаа писмо со кое ја повикуваат британската влада да признае палестинска држава. Стармер истакна дека и покрај условите што ги поставил, Велика Британија верува дека „државноста е неотуѓиво право на палестинскиот народ“, пренесуваат агенциите.
Фото: принтскрин
Регион
Млад човек се удави во Улцињ: трагедија во Црна Гора

Млад човек се удави во Улцињ денеска, во попладневните часови, јавуваат медиумите во регионот.
Според написите, давењето се случило на „Големата плажа“.
Засега нема информации за идентитетот на загинатиот.
Според последните извештаи било подигнато црвено знаме бидејќи имало големи бранови во морето.