Свет
САД против дозволата за постојано присуство на доселениците на Западниот Брег

Администрацијата на Бајден во неделата го прекори Израел поради одредбата со која им се дозволува на еврејските доселеници да воспостават постојано присуство во населба на Западниот Брег, пренесува „Тајмс оф Израел“.
Началникот на Централната команда на израелската армија потпишал одредба во четвртокот со која им се дозволува на Израелците да влезат во областа Хомеш, отворајќи пат за формирање формална населба таму.
Стејт департментот во неколку наврати го повика Израел да се воздржи од какви било потези кои ги ескалираат тензиите со Палестинците, како што е формализирањето на доселеничките населби и конкретно го предупреди да ја избегне легализацијата на нелегалната населба во Хомеш.
„Длабоко сме вознемирени од одредбата на израелската влада со која им дозволува на своите граѓани да воспостават постојано присуство во населбата Хомеш на северниот дел на Западниот Брег, која според израелскиот закон е незаконски изградена на приватна палестинска земја“, рече портпаролот на Стејт департментот, Метју Милер.
Одредбата не е во согласност со обврските на израелската влада преземени во 2004 година и во поново време пред претставниците на администрацијата на Бајден, додаде Милер.
Advancing Israeli settlements in the West Bank is an obstacle to peace and the possibility of a two-state solution. We further underscore the imperative of maintaining the historic status quo at the holy sites in Jerusalem. https://t.co/FvMYU0YexY
— Matthew Miller (@StateDeptSpox) May 21, 2023
Амбасадата на Израел во Вашингтон не одговорила на барањето за коментар.
Израелски функционер, кој инсистирал на анонимност, рекол дека споменатата одредба има за цел да им овозможи на Израелците да продолжат да го посетуваат постоечкото верско училиште во Хомеш и дека владата нема намера да ја обнови населбата или да дозволи израелско присуство на приватна палестинска земја.
Прекорот од страна на САД доаѓа по неколкумесечното ескалирање на насилството меѓу Израелците и Палестинците кои ги тестираа врските меѓу Вашингтон и неговиот клучен сојузник на Блискиот Исток.
Претходно во неделата, израелскиот министер за безбедност Итамар Бен-Гвир, кој е дел од екстремно десничарската влада што дојде на власт во декември, го посети комплексот на џамијата Ал Акса – свето место и за муслиманите и за Евреите – и изјави дека Израел е надлежен таму.
Милер истакна дека Вашингтон е подеднакво загрижен и поради провокативната посета на Бен-Гивр и неговата подбуцнувачка реторика.
„Ова свето место не треба да се користи за политички цели и ги повикуваме сите страни да ја почитуваат неговата светост“, рече Милер, потврдувајќи ја и американската позиција дека на светите места во Ерусалим треба да се задржи статус кво.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Сѐ повеќе луѓе остануваат без работа поради вештачката интелигенција – најголем удар врз младите

„Мајкрософт“ годинава отпушти повеќе од 15.000 луѓе, од кои 9.000 само во јули – што е околу 7 отсто од вкупната глобална работна сила – и покрај тоа што забележа квартален профит зголемен за речиси 25 проценти и пазарна вредност што ја надмина границата од 4 трилиони долари.
Извршниот директор Сатја Надела вели дека „Мајкрософт“ напредува одлично, но паралелниот бран отпуштања отвора прашања за иднината на работата во ерата на вештачката интелигенција (ВИ), пишува „Фајненшлл тајмс“.
Според анализата на уредничката Анјли Равал, улогата на ВИ во корпоративното реструктурирање станува сѐ поочигледна. Компаниите веќе не се задоволуваат со тоа да прават повеќе со помалку луѓе – сега се подготвуваат за период во кој за голем дел од работните позиции едноставно повеќе нема да има потреба.
ВИ е сѐ поприсутна, а работните места исчезнуваат
Иако деловните лидери тврдат дека ВИ ги редизајнира работните места, бројките говорат поинаку. „Интел“ и „БТ“, меѓу другите, објавија илјадници отпуштања директно поврзани со вештачката интелигенција. „Мајкрософт“ иако тоа не го наведува експлицитно, истовремено отпушта илјадници вработени додека бележи рекордна добивка. Порано, отпуштањата се претставуваа како неопходно зло, но денес директорите ги претставуваат како знак на напредок, наведува „Фајненшл тајмс“.
Во технолошката индустрија, приходот по вработен стана престижна мерка. Американскиот стартап-акцелератор „Ј Комбинатор“, преку кој поминаа компании како „Ербиенби“ и „Дропбокс“, ја промовира идејата дека успешна фирма може да се изгради со само неколкумина вработени. Финансиските медиуми истакнуваат дека стартапите често се фалат со милионски приходи, иако имаат минимални тимови.
Алтман: Наскоро компанија вредна милијарда долари со само еден вработен
Коосновачот на „Опен АИ“, Сем Алтман, предвиде дека наскоро може да се појави компанија вредна милијарда долари, управувана од само една личност. Иако тоа сѐ уште звучи футуристички, големите јазични модели како „Чат ГПТ“, „Џемини“ и „Грок“ веќе го менуваат пазарот на трудот – особено во канцелариските работи. Многу позиции веќе се укинати бидејќи, според компаниите, „тие задачи повеќе не постојат“.
„Фајненшл тајмс“ наведува пример на голема ревизорска компанија која со помош на ВИ го скратила времето за изработка на извештаи за 75 отсто и „ослободила“ 3.600 часа аналитичка работа. И вработувањето на програмери драстично е забавено.
Најпогодени се младите
Равал предупредува дека цели слоеви на пониски позиции исчезнуваат, а со нив и традиционалните патеки за кариерен развој. Најпрвин се укинуваат почетните работни позиции и практикантства, но полека исчезнуваат и многу места во средниот менаџмент.
„Растот на ВИ може да го ограничи закрепнувањето на вработувањето во некои административни улоги“, вели за ФТ, Дирк Хан, извршен директор на меѓународната агенција за вработување „Хајс“.
Вредноста на универзитетските дипломи станува сѐ пооспорувана, а кариерните патеки стануваат искривени и нелинеарни. Фриленсингот и краткорочните ангажмани дополнително го фрагментираат пазарот на труд – а ВИ го забрзува овој тренд.
Дали сведувањето на работната сила на минимум е навистина поотпорно?
Помал број луѓе значи пониски трошоци и побрза реализација, но и потенцијално послаба отпорност на шокови – како прекини во синџирите на снабдување или заминување на стручни кадри. Равал го наведува примерот на шведската компанија „Кларна“, која отпушти илјадници вработени, но сега тестира враќање на луѓе во корисничката поддршка бидејќи ВИ-системите потфрлиле при реална интеракција со клиентите.
Технолошките претприемачи кои промовираат фирми со минимален број вработени потценуваат колку што деловните процеси и корпоративната култура се всушност засновани на човечки односи и интеракција. Иако ВИ навистина може да преземе рутински задачи, треба повторно да се научиме да го цениме она човечко – креативноста, емоционалната интелигенција и сложеното расудување, пишува ФТ.
Но тоа е можно само ако вложуваме во оние што ги носат тие квалитети и ја подготвуваме новата генерација работници – а моментално многу врати се затвораат пред воопшто да има шанса да бидат отворени, заклучува авторката.
Свет
Синот на Нетанјаху го навреди катарскиот емир и неговата мајка: Модерен Хитлер и Гебелс

Јаир Нетанјаху, синот на израелскиот премиер Бенјамин Нетанјаху, го нарече емирот на Катар, Тамим бин Хамад Ал Тани, и неговата мајка Моза бинт Насер – „модерен Хитлер и Гебелс“.
Според објавата на платформата Икс (поранешен Твитер), тој напиша:
„Катар е главната сила зад брановите на антисемитизам каков што не сме виделе од 1930-тите и 1940-тите. Катар е модерна нацистичка Германија. Секој Евреин во светот е во сериозна опасност поради децении катарско оцрнување на Евреите и еврејската држава, поддржано со милијарди долари што тие ги вложуваат.“
Оваа изјава доаѓа во момент кога повторно има застој во преговорите за заложниците, каде посредува Катар.
Американскиот сенатор Марко Рубио неодамна ги отфрли критиките кон Катар, нагласувајќи дека Доха одиграла корисна улога во тие преговори.
Критичарите укажуваат на блиските врски на Катар со Хамас и неговото финансирање на појасот Газа, што, според нив, индиректно ѝ овозможило на организацијата да го зајакне својот арсенал за напади врз Израел.
Катар возвраќа дека и Израел и САД лобирале кај нив да исплаќаат средства за да се избегне хуманитарна криза во Газа.
Во меѓувреме, неколку помошници на израелскиот премиер се под истрага за наводни активности поврзани со заливската држава.
Свет
Зеленски ги посети војниците на бојното поле: „Тие се борат против платеници од Азија и Африка“

Претседателот на Украина, Володимир Зеленски изјави дека руските сили што се борат во близина на градот Вовчанск во Харковската област вклучуваат странски платеници од Кина, Таџикистан, Узбекистан, Пакистан и неколку африкански земји.
За време на посетата на 57. Одделна моторизирана пешадиска бригада, која го брани секторот Вовчанск, Зеленски се сретна со командантите за да разговара за ситуацијата на бојното поле, борбените операции и потребата од пешадија.
Во Вовчанск, кој е на само пет километри од руската граница, се водат интензивни борби откако Русија почна нова копнена офанзива во регионот Харков во мај 2024 година.
„Војниците на овој фронт го забележуваат учеството на платеници од Кина, Таџикистан, Узбекистан, Пакистан и африканските земји во војната. Ние ќе одговориме“, рече Зеленски.
Тој додаде дека разговарал за регрутирање и зголемување на пристапот до технологијата на беспилотни летала, клучен фактор во тековните напори на Украина за одбрана и извидување.
Во април, Зеленски рече дека „неколку стотици“ кинески граѓани учествуваат во војната на страната на Русија. Кина негираше вмешаност, велејќи дека ги повикува своите граѓани да избегнуваат вооружен конфликт. Москва, исто така, употреби околу 12.000 севернокорејски војници распоредени од Пјонгјанг за да се спротивстави на украинската инвазија на регионот Курск.