Свет
САД разгледуваат санкции пред судот во Хаг; Кремљ: Многу необично

Кремљ го опиша како крајно невообичаено тоа што САД размислуваат за санкции против Меѓународниот кривичен суд (МКС), чиј обвинител побара налози за апсење на израелскиот премиер Бенјамин Нетанјаху, неговиот министер за одбрана и тројца лидери на Хамас за наводни воени злосторства.
Обвинителот на МКС, Карим Кан, во изјавата објавена по повеќе од седум месеци војна во Газа рече дека има разумна основа да верува дека петтемина мажи носат кривична одговорност за наводни воени злосторства и злосторства против човештвото.
Американскиот претседател Џо Бајден го нарече правниот потег срамен, а државниот секретар Антони Блинкен предупреди дека тоа може да ги загрози преговорите за договор за заложници и прекин на огнот. Некои американски претставници ги повикаа САД да воведат санкции против судот. Во 2020 година Соединетите Држави воведоа санкции против обвинителот на МКС.
„Ситуацијата во која САД имаат став и подготвеност да го користат методот на санкции, дури и против Меѓународниот кривичен суд, е повеќе од невообичаена“, изјави за новинарите портпаролот на Кремљ, Дмитриј Песков.
Во март минатата година МКС издаде налози за апсење на претседателот Владимир Путин под обвинение за воени злосторства. Руските власти оценуваат дека налогот за апсење на Путин е бесмислен обид на Западот да го наруши угледот на Русија и да го негира извршувањето на воените злосторства во Украина.
Украина ја обвинува Русија за воени злосторства. Русија вели дека Западот ги игнорира злосторствата извршени од Украина, што Киев го негира. Минатата година Бајден ја оцени како оправдана одлуката на МКС да издаде налог за апсење на Путин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.