Свет
САД разнесоа древни индијански гробишта поради изградба на ѕид со Мексико

Градежни работници разнесоа древни индијански гробишта во Аризона за да можат на нивно место да подигнат граничен ѕид меѓу САД и Мексико.
Американските власти потврдија дека било извршено контролирано минирање во природниот резерват Organ Pipe Cactus National Monument, признаен од УНЕСКО.
Раул Гријалва, демократски застапник, рече дека тоа е богохулење и дека властите не се консултирале со владејачкото тело на племето Тохоно Одам, кое го населувало ова подрачје уште од дамнина.
Еколошките организации веќе извесно време предупредуваат за штетата што таа градба ќе им ја нанесе на подземните води, но и за миграцијата на дивиот свет во пустинскиот регион на околу 185 км западно од Туксон.
Властите велат дека на подрачјето на националниот парк е предвидено да се изгради ѕид висок 9 метри на потег од 90 километри, пренесува Би-би-си.
Според интерниот извештај на Националната служба на паркот објавен од „Вашингтон пост“, администрацијата на Трамп би можела да уништи дваесет археолошки локалитети за време на изградбата на граничниот ѕид во резерватот „Organ Pipe“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Парламентот во Бугарија одби воведување на еврото

Претседателката на бугарскиот парламент, Наталија Киселова, го отфрли предлогот на претседателот Румен Радев за организирање референдум за воведување на еврото, велејќи дека тоа е спротивно на уставот, објави бугарската новинска агенција БТА.
Радев предложи одржување референдум за воведување на еврото следната година.
„Дали се согласувате дека Бугарија треба да ја воведе единствената европска валута „евро“ во 2026 година?“ е прашањето што би се поставило.
Владата го критикуваше ова, а еден министер рече дека тоа е обид за саботирање на нејзините напори за воведување на еврото.
Враќајќи го предлогот, Киселова рече дека тој е неконзистентен со неколку членови од бугарскиот устав и договорите на ЕУ, како и со одлуката на бугарскиот Уставен суд.
Бугарскиот Уставен суд претходно го отфрли барањето за организирање референдум за воведување на еврото.
Бугарската влада планира да го воведе еврото во јануари доколку Европската комисија и Европската централна банка во јуни оценат дека земјата ги исполнила сите критериуми.
Свет
Америка потврди: Ако дојде Путин, доаѓа и Трамп

Специјалниот претставник на американскиот претседател Доналд Трамп за Украина, пензионираниот генерал Кит Келог, изјави дека САД се надеваат на пристигнување на Владимир Путин на преговорите во Истанбул. Ако тоа се случи, рече тој, самиот претседател Трамп ќе дојде.
„Сакаме да постигнеме сеопфатен прекин на огнот во Украина, а дури потоа да ги отвориме прашањата за територијата“, изјави Келог за „Фокс бизнис“.
Американските медиуми претходно објавија дека одлуката на Трамп да дојде во Истанбул зависи од тоа дали Путин ќе се појави на разговорите.
Администрацијата на Трамп потврди претходно денес дека ќе ги испрати Келог и Стив Виткоф во Турција за да ги претставуваат САД во потенцијалните преговори меѓу Русија и Украина.
Свет
Мерц: ЕУ е подготвена да воведе построги санкции кон Русија доколку нема напредок во преговорите

Европската унија е подготвена да воведе построги санкции против Русија доколку оваа недела не се постигне напредок во преговорите за прекин на војната во Украина, изјави денес германскиот канцелар Фридрих Мерц, наведувајќи дека веќе е подготвен нов пакет санкции.
Мерц на прес-конференција по разговорите со својот грчки колега Киријакос Мицотакис во Берлин изјави дека Брисел чека рускиот претседател Владимир Путин да се вклучи во преговорите и дека санкциите ќе бидат заострени доколку нема вистински напредок во преговорите оваа недела, објави Ројтерс.
Германскиот канцелар изјави дека ЕУ ќе разгледа и воведување нови санкции против Русија во областа на енергетиката и финансискиот пазар. Мерк оцени дека би било неразумно доколку украинскиот претседател Володимир Зеленски се согласи на нови компромиси во врска со преговорите и изјави дека се согласува Зеленски да се сретне со руските претставници во четврток.
Портпаролот на Кремљ, Дмитриј Песков, денес изјави дека подготовките на Русија за преговорите со Украина во Истанбул продолжуваат. Песков истакна дека Кремљ не планира да дава други коментари за планираната руско-украинска средба во Истанбул, објави Тасс.
Путин предложи продолжување на директните преговори со Украина без предуслови, кои беа прекинати во 2022 година, и дијалогот да започне на 15 мај во Истанбул.
Зеленски се согласи на разговорите во Турција на 15 мај, но од самиот почеток рече дека сака лична средба со Путин. Русија сè уште не објавила на кое ниво ќе учествува, пренесува Танјуг