Свет
Само Јужнокорејците со ковид-пасош ќе може да се вратат во секојдневниот живот
Сеул објави дека ќе издава дигитални сертификати со кои ќе се потврди статусот на вакцинација на лицата вакцинирани против Ковид-19, со што стана последната нација што ја донесе контроверзната мерка како средство за повторно отворање на прекуграничното патување, пренесува РТ.
Јужна Кореја ќе промовира апликација за паметен телефон овој месец, што ќе може да покаже дали некој примил вакцина, рече премиерот Чунг Сје-Кјун. Системот ќе користи блокчејн-технологија за заштита од потенцијална кражба на идентитетите.
„Воведувањето пасош за вакцина или т.н. зелена попусница ќе им овозможи на оние што се вакцинирани да му се вратат на секојдневен живот“, истакна премиерот.
Тој додаде дека Јужна Кореја ги следи другите нации, кои тврдат дека развиле системи способни да го проверат статусот на вакцинација, без да складираат други приватни информации.
Од почетокот на националната кампања за вакцинација против Ковид-19, Јужна Кореја вкцинира повеќе од 850.000 луѓе. Целта е да се вакцинираат 12 милиони граѓани до јуни.
Земјите во светот имаат имплементирано слични системи и за домашна употреба и за олеснување на меѓународните патувања. Кина и ЕУ почнаа да издаваат дигитални пасоши за вакцини што ќе се користат при преминување на границите.
Во други земји, како Израел, потребен е и сертификат за вакцина за да се добие влез во одредени места и да се извршат специфични активности.
Имаше повици за создавање стандарден систем за ковид-пасоши што може да се користи во целиот свет. Членовите на Г7, меѓувладина група која се состои од најголемите индустриски развиени земји во светот, наводно размислуваат за универзална здравствена легитимација.
Сепак, сè уште постои многу противење на идејата, која беше жестоко критикувана како дискриминаторска и нарушување на приватноста. На пример, гувернерот на Флорида, Рон Десантис, вети дека ќе издаде извршна наредба со која ќе се забранат вакциналните пасоши отфрлајќи го концептот како непотребно пречекорување на овластувањата на владата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Израелскиот амбасадор во ОН до специјалната известувачка: „Вие сте вештерка, се обидувате да нѐ проколнете“
Седницата на Третиот комитет на Генералното собрание на Обединетите нации се вжешти откако израелскиот амбасадор во ОН, Дани Данон, остро ја нападна специјалната известувачка Франческа Албанезе поради нејзиниот извештај во кој Израел се обвинува за кршење на човековите права и за меѓународната поддршка што ја добива.
„Госпоѓо Албанезе, секојпат кога се обидувате да го проколнете Израел со лаги и клевети, вашите клетви не успеваат. Вие сте вештерка, а овој извештај е уште една страница во вашата книга на волшепства“, изјави Данон обраќајќи ѝ се преку видео-врска.
Албанезе не можеше лично да присуствува на седницата, бидејќи САД ѝ воведоа санкции и ѝ ја укинаа визата во јули, со образложение дека вршела „нелегитимен притисок врз Меѓународниот кривичен суд“ за постапки против американски и израелски функционери.
Во најновиот извештај, Албанезе остро го критикува Израел, но и обвинува повеќе држави — меѓу нив САД, Велика Британија, Германија и Унгарија — дека се соучесници поради дипломатска или воена поддршка на Израел.
Канада, Австралија и Нов Зеланд се обвинети дека ги „ослабуваат“ резолуциите на ОН што го критикуваат Израел, додека Франција, Италија, Хрватска и Грција се спомнати затоа што му дозволиле на премиерот Бенјамин Нетанјаху да користи нивен воздушен простор и покрај налогот за апсење од Меѓународниот кривичен суд.
Извештајот ги споменува и неколку арапски и муслимански земји, меѓу кои Египет, Јордан, Катар, Саудиска Арабија, Турција, Индонезија, Пакистан и ОАЕ, поради поддршка на мировниот план на Доналд Трамп, кој, според Албанезе, „олеснува нов облик на окупација“.
Свет
Кралот Чарлс му ги одзема титулите на принц Ендру и го сели од кралската резиденција
Британскиот крал Чарлс официјално покрена постапка за одземање на сите титули и почести на принцот Ендру, како и негово селење од резиденцијата „Ројал лоџ“, јави Си-Ен-Ен.
Одлуката уследи по нови реакции во јавноста поради поврзаноста на Ендру со осудениот сексуален преступник Џефри Епштајн и објавувањето на мемоарите на Џуфре, која го обвини принцот за сексуално злоставување додека била тинејџерка, обвинение што тој го негира.
Во соопштение на Бакингемската палата се наведува дека „Неговото Височество денес започна формална постапка за одземање на стилот, титулите и почестите на принц Ендру“ и дека тој отсега ќе биде познат како Ендру Маунтбатен Виндзор.
Палатата потврди дека Ендру ќе мора да се исели од резиденцијаа и да се пресели во приватен престој, додека неговите ќерки, принцезите Евгенија и Беатрис, ги задржуваат своите титули.
Во изјавата се нагласува дека „кралското семејство останува со мислите и најдлабокото сочувство со жртвите и преживеаните на сите облици на злоупотреба“.
Јавноста со остри реакции го коментира случајот, особено по откритијата дека Ендру за резиденцијата платил симболичен износ и плаќал минимална кирија, иако од 2019 година не е активен член на кралското семејство.
Свет
Саграда Фамилија официјално стана највисока црква во светот
Познатата барселонска базилика Саграда Фамилија од денес е и официјално највисоката црква во светот, откако беше поставен новиот дел од централната кула, пренесе „Гардијан“.
Делото на Антонио Гауди сега се издига на 162,91 метар, со што ја надмина катедралата во германскиот Улм, висока 161,53 метра. Во следните месеци се очекува кулата на Исус Христос да ја достигне својата крајна висина од 172 метра.
Темелите на базиликата се поставени во 1882 година, а Гауди починал пред да го види проектот завршен.
Последните децении работите се забрзани благодарение на милионите туристи што ја посетуваат црквата; минатата година ја разгледале 4,9 милиони луѓе, а приходите од билетите целосно се користат за финансирање на изградбата.
Комплетното завршување на Саграда Фамилија се очекува околу 2035 година, а 2026 ќе се одбележи 100-годишнината од смртта на Гауди со низа културни настани.

