Свет
Свештеник кој тврдел дека короната е хистерија отишол да проповеда и починал од вирусот

Пасторот Ландон Спредлин, кој велел дека коронавирусот е хистерија и отишол во Њу Орлеанс да проповеда за време на фестивалот Марди Грас, починал еден месец подоцна.
Сопругата, четирите ќерки и синот на пасторот велат дека се надеваат оти ќе може да одржат голема церемонија во негова чест.
Засега можеле да направат само погреб на кој имало пет лица, вклучувајќи и блуз-гитарист кој свирел на гробиштата.
Пред нешто повеќе од еден месец, пасторот Спредлин (66) се возел со сопругата Џин од нивниот дом во Вирџинија до 1.500 километри оддалеченото место каде со одржува Марди Грас, јавува Би-би-си.
Пасторот велел дека има намера да ги спаси душите на некои од стотиците илјади луѓе кои присуствуваат на овој фестивал.
Му се придружиле и две од неговите ќерки кои дошле од Тексас.
„Неговата мисија беше да оди во пабови, клубови и барови, да свири блуз, да се поврзе со музичарите и да им порача дека Исус ги сака“, вели 28-годишната Џеси Спредлин.
На Марди Грас, фамилијарниот бенд свирел на плоштадот Џексон во Њу Орлеанс, плоштад полн со луѓе, а денес, од семејството на пасторот велат дека не биле свесни за заканата од зараза.
Иако минал повеќе од еден месец од првиот случај на коронавирус во САД, Марди Грас продолжил според планираното.
Пастор Спредлин бил еден од оние кои се разболеле, но тестот покажал дека е негативен на Ковид-19. Дури и додека бил болен, тој на социјалните мрежи објавил дека вирусот е хистерија.
На 13 март, Спредлин на „Фејсбук“ споделил лажнa вест во која се споредуваат смртните случаи од свински грип и оние од коронавирус.
Тој утврдил дека медиумите кон Барак Обама и Доналд Трамп постапуваат многу различно и дека се работи за политички мотивиран заговор со цел да му се наштети на претседателот Трамп.
Синот на пасторот смета дека неговиот татко бил под влијание на изборната година.
„Сакам да кажам искрено, тато не сметаше дека ова е измама, тој знаеше дека се работи за вистински вирус“, вели Ландон Исак.
„Тој веста на Фејсбук ја објави затоа што беше фрустриран што медиумите шират страв како основно средство за комуникација“, додава синот на пасторот.
Сепак, кон средината на март, здравјето на пастор Спредлин одеднаш се влошило. Тој и неговата сопруга решиле од Њу Орлеанс да тргнат кон нивниот дом во Вирџинија.
Пасторот бил пренесен во болница во Северна Каролина, каде било констатирано дека развива пневмонија во белите дробови, а новиот тест покажал дека е позитивен на коронавирус.
По осум дена на интензивна нега, пасторот Ландон Спредлин починал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Европа
Човек на Трамп: Предлогот на Путин е апсурден

Кит Келог, специјалниот претставник на американскиот претседател Доналд Трамп за Украина и Русија, го отфрли предлогот на рускиот претседател Владимир Путин за тридневен прекин на огнот. Келог истакна дека Вашингтон бара долгорочно примирје.
Коментирајќи го напредокот на мировните преговори во последните денови, тој изрази верување дека САД „се во прилично добра позиција кога станува збор за Украинците“. „А тридневно примирје е апсурдно“, нагласи тој, осврнувајќи се на предложеното примирје од 8 до 10 мај.
Тој додаде дека Трамп се залага за сеопфатен прекин на огнот „на море, во воздух и на копно“ што ќе трае најмалку 30 дена. „И потоа можеме да го продолжиме“, изјави тој.
„Кога ќе погледнете на сè околу што Украинците се подготвени да соработуваат, сега е до Русите, до Путин. Имаме една страна, ни треба друга страна. И мислам дека сме блиску“, продолжи тој.
Путин најави уште едно примирје кое ќе започне на полноќ на 8 мај и ќе трае до полноќ на 11 мај. Италијанската премиерка Џорџа Мелони изјави дека тридневното примирје објавено од Кремљ не е доволно, туку дека е потребен праведен и траен мир.
Британската одбранбена разузнавачка агенција верува дека тридневниот прекин на огнот што го објави Путин на Денот на победата има за цел да ја прикаже Русија како отворена за преговори и да ги ограничи украинските напади со долг дострел.
Свет
Израелски министер: Војната нема да заврши сè додека стотици илјади луѓе не ја напуштат Газа

Израелскиот министер за финансии, Безалел Смотрич, изјави денес дека Израел нема да ја заврши војната во Појасот Газа сè додека стотици илјади Палестинци не ја напуштат енклавата.
„Ќе ја завршиме оваа кампања кога Сирија ќе биде уништена, Хезболах ќе биде тешко поразен, Иран ќе биде лишен од својата нуклеарна закана, Газа ќе биде исчистена од Хамас и кога стотици илјади жители на Газа ќе избегаат во други земји, нашите заложници ќе бидат вратени, некои во своите домови, а некои во гробовите на Израел“, рече Смотрич за време на говорот во населбата Ели во централниот Западен Брег.
Тој изјави дека ова не се само цели на владата, туку и консензус на израелскиот народ и војниците. Смотрич апелираше до премиерот Бенјамин Нетанјаху да „направи сè за да ја зајакне безбедноста на Израел“ и го предупреди да не „ја пропушта оваа можност“.
Израелската војска го обнови нападот врз Газа на 18 март, прекршувајќи го договорот за прекин на огнот и размена на затвореници со палестинската милитантна група Хамас од 19 јануари.
Над 52.300 луѓе, претежно жени и деца, се убиени во Газа во израелската офанзива од октомври 2023 година, која започна по нападот на Хамас врз Израел на 7 октомври 2023 година, во кој беа убиени 1.300 луѓе.