Свет
Сергеј Скрипал работел за четири разузнавачки агенции на НАТО
Поранешниот руски шпион Сергеј Скрипал работел за разузнавачките служби на четири членки на алијансата, објави магазинот „Фокус“ цитирајќи извор во Заедничката команда за контраразузнавање на НАТО (ACCI). Според „Фокус“, Скрипал во тоа време разоткрил неколку активни шпиони на руската воена разузнавачка служба (ГРУ).
Списанието истакна дека Скрипал во 2012 година патувал во Прага заедно со агентите на МИ6 за да ги информира локалните разузнавачки агенции за активна руска шпионска мрежа. Се вели дека Скрипал познавал некои од овие руски шпиони од времето на неговата служба во ГРУ. Освен тоа, списанието тврди дека во 2016 година информациите што ги обезбедил Скрипал за естонските безбедносни служби им овозможиле откривање тројца руски шпиони вклучувајќи ги и еден етнички руски офицер во естонската армија и неговиот татко. Се тврди и дека Скрипал обезбедил информации за шпанскиот Национален разузнавачки центар.
Во средината на 90-тите, додека служел во ГРУ, Скрипал бил регрутиран од британските разузнавачки служби и почнал да ги обелоденува идентитетите на стотици руски разузнавачи од својата клучна позиција како в.д. директор на Одделот за персонал на ГРУ. Пензионирајќи се како полковник во 1999 година, се вработил како државен службеник во Москва.
Кон крајот на 2004 година руската Федерална безбедносна служба (ФСБ) го уапси Скрипал под обвинение за државно предавство. Тој беше осуден на 13 години затвор во 2006 година и му беа одземени чинот и одликувањата. Во јули 2010 година Скрипал и тројца други руски државјани затворени за шпионажа беа ослободени во замена за 10 руски агенти уапсени во САД. Скрипал, кој беше амнестиран од претседателот Дмитриј Медведев, ја напушти Русија и се пресели во Солсбери во Велика Британија во 2011 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Романскиот премиер Чиолаку води во првиот круг од претседателските избори
Романскиот премиер, Марсел Чиолаку и кандидатката на десниот центар Елена Ласкони освоија најмногу гласови во првиот круг од претседателските избори во Романија, покажуваат излезните анкети и тие треба да одат во вториот круг.
Социјалдемократот Чиолаку, според проекциите, освоил околу 25 отсто од гласовите, додека Ласкони околу 18 отсто. Вториот круг од изборите е закажан за 8 декември.
Чолаку пред првиот круг од изборите беше фаворит меѓу 14 кандидати.
Најдобри изгледи имаа кандидатот на либерално-конзервативната реформска партија Ласкони која според излезните анкети доби 16 отсто и Џорџ Симион од екстремната десница кој доби 15 отсто од гласовите.
Претседателот ја одредува надворешната и безбедносната политика на земјата-членка на ЕУ, е врховен командант на армијата и е вклучен во проверките на тајните служби.
Клаус Јоханис е претседател 10 години и не може повторно да се кандидира.
Свет
Шефот на дипломатијата на ЕУ: Мора да го зголемиме притисокот врз Израел и Хезболах
Шефот за надворешни работи и безбедност на ЕУ, Жозеп Борел, повика на поголем притисок врз Израел и Хезболах за да се договори примирје меѓу завојуваните страни.
„Се сретнав со либанскиот премиер Наџиб Микати за да разговарам за итни чекори за ставање крај на конфликтот“, напиша тој на „Икс“ во неделата.
„Мораме да го зголемиме притисокот врз Израел и Хезболах за тие да се согласат со американскиот предлог за прекин на огнот“, додаде Борел, кој го посети Бејрут.
„Израелската армија збриша 37 села во јужен Либан и продолжува да фрла бомби врз центарот на Бејрут“, рече тој. Ова мора да престане, како и нападите на Хезболах врз израелските заедници, додаде.
Без прекин на огнот, ниту Израелците ниту раселените во Либан не можат да се вратат во своите домови, напиша Борел на „Икс“ по неговите разговори со либанското раководство.
Борел се состана со Микати и со претседателот на парламентот Набих Бери, комесар на проиранската милиција Хезболах.
Соединетите држави со недели вршат притисок за примирје меѓу шиитските милиции и Израел. Посредникот Амос Хохштајн оваа недела повторно отпатува во Либан и Израел за да ги продолжи преговорите.
Хезболах го нападна Израел со силен ракетен оган во неделата, откако еден ден претходно во жесток израелски воздушен напад загинаа најмалку 29 луѓе во Бејрут.
Израел во неделата ги нападна јужните предградија на Бејрут, контролирани од Хезболах, каде што интензивното бомбардирање во последните две недели се совпадна со знаците за напредок во преговорите за примирје на САД.
Хезболах, кој претходно вети дека ќе одговори на нападите врз Бејрут со таргетирање на Тел Авив, соопшти дека истрелал наведувани проектили врз воените постројки во и околу Тел Авив.
Свет
Будистички манастир под истрага: 41 тело откриено во Тајланд
Будистичкиот манастир во централен Тајланд е под истрага по откривањето на 41 тело за кои се верува дека биле користени за специјална практика на медитација, соопшти полицијата.
Телата се откриени во саботата во манастирот Па Нахон Чаибоворн во централниот дел на земјата, соопшти полицијата, додавајќи дека кај секое тело биле пронајдени документи – потврда за смрт и потврда за донација тело.
Полицијата треба да провери кај семејствата на починатите дали доброволно ги дале телата.
„Сакаме да се увериме дека ниедно тело не е украдено“, соопшти полицијата.
Потрагата беше почната неколку дена откако полицијата во средата откри 12 тела во друг манастир во соседна провинција, објавија локалните медиуми.
Поглаварот на манастирот во провинцијата Фичит, каде што беа пронајдени 41 труп, Ајарн Саифон Фандито, рече дека употребата на труповите е дел од „техниката на медитација“ што тој ја развил.
„Многу од оние кои доаѓаат да учат се верници и сите овие монаси го пренесуваат тоа знаење. Не знам колку од нив ја прифатија мојата техника“, рече тој.
Поглаварот на манастирот рече дека „практичарите медитираат во павилјони во кои има ковчези со човечки останки“.
Полицијата во Фичит соопшти дека работи со властите во другите провинции за да утврдат дали оваа практика е широко распространета.
Овој метод на контемплативна медитација со трупови во различни фази на распаѓање се појавила во Тајланд во 18 век и била широко распространет до 20 век кога почнала да исчезнува.