Францускиот претседател Емануел Макрон изјави дека е подготвен да го поддржи воведувањето нови санкции против Русија во наредните денови доколку Москва не се согласи на прекин на огнот. Тој ги спомена финансискиот сектор и индустријата за нафта и гас како можни цели на санкции.

„Нашата намера е да воведеме нови санкции против Русија во наредните денови“, рече Макрон во вечерното интервју за телевизијата TF1.

Коментарите на Макрон уследија по слични пораки од Лондон, Берлин и Варшава – сите три земји најавија нови мерки во сабота доколку Русија не се согласи на 30-дневен безусловен прекин на огнот, кој требаше да стапи на сила на почетокот на оваа недела.

Германскиот канцелар Фридрих Мерц, исто така, вчера предупреди дека европските сојузници ќе воведат „значително заострување на санкциите“ доколку Владимир Путин го отфрли примирјето, наведувајќи ги енергетските и финансиските пазари како клучни сектори. Францускиот министер за надворешни работи Жан-Ноел Баро во понеделникот изјави дека Европската комисија е задолжена да подготви предлози за нови санкции токму во тие области.

Американскиот претседател Доналд Трамп изјави дека ги остава отворени сите опции до последен момент кога станува збор за тоа дали ќе отпатува на евентуалната средба утре меѓу рускиот и украинскиот претседател Владимир Путин и Володимир Зеленски во Истанбул.

Трамп денеска, на маргините на своето патување во Заливот, рече дека Путин би сакал тој да биде таму и дека тоа е можно.

„Не знам дали ќе се појави“, рече американскиот претседател за Путин.

„Знам дека би сакал да бидам таму. И тоа е можност… Размислив за тоа. Сите сме резервирани, го разбирате тоа“.

Тој рече дека државниот секретар Марко Рубио дефинитивно ќе биде во Турција, а Белата куќа соопшти дека ќе му се придружат специјалните пратеници Стив Виткоф и Кит Келог.

Преговорите за можен крај на војната во Украина се закажани за утре во Турција. Но шпекулациите за тоа кој ќе седне на маса траат со денови. Кремљ се уште не објави кој ќе ја претставува Русија во Истанбул. Путин лично ја предложи средбата, но не кажа дали ќе присуствува на неа.

Портпаролот на Кремљ Дмитриј Песков претходно потврди дека руската делегација утре дефинитивно ќе престојува во Турција.

„Составот на делегацијата ќе го соопштиме кога ќе добиеме соодветни инструкции од претседателот. Досега немало такви инструкции“, рече Песков на прес-конференцијата.

Потпретседателот на руската Дума најави дека вечерва ќе биде соопштен составот на делегацијата на Москва за утрешните мировни преговори со Украина во Истанбул.

Зеленски, пак, рече дека сака да го види Путин во Турција, бидејќи тој е единствениот кој одлучува за војна и мир во Русија.

Бебе старо околу три месеци било пронајдено во црна кеса покрај контејнер околу 17 часот во Атина.

Се почнало кога мајка пријавила во полиција околу 15.00 часот. дека непознат маж и ја киднапирал ќерката во супермаркет во центарот на Атина. Според нејзините зборови, мажот пришол и рекол дека сака да купи нешто за детето, а потоа и го одзел бебето, пишува „Прототема“.

Полицијата почнала да трага по детето кое било пронајдено два часа подоцна. Девојчето било пронајдено во црна кеса до контејнер како плаче. Случајниот минувач кој го пронашол веднаш ги алармирал полицијата и брзата помош.

Бебето веднаш со возило на Брза помош било пренесено во болница каде и било прегледано. Според првичните информации нејзината здравствена состојба е стабилна.

Полицијата ги приведе на распит мајката и бабата на детето, додека се истражуваат сите аспекти на овој необичен случај. Се уште не се познати идентитетот и мотивите на лицето кое наводно го киднапирало детето, а надлежните не исклучуваат никаква можност.