Генералниот штрајк или „општа граѓанска непослушност“ на кој беа поканети граѓаните на Србија од студентите во блокадата, започнува денеска, објавуваат тамошните медиуми. „Ние не одиме на работа, не одиме на предавања, не ги извршуваме секојдневните обврски. Ја земаме слободата во свои раце. Вашето учество прави разлика“, напишаа студентите на Инстаграм во средата. Бројни компании, здруженија и политички партии најавија дека ја поддржуваат оваа акција, пренесува Н1 кој известува дека се приклучува кон генералниот штрајк и за тоа ќе известува само денеска.

Најавено е дека во 11:52 часот на повеќе локации во Србија ќе продолжи оддавањето пичит кон загинатите во несреќата на железничката станица во Нови Сад, по што ќе се одржи генерален штрајк.

Поради одлука на Управниот одбор на Адвокатската комора на Србија (АКС), адвокатите денеска ќе започнат тридневен прекин на работа, кој ќе трае до 26 јануари, поради прекршување на владеењето на правото и закана за автономијата и независноста на Адвокатската комора на Србија.

За време на прекинот на работата, адвокатите нема да влегуваат или престојуваат во просториите на судовите, обвинителствата, полицијата, органите на управата, јавните извршители и нотарите по ниту една професионална основа, се наведува во соопштението на АКС, според написите.

Демократската партија денеска соопшти дека го поддржува генералниот штрајк бидејќи овој метод на борба е „патоказ до правдата“.

Во соопштението на таа партија се наведува дека граѓаните имаат легитимно право да се побунат против лошата власт.

„Генералниот штрајк е начин да се спроведе овој бунт мирно. Никој што ја води оваа легитимна борба не може да сноси никакви последици за неа. Студентите ќе имаат предавања, вежби и испитни рокови кои ги пропуштиле поради мудрата и херојска борба што ја водат. Ниту еден родител, наставник или ученик кој учествува во блокадите не може да биде санкциониран на кој било начин поради борбата за нормална Србија“, додаваат од партијата.

Неколку послаби земјотреси, од кои најсилниот беше со јачина од 3,3 степени според Рихтеровата скала, во текот на ноќта и утрово го погодија подрачјето на јужна Грција, соопшти Европскиот медитерански сеизмолошки институт (EMSC).

Епицентарот на овој земјотрес, кој се случи утринава во 7 часот и 22 минути, се наоѓа на девет километри од Захар и 93 километри од Патра на длабочина од шест километри.

Засега нема извештаи за материјална штета или повредени.

Поради невремето „Еовин“, училиштата и универзитетите денеска се затворени во Ирска и Шкотска, а откажани се и голем број летови од аеродромите во Глазгов, Единбург и Даблин, како и поаѓањето на траектите во Ирското Море.

Аеродромот во Даблин објави дека авиокомпаниите откажале повеќе од 110 планирани полетувања и 110 пристигнувања за денеска, заклучно со 3:30 часот, објави „Скај њуз“.

„Во вториот дел од денот можни се натамошни откажувања и доцнења на летови“, се наведува во соопштението.

Аеродромите во Глазгов и Единбург соопштија дека десетици полетувања и пристигнувања биле откажани во текот на денот.

Powerful windy hit due to Storm Éowyn in Spanish Point of County Clare, Ireland 🇮🇪 (24.01.2025)#Storm #StormÉowyn #StormEowyn #weather pic.twitter.com/tXjjNHxF6y

— Kiran Joshi ( Follow Back 100%) Live #Ukraine (@Kiranjoshi900) January 24, 2025

Неколку железнички оператори издадоа предупредувања „не патувај“, при што Шкотска железница денеска ги прекина сите услуги низ Шкотска, велејќи дека „нема да биде безбедно да се оперираат патничките услуги поради прогнозираните временски услови“.

Предупредувањата за избегнување на патувања се однесуваат на патните рути низ северен Велс, Шкотска и северна Англија.

Во Ирска е забележана најсилната просечна брзина на ветерот досега, со речиси 135 километри на час, која е измерена во Мејс Хед во 4.00 часот утринава.

Со оглед на предупредувањата за потенцијалните опасности од невремето „Еовин“, денеска ќе бидат затворени сите училишта во Северна Ирска, како што најави вчера министерот за образование Пол Гиван, а своите продавници ги затворија и синџирите на супермаркети Лидл и Теско.

Затворени ќе бидат и судовите, каде што ќе се одвива деловното работење, како што е најавено, од далечина, како и здравствените установи, од каде е најавено дека сите термини треба да се сметаат за откажани, освен ако пациентите не се конкретно контактирани за да им се каже поинаку.

Ирските и британските метеоролошки агенции издадоа највисоко ниво на тревога за цела Ирска, Северна Ирска и делови од Шкотска и предупредија дека ветровите со јачина до 130 километри на час може да бидат опасни по живот.

Официјални лица рекоа дека тоа е првпат цела Ирска да биде ставена под црвен аларм по бурата „Офелија“ во 2017 година, во која загинаа три лица.