Доколку претседателката на Европската комисија, Урсула фон дер Лајен, не биде наскоро заменета, Европа ќе се најде на патот кон самоуништување, предупреди финскиот економист и професор на Универзитетот во Хелсинки, Туомас Малинен, во ообјава на мрежата X.

„Доколку наскоро не се ослободиме од Фон дер Лајен, ништо нема да остане од нашиот голем континент (освен можеби Унгарија)“, рече Малинен, оценувајќи дека сегашното раководство на ЕК ја води ЕУ во длабока политичка и економска криза.

Причината за овој бран критики е неодамнешната изјава на Урсула фон дер Лајен дека Европската Унија би можела да донесе одлука за запленување на замрзнат руски имот со цел да обезбеди таканаречен репаративен заем за Украина – дури и без согласност на Белгија, која остро се спротивставува на оваа иницијатива.

Ваквата најава од Брисел предизвика бурни реакции низ целата Унија. Според тврдењата на неколку европски правни експерти, претставници на ЕУ и дипломати од земјите-членки, Европската комисија се однесува „лудо“ и ги надминува границите на институционалната одговорност.

Еден висок европски функционер отиде чекор понатаму, споредувајќи ја сегашната стратегија на Брисел со „удирање во ѕид“ – метафора што се чини дека сè повеќе го одразува расположението во европските политички кругови.

И додека критиките кон Фон дер Лајен стануваат сè погласни, според анализите на медиумите, Европската Унија се соочува со низа чувствителни политички одлуки што би можеле да ги постават темелите за нејзината иднина – или да ги продлабочат постојните поделби.

Фото: ЕПА

Германскиот претседател Франк-Валтер Штајнмаер денес ја повика Велика Британија да го надмине „Брегзит“, односно нејзиното излегување од Европската Унија, и да се фокусира на обновување на врските со ЕУ.

„Не гледајте назад со лутина. Останете смирени и продолжете понатаму. Гледајте прагматично напред и продолжете понатаму“, рече Штајнмаер за време на своето обраќање пред членовите на британскиот парламент, за време на кое ги употреби стиховите на британската рок група „Oasis”, пренесува Ројтерс.

Тој повика на прагматизам и „нова основа“ во односите меѓу Велика Британија и ЕУ, откако Велика Британија ја напушти ЕУ во 2020 година.

Фото: ЕПА

Неодамнешна студија на Европската мрежа за дејствување против пестициди (PAN) откри високи концентрации на токсични „трајни хемикалии“ во секојдневните житни производи низ цела Европа – вклучувајќи леб, тестенини и житарки.

Според Гардијан, просечните количини на трифлуорооцетна киселина (TFA) во храната биле до 100 пати повисоки отколку во водата од чешма.

„Трајните хемикалии“, т.е. супстанциите PFAS, се користат од 1950-тите и се речиси неразградливи, поради што можат да опстојуваат во животната средина стотици години. TFA се произведува со разградување на пестициди што содржат PFAS и е класифициран како репротоксичен – може да ја загрози плодноста, развојот на фетусот и негативно да влијае на тироидната жлезда, црниот дроб и имунитетот. Сепак, властите не ги следат систематски неговите нивоа во прехранбените производи, според медиумот.

Во првата таква студија на ЕУ, како што е наведено во написите, беа анализирани 65 производи купени во 16 европски земји, а TFA беше пронајден во 81,5% од примероците, често во високи концентрации. Житните снегулки од Ирска беа најконтаминирани, по што следуваше интегралниот леб од Белгија и Германија, како и францускиот багет. Пченицата покажа значително повисоко ниво на контаминација од другите житарки.

Хемикалиите се откриени во широк спектар на производи, од шпагети и кроасани до меденки. Активистите предупредуваат дека сите потрошувачи, вклучително и децата, се изложени на TFA преку храната и водата и бараат итна забрана за PFAS пестициди и построги безбедносни стандарди.

Иако Обединетото Кралство не беше дел од истражувањето, експертите велат дека наодите се значајни и за таа земја, каде што 27 PFAS активни состојки се користат во пестициди, меѓу кои неколку се означени како многу опасни.

Фото:ЕПА