Свет
СЗО: Варијантите на коронавирусот добија нови имиња – алфа, бета, делта

СЗО одлучи варијантите на коронавирусот да ги именува со буквите од грчката азбука во обид да се поедностави изговорот и да се избегне стигматизација на земјите што го пријавуваат новиот вид.
Така, четири варијанти на коронавирусот, кои агенцијата на ООН ги смета за загрижувачки и кои во јавноста се познати како британски, јужноафрикански, бразилски и индиски, сега ги добија буквите алфа, бета, гама, делта според редоследот на откривање, пренесува „Ројтерс“.
Другите варијанти продолжуваат понатаму по азбучен ред.
СЗО ги откри новите имиња во понеделникот по критиките дека имињата како B.1.351, 501I.V2 и 20H / 501I.V2, биле премногу сложени.
Изборот на грчката азбука следеше по неколкумесечни размислувања во кои експертите разгледуваа други можности, како што се грчки богови и измислени псевдокласични имиња, според бактериологот Марк Пален, кој беше вклучен во разговорите.
Историски гледано, вирусите честопати биле поврзани со места за кои се претпоставува дека потекнувале, како што е еболата, именувана по истоимената река во Конго.
Но, тоа може да биде штетно за местата и честопати неточно, како што беше случај со таканаречената пандемија на „шпански грип“ од 1918 година, чие потекло е непознато, наведува агенцијата.
„Ниту една земја не смее да се стигматизира поради откривање и пријавување варијанти “, рече епидемиологот на СЗО, Марија ван Керхове.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Ердоган: Турција ги поздравува напорите на САД за мир во регионот

Турција ги поздравува напорите на Соединетите Американски Држави за постигнување мир во регионот, но Израел мора да ги запре нападите за овие напори да бидат успешни, изјави денес турскиот претседател Реџеп Таип Ердоган во телефонски разговор со американскиот претседател Доналд Трамп, соопшти неговиот кабинет.
Во соопштението се наведува дека Трамп и Ердоган разговарале за билатералните односи, за време на повикот што го побарала американската страна, и се додава дека турскиот претседател ја нагласил важноста од преземање чекори за зајакнување на соработката меѓу двете земји, особено во одбранбената индустрија, пренесува Ројтерс. Ердоган, исто така, рекол дека нивната средба во Белата куќа минатиот месец ги зајакнала врските меѓу двете земји.
Во соопштението се наведува дека за време на разговорот за ситуацијата во Газа, Ердоган му рекол на Трамп дека Турција работи напорно за постигнување регионален мир и дека ги поздравува иницијативите насочени кон таа цел.
„Ердоган нагласи дека Турција ги зголемила своите дипломатски контакти заради мирот, дека ќе продолжи да ја поддржува визијата за глобален мир и дека запирањето на нападите од страна на Израел е важно за успехот на иницијативите насочени кон постигнување мир во регионот“, се вели во соопштението.
Турција, која ги нарече нападите на Израел врз Газа геноцид и ги суспендираше сите трговски односи со Израел, изрази поддршка за најновиот план на Трамп за ставање крај на војната во Газа.
Фото: принтскрин
Свет
Путин: Доста се шегувавме за дроновите, ветувам, нема повторно да ги испраќаме во Данска

Во Сочи, рускиот претседател Владимир Путин коментираше за сомнителните дронови што летаа над воздушниот простор на НАТО.
Кога презентерот на форумот во Сочи го праша дали ги испратил дроновите во Данска, Путин одговори:
„Добро, повеќе нема да го правам тоа. Нема да испраќам дронови во Данска, ниту во Франција, ниту во Лисабон“, рече рускиот лидер.
Тој ја спореди паниката предизвикана од дроновите во Европа со НЛО и рече дека „тоа е апсурдно“.
„Знаете, мислам дека доста се шегувавме за дронови. Ветувам, нема повторно да ги испраќаме во Данска, не сакаме да го уништиме вашиот прекрасен пејзаж, или…“ рече Путин.
Тој тврди дека дроновите биле испратени од Французите за да го одвлечат вниманието на јавноста од домашните политички проблеми.
„А НАТО го користи ова за ширење паника и создавање тензии, што само го зголемува ризикот од конфликт“, заклучи Путин.
Фото: принтскрин
Свет
Меркел со критики: Макрон не беше најдобриот избор

Поранешната германска канцеларка Ангела Меркел изјави дека за време на одбележувањето на 35-годишнината од повторното обединување на Германија, требало да биде поканет „некој од Источна Европа“ наместо францускиот претседател Емануел Макрон.
Како што објавија западните медиуми, Меркел нагласи дека немала забелешки на говорот на сегашниот канцелар Фридрих Мерц и претседателката на Бундесратот Анке Релингер на церемонијата. Сепак, таа додаде дека би претпочитала некој поблизок до искуството од Источна Германија или Источна Европа да биде избран за говорник.
„Колку и да го почитувам претседателот Макрон, можеби некој од Источна Европа или Источна Германија можеше да биде избран за гостин-говорник“, рече поранешната канцеларка.
Според медиумите, зад ваквите зборови стои и политичка порака – бидејќи Меркел беше во Будимпешта неколку дена пред прославата, каде што се сретна со унгарскиот премиер Виктор Орбан. Токму тој се споменува како лицето на кое Меркел се осврнала кога зборувала за „некој од Источна Европа“.
Фото: принтскрин