Свет
СЗО предупреди на загрижувачки трендови во Појасот Газа

Појасот Газа се соочува од зголемен ризик од ширење на болести поради израелските воздушни бомбардирања, кои го нарушија здравствениот систем, пристапот до чиста вода и предизвикаа собирање луѓе во засолништата, предупреди Светската здравствена организација (СЗО).
„Бидејќи бројот на загинати и повредени во Газа продолжува да расте поради засилените непријателства, интензивното пренатрупување и нарушените здравствени, водоводни и санитарни системи претставуваат дополнителна опасност: брзо ширење на заразните болести“, соопшти СЗО.
„Веќе се појавуваат некои загрижувачки трендови“, се додава. Недостигот на гориво во густо населената енклава предизвика затворање на постројката за десалинизација зголемувајќи го ризикот од бактериски инфекции, како што е ширењето на дијарејата. СЗО соопшти дека од средината на октомври биле пријавени повеќе од 33.551 случаи на дијареја, од кои повеќето се деца на возраст под пет години.
Бројот на заразени деца значително се зголеми во споредба со просечните 2.000 случаи месечно во таа возрасна група во текот на 2021 и 2022 година. Недостигот на гориво исто така го наруши собирањето на цврстиот отпад создавајќи „средина погодна за брзо и широко распространето размножување на инсектите, глодачи што може да пренесат болести“, според СЗО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нов пресврт, царините на Трамп остануваат во сила

Царините што ги воведе администрацијата на Доналд Трамп, а кои претходно оваа недела беа укинати од Трговскиот суд на САД, привремено ќе бидат вратени додека трае жалбената постапка низ судскиот систем, одлучи Сојузниот жалбен суд.
Одлуката доаѓа откако панел од тројца сојузни судии заклучи дека Трамп ги надминал своите овластувања со воведувањето на глобалните царини, повикувајќи се на закон што овозможува итни мерки во надворешнотрговската политика.
На почетокот на годината Трамп воведе универзална царина од 10 отсто за речиси сите увозни производи. Најави уште повисоки стапки за земји како Мексико, Канада и Кина. Ги прошири таканаречените индустриски тарифи со дополнителни 25 отсто за челик, алуминиум и автомобили.
Трговскиот суд пресуди дека претседателот нема законско овластување да наметнува огромни тарифи врз основа на Законот за меѓународни економски овластувања за вонредни состојби (IEEPA). Пресудата не вклучува индустриски царини, кои почиваат на друга правна основа.
Белата куќа веднаш поднела жалба, а Апелациониот суд за Федералното подрачје одобри привремено задржување на пресудата:
„Барањето за привремено одлагање се уважува до степен до кој пресудите и трајните забрани на Стопанскиот суд се привремено прекинати до дополнително известување, додека овој суд го разгледува жалбениот предмет“, се вели во одлуката.
Тоа значи дека тарифите на Трамп остануваат во сила додека трае процесот на жалба.
Иако привременото враќање на тарифите е победа за Белата куќа, правната битка е далеку од завршена. Одлуката на судот за привремената суспензија не го прејудицира конечниот исход, но му дозволува на Трамп да задржи инструмент за трговски притисок додека трае правниот процес.
Питер Наваро, еден од најблиските економски советници на претседателот Доналд Трамп, ја коментираше оваа одлука набргу по нејзиното донесување и рече – „Трифната агенда на Трамп не успорува, без оглед на правните пречки“.
Говорејќи откако Апелациониот суд привремено ги врати тарифите претходно укинати од Трговскиот суд, Наваро рече дека Белата куќа е подготвена да оди пред Врховниот суд за да ја брани уставноста на своите трговски политики.
„Подготвени сме да одиме понатаму во ланецот“, рече Наваро, јасно укажувајќи дека Врховниот суд останува клучна фаза во одбраната на овластувањето на претседателот да наметнува тарифи.
Свет
Белата куќа му се заблагодари на Илон Маск за неговата работа

Беелата куќа му се заблагодари на Илон Маск за неговата услуга, откако милијардерот објави дека ја прекинува својата вклученост во администрацијата на претседателот Доналд Трамп, изјави портпаролката на претседателот.
„Му благодариме за неговата работа. Му благодариме што го основаше DOGE (кратенка од неговиот Оддел за владина ефикасност), а напорите за намалување на измамите и злоупотребата ќе продолжат“, им рече на новинарите портпаролката на Белата куќа, Керолин Левит.
Таа одби дополнително да коментира за заминувањето на милијардерот кој оваа недела првпат го критикуваше неговиот близок сојузник Трамп.
Маск вчера потврди дека ја завршува својата мисија за намалување на федералните трошоци.
„Како што завршува мојот мандат како специјален вработен во владата, би сакал да му се заблагодарам на претседателот Доналд Трамп што ми даде можност да ги намалам непотребните трошоци“, напиша претприемачот во средата на својата платформа за социјалните медиуми „Икс“.
„Мисијата Doge ќе стане уште посилна во иднина и ќе стане начин на живот во владата“, рече шефот на „Тесла, „Слејс Икс“ и „Икс“.
Членовите на администрацијата на Трамп ќе работат со персоналот на DOGE во различни федерални агенции за да ги унапредат постоечките напори, објави во четвртокот Белата куќа.
Министрите тесно соработуваа со Илон Маск и ќе продолжат да соработуваат со вработените во DOGE кои им се приклучија на сите овие агенции откако беа назначени од претседателот, изјави Левит за новинарите.
Свет
Белата куќа: Се надеваме на директни преговори меѓу Русија и Украина следната недела

Белта куќа изрази надеж дека Русија и Украина ќе се сретнат следната недела во Истанбул и ќе продолжат со директни преговори со цел да се постигне напредок кон завршување на војната, пренесува агенцијата „Анадолија“.
„Колку што јас разбирам, а на тоа и се надеваме, дека Русија и Украина ќе учествуваат во директни разговори и преговори следната недела во Истанбул. Веруваме дека тој состанок ќе се одржи, а тоа е состанок што претседателот го поддржа и силно го застапуваше за двете страни да се сретнат и директно да преговараат“, изјави портпаролката на Белата куќа, Каролин Левит.
Таа додаде дека американскиот претседател, Доналд Трамп, од почетокот на војната јасно ставил до знаење дека сака решение на преговарачка маса, а не на бојното поле: „Тоа им го кажа и на двајцата лидери, и јавно и приватно. Значи, се надеваме дека следната недела ќе направиме чекор напред.“
Левит додаде дека нема планови претседателот да испрати американски претставник на преговорите, но не ја исклучи таа можност.
Втората рунда директни преговори меѓу Русија и Украина е предложена за 2 јуни во Истанбул, откако двете страни се сретнаа на 16 мај. Тогаш, меѓу другото, се договорија за размена на заробеници и за подготовка на нацрт-документи за понатамошни мировни чекори.
Додека Русија најавува дека ќе го претстави нацрт-документот на преговорите, Украина бара да го добие однапред, пред самата средба.
Кремљ го оцени ставот на Украина како неконструктивен.