Свет
СЗО препорачува зголемување на цените на тутунот, на алкохолот и на засладените пијалаци за 50 отсто

Светската здравствена организација (СЗО) ги повикува земјите да ги зголемат даноците на засладените пијалоци, алкохолот и тутунот за 50 проценти во следните 10 години за да се справат со хроничните проблеми со јавното здравје.
Здравствената агенција на Обединетите нации соопшти дека овој потег ќе помогне во намалувањето на потрошувачката на овие производи, кои го зголемуваат ризикот од болести како што се дијабетес и некои видови на рак, и ќе соберат средства во време кога помошта за развој се намалува, а јавниот долг расте.
„Даноците за здравство се едни од најефикасните алатки што ги имаме“, рече Џереми Фарар, помошник генерален директор на СЗО за промоција на здравјето и превенција и контрола на болести. „Време е да се дејствува“, рече тој.
СЗО ја започна иницијативата „3 до 35“ на конференцијата на ОН за финансирање на развојот во Севиља.
Организацијата вели дека нејзината даночна иницијатива би можела да собере 1 билион долари до 2035 година, врз основа на податоците од здравствените даноци во земји како Колумбија и Јужна Африка. СЗО со децении ги поддржува даноците на тутун и зголемувањето на цените, а во последниве години повикува на даноци на алкохол и шеќерни пијалоци. Ова е прв пат да предложи целни зголемувања на цените за сите три производи.
Генералниот директор на СЗО, Тедрос Аданом Гебрејесус, на конференцијата изјави дека даноците би можеле да им помогнат на владите „да се прилагодат на новата реалност“ и да ги зајакнат своите здравствени системи со собраните пари. Многу земји со ниски и средни приходи се соочуваат со намалување на помошта од Соединетите Американски Држави, кои дури и не присуствуваат на конференцијата во Севиља. Соединетите Американски Држави се исто така во процес на повлекување од Светската здравствена организација.
Иницијативата, на пример, би значела дека владата во земја со среден приход би ги зголемила даноците на одреден производ, така што цената би се зголемила од денешните 4 на 10 долари до 2035 година, земајќи ја предвид инфлацијата, илустрираше економистот на СЗО, Гилермо Сандовал.
Речиси 140 земји веќе ги зголемија даноците на тутун, а со тоа и цените, за повеќе од 50% во просек помеѓу 2012 и 2022 година, додаде организацијата.
Сандовал рече дека СЗО, исто така, разгледува пошироки препораки за оданочување, вклучително и високо преработена храна, откако ќе ја финализира дефиницијата за таа храна во наредните месеци. Но, тој додаде дека очекуваат отпор од вклучените индустрии.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Кина го губи „Тик-ток“ во САД, „Бајт денс“ останува со мал удел

Американскиот претседател Доналд Трамп потпиша уредба со која се потврдува договорот за одвојување на „Тик-ток“ од кинеската компанија „Бајт денс“ и пренос на мнозинскиот удел во рацете на американски инвеститори.
Според планот, конзорциум предводен од софтверскиот гигант „Оракл“ ќе управува со американските операции на „Тик-ток“, ќе ги чува податоците во домашни сервери и ќе добие лиценца за алгоритмот што препорачува содржини. Очекувањата се американските инвеститори да држат околу 80 отсто од уделите, додека „Бајт денс“ ќе остане со минорен дел.
„Тик-ток“ во САД има околу 180 милиони корисници, а со овој договор платформата ќе продолжи да биде достапна под американска контрола и построг надзор. Од администрацијата на Трамп велат дека целта е заштита на националната безбедност и податоците на корисниците.
Свет
Трамп: Нема да дозволам Израел да го анектира Западниот Брег

Американскиот претседател Доналд Трамп изјави дека нема да дозволи Израел да го анектира Западен Брег, одбивајќи ги барањата на дел од крајно десните израелски политичари за проширување на израелскиот суверенитет врз оваа територија.
„Не, нема да дозволам. Тоа нема да се случи. Доста е, време е ова да запре“, рече Трамп во Белата куќа, објаснувајќи дека темата ја покренал по телефонскиот разговор со премиерот Бенјамин Нетанјаху за состојбата во Појасот Газа.
Притисокот за анексија доаѓа од дел од десното крило на коалицијата на Нетанјаху, кое бара формално воведување на израелскиот суверенитет врз Западен Брег. Овие барања предизвикуваат силна загриженост кај арапските лидери, од кои дел се сретнаа со Трамп на маргините на Генералното собрание на Обединетите нации во Њујорк.
Западен Брег е освоен од Израел во војната во 1967 година. Палестинците со децении го бараат како дел од својата идна држава, заедно со Источен Ерусалим и Појасот Газа. На оваа територија денес живеат околу 2,7 милиони Палестинци и околу 700.000 израелски доселеници. Повеќето земји во светот не ги признаваат израелските населби таму и ги сметаат за нелегални според меѓународното право.
Изјавата на Трамп доаѓа во чувствителен момент на засилени судири во Газа и зголемен дипломатски притисок за изнаоѓање долгорочно решение за израелско-палестинскиот конфликт.
Свет
Трамп најави нови царини на лекови, камиони и мебел

Американскиот претседател Доналд Трамп објави дека од 1 октомври ќе стапат на сила нови царини: 100 отсто на увоз на брендирани лекови, 25 на тешки камиони, 50 на кујнски ормари и 30 проценти на тапациран мебел.
Трамп изјави дека целта е заштита на домашното производство и националната безбедност, додека Американската стопанска комора и повеќе сојузници предупредија дека мерките ќе ги погодат блиските трговски партнери и голем дел од индустријата.