Свет
Советниците на Трамп сметаат дека во САД од вирусот ќе умрат меѓу 100.000 и 240.000 луѓе

Американскиот претседател, Доналд Трамп, изрази надеж дека Соединетите Држави наскоро ќе забележат попуштање на кризата со коронавирусот во некои жаришта, но неговиот тим на здравствени експерти не е оптимистичен.
Најпогодената држава Њујорк вчера соопшти дека за првпат во една недела починале малку помалку луѓе отколку претходниот ден. Но, бројката е сè уште голема, со речиси 600 нови смртни случаи и над 7.300 нови инфекции.
„Можеби тоа е добар знак“, рече Трамп пред новинарите во Белата куќа.
Трамп ги смета овие бројки за индикација дека Американците почнуваат да ја гледаат светлината на крајот од тунелот.
Ентони Фаучи, експерт во тимот кој Трамп го состави за борба против коронавирусот, вели дека ќе бидат потребни неколку недели во кои луѓето ќе ги почитуваат одредбите за социјално дистанцирање и мерките за домашен престој за да се забави ширењето на вирусот.
Тој не се спротивстави директно на претседателот, кој често се критикува дека зазема попозитивен став отколку што е оправдано.
„Она што го слушате за потенцијално светло на крајот на тунелот не го порекнува фактот дека може да биде многу лошо утре и во следните денови“, рече Фаучи.
Здравствените експерти на Белата куќа проценуваат дека меѓу 100.000 и 240.000 Американци ќе умрат, дури и ако мерките доследно се спроведат.
Вчера гувернерот на Њујорк, Ендрју Куомо, изјави дека бројот на хоспитализации е за половина помал од претходните 24 часа, но предупреди дека сè уште не е познато дали кризата го достигнала својот врв во оваа сојузна држава, со 4.159 мртви и повеќе од 122.000 инфицирани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Стармер му честиташе на новиот канадски премиер за неговата победа: „Ние сме најблиските сојузници“

Британскиот премиер Кир Стармер му честиташе денес на канадскиот премиер Марк Карни за неговата изборна победа и рече дека сака да ги продлабочи односите на Велика Британија со Канада.
Либералната партија на канадскиот премиер Марк Карни, поранешен гувернер на Банката на Англија и Банката на Канада, победи на изборите во понеделникот додека трае бранот отпор кон економскиот притисок и заканите на американскиот претседател Доналд Трамп за анексија на Канада.
Британскиот премиер рече дека личните врски на Карни со Обединетото Кралство ќе помогнат во зајакнувањето на врските меѓу двете земји како „најблиски сојузници“.
Карни веројатно нема да има доволно места за мнозинска влада, но изборниот резултат е сепак извонредно достигнување за неговите либерали.
На почетокот на годината, конзервативците водеа во анкетите на јавното мислење за повеќе од 20 процентни поени, но оставката на либералниот премиер Џастин Трудо и желбата на Трамп да ја анектира Канада резултираа со драматичен пресврт.
Канада ќе биде домаќин на самитот на Г7 во јуни, на кој ќе присуствува и Трамп.
Стармер рече дека го поздравува „лидерството“ на Карни во меѓународните прашања. „Знам дека ќе продолжиме тесно да соработуваме во областите на одбраната, безбедноста, трговијата и инвестициите уште на самитот на лидерите на Г7“, рече тој.
Свет
Кинески астронаути заглавени во вселената, враќањето одложено

Враќањето на тројца кинески астронаути на Земјата беше одложено поради неповолните временски услови, објави денеска АП.
Астронаутите Каи Суже, Сонг Лингдонг и Ванг Хаозе, кои денеска требаше да слетаат во Донгфенг, северна Монголија, по поминати шест месеци во вселената, ќе мора да почекаат уште малку поради лошите временски услови.
Според официјалните информации на кинеската агенција „Ксинхуа“, одлуката за одложување е донесена со цел „да се гарантираат здравјето и безбедноста на астронаутите“.
Тројцата астронаути беа лансирани во вселената во октомври минатата година, а неодамна пристигна нов екипаж, кој ќе ги замени во кинеската вселенска станица „Кијангонг“. За време на нивниот престој на вселенската станица, астронаутите спроведоа експерименти на станицата.
Двајцата астронаути, Каи и Сонг, ја изведоа најдолгата вселенска прошетка во светот, која траеше девет часа, објави Кинеската вселенска агенција. Кина ја изгради својата вселенска станица откога беше исклучена од Меѓународната вселенска станица поради загриженоста на САД за контролата на кинеската вселенска програма.
Кина планира да испрати човек на Месечината до 2030 година.
Минатата година двајца американски астронаути беа блокирани во вселената девет месеци кога пробниот лет во капсула „Боинг“ наиде на проблеми и НАСА одлучи дека враќањето на астронаутите во истиот модул би било премногу ризично.
Регион
Не успеа ниту новиот обид за избор на претседател на косовското собрание

Собранието на Косово и енеска не го избра Аљбуљен Хаџиу за претседател на собранието.
При гласањето Хаџиу доби поддршка од 54 пратеници, 44 беа против, а три лица беа воздржани.
За него гласаа пратениците на Самоопределување, како и пратениците на малцинските заедници, освен Адем Хоџа, кој гласаше против.
На седницата не учествуваше пратеничката Дуда Баље, која досега гласаше против.
Против гласаа членовите на Демократската партија на Косово, Демократскиот сојуз на Косово и Алијансата за иднината на Косово.
Претставниците на досегашната опозиција, по седницата, изјавија дека сè ова личи на театар и ја обвинија победничката партија дека намерно го спречува конституирањето на парламентот бидејќи нема гласови за формирање на новата влада на Косово.
Од друга страна, Самоопределување ги обвини пратениците на поранешната опозициска партија дека го блокираат нивниот предлог.
Продолжението на конститутивната седница на косовскиот парламент е закажано за 1 мај.