Свет
Спакувал бомба во подарок, па им ја испратил на младенците: осуден порнешниот директор кој со злосторството го шокираше светот
Поранешен директор на колеџ во источната индиска држава Одиша е осуден на доживотен затвор за убиство на младоженец, кому му испратил бомба во куќата, завиткана како свадбен подарок. Во нападот загинала и роднина на младоженецот.
Судот го прогласи 56-годишниот Пунџилал Мехер за виновен за убиство, обид за убиство и употреба на експлозив во она што во Индија стана познато како „бомба за свадба“ и ја шокираше земјата.
Бомбата, која била завиткана како свадбен подарок, била испратена во домот на Соумја Секар Саху, 26-годишен програмер, само неколку дена по неговата венчавка.
Кога тој и неговата избраничка го отвориле пакетот, „подарокот“ експлодирал. Саху и неговата прабаба останале мртви на лице место, додека сопругата на Саху Рема се здобила со тешки повреди.
Иако судот го прифати тврдењето на обвинителството дека се работи за грозоморно злосторство, одби да го класифицира како еден од најсуровите случаи што заслужуваат смртна казна.
Експлозијата се случи во февруари 2018 година во Патнагарх, мирно место во областа Болангир, во индиската држава Одиша.
Жртвите биле во брак само пет дена и подготвувале ручек кога пакетот пристигнал на нивната адреса.
Кога Саху ја повлекол украсната лента на пакетот за да ја отвори, следела силна експлозија која ја уништила кујната, при што загинал тој и неговата 85-годишна прабаба Џемамани Саху. Рема, тогаш 22-годишна, преживеала со тешки изгореници, дупнати тапанчиња и тешка траума.
По долга истрага, полицијата го уапсила Пунџилал Мехер, тогаш 49-годишен учител и поранешен директор на локалниот колеџ каде работела мајката на Саху.
Инспекторите тогаш рекоа дека Мехер имал лутина поради професионалното ривалство и внимателно го планирал нападот. Тој користел лажно име и адреса за да ја испрати бомбата од Рајпур, преку курирска служба која немала видео надзор или скенирање на пратките.
Бомбата поминала повеќе од 650 километри со автобус, минувајќи низ рацете на многу луѓе пред да биде испорачана. Истражителите рекоа дека уредот бил дизајниран да експлодира кога ќе се отвори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Облакодерот во Загреб гори со часови, паѓаат делови од фасадата: штетата е тотална
Облакодерот на Славонска авенија во Загреб, во кој вчера избувна пожар малку пред полноќ, утрово сè уште гори, делови од фасадата паѓаат, а загрепските пожарникари цела ноќ се борат со пожарот. Се проценува дека ќе биде потребен цел ден за да се изгасне.
93 пожарникари со 30 возила го гаснат пожарот
„Штетата е голема. Иако поголемиот дел од зградата беше напуштен, собите внатре се полни со опрема и документи. Пријавата ја добивме околу 23 часот. Интересно е што имаше само една пријава од граѓанин. Нормално, секогаш добиваме многу пријави за големи пожари.
Штом видовме отворен пламен, веднаш побаравме дополнителна интервенција. Опасно е бидејќи, кога екипите почнаа да се качуваат и да го гаснат пожарот, видовме дека пожарот почнал да се појавува на долните катови, дури и на приземјето, што значи дека се ширел низ вентилацијата“, рече Синиша Џембрих, командант на Јавната противпожарна служба на Град Загреб.
„Сите пожарникари на Град Загреб беа на овој пожар. Се претпоставува дека ќе го ставиме пожарот под контрола во текот на денот. Но, ќе биде потребно време“, додаде тој.
фото: принтскрин
Европа
(Видео) Нападнати термоелектраните во Донецк: бројни населби без струја
Денис Пушилин, прорускиот лидер на регионот Донецк, објави на апликацијата Телеграм дека украинските сили оштетиле две тамошни електрани во ноќен напад, оставајќи многу населби без електрична енергија.
Нападите ги исклучија електраните Зуивска и Старобешево, а тимови за итни случаи беа распоредени за да ја санираат штетата.
Само еден ден претходно, Пушилин рече дека украинските напади со беспилотни летала врз енергетската инфраструктура на регионот оставиле околу 500.000 луѓе без електрична енергија.
Украинската страна не го потврди нападот. Во последните недели, Киев изврши неколку напади со беспилотни летала со долг дострел врз енергетската инфраструктура во делови од Донецк контролирани од Русија, со цел да се поткопа способноста на Русија да ја продолжи војната.
фото: принтскрин
Регион
Градоначалникот на Загреб: Штетата е тотална, пожарот постојано се разгорува
Малку пред полноќ, во облакодерот Вјесник на Славонска авенија во Загреб избувна пожар, а како што се ширеше вертикално, зафати неколку ката и покривот, поради што голем број пожарникари и опрема беа вклучени во неговото гаснење.
Сцените се ужасни, а градоначалникот на Загреб, Томислав Томашевиќ, исто така, дојде кај зградата утрово.
„Постојано се разгорува на различни катови. Се гаси одвнатре и однадвор. Причината е непозната, постојат некои сомневања, но истрагата на лице место ќе го утврди тоа. За жал, штетата е целосна. Мнозински сопственик на зградата е државата, градежните инженери ќе треба да видат дали објектот е за рушење или ќе се обнови“, рече Томашевиќ.
Засега нема опасност од уривање, додаде тој. „Најважно е што нема жртви и безбедноста на пожарникарите е најважна“, додаде тој.
фото: принтскрин

