Свет
Според новиот закон, Казахстан би можел хируршки да кастрира педофили: „Тие не се луѓе“

Според новиот нацрт-закон, Казахстан би можел хируршки да ги кастрира најлошите сексуални престапници и педофили, пишува „Дејли Мејл“.
Ова се случува по жалбите на пратениците дека системот за хемиска кастрација, еден од најстрогите во светот, не ги одвраќа сексуалните престапници над деца.
Елнур Бејсенбаев, пратеник и генерален секретар на владејачката партија Аманат, рече дека владата досега им угодувала на педофилите затоа што не инсистирала на „хируршка кастрација“. „За жал, сексуалните злосторства врз децата се случуваат сè почесто“, рече тој, сугерирајќи дека хемиската кастрација, која го намалува машкото либидо со инјектирање антиандрогени лекови, не е ефикасна.
„Со ослободувањето на силувачот му дозволуваме да го повтори делото. Не предлагаме ова да се применува за сите педофили, но би сакале да им дадеме на судовите можност за хируршка кастрација“, рече тој.
„Ако нападот на педофилот е особено суров, верувам дека мора да се примени хируршка кастрација“, додаде тој.
Бројни случаи на педофилија го потресоа казахстанското општество, а последен беше случајот со петгодишното девојче кое 48-годишен маж го намами нудејќи ѝ сладолед. Потоа ја силувал и ја убил, а подоцна бил осуден на затвор и хемиска кастрација.
„Неодамна, околу 430 вакви злосторства се извршени врз нашите деца. Нашата влада ја покажува својата недоследност со тоа што не одобрува хируршка кастрација, како да ги кршиме правата на педофилите, бидејќи педофилите се луѓе“, рече тој.
„Верувам дека тие не се луѓе“, заклучи Бејзенбаев.
За законот допрва ќе се разговара, има загриженост за кршење на човековите права, но се верува дека барем делови од овој закон ќе се имплементираат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп го нападна Зеленски за минералите: Доцнат три недели

Доналд Трамп изјави дека работата на мировниот договор меѓу Русија и Украина „тече непречено“.
Во објава на неговата платформа „Truth Social“, актуелниот американски претседател исто така рече дека Украина сè уште не потпишала договор за ретки земјини минерали со САД и изрази надеж дека тоа ќе го стори веднаш.
„Украина, предводена од Володимир Зеленски, сè уште не ги потпишала конечните документи за многу важен договор за ретки минерали со САД“, напиша Трамп.
„Доцнат најмалку три недели. Се надевам дека договорот ќе биде потпишан СЕГА.“ Тој додаде: „Работата на сеопфатен мировен договор меѓу Русија и Украина напредува непречено. УСПЕХОТ се чини дека е на повидок.“
Изјавите на Трамп доаѓаат откако неговиот претставник Стив Виткоф се сретна со рускиот претседател Владимир Путин во Москва, а Кремљ по состанокот соопшти дека Русија и САД се „поблиску“ до договор за „голем број меѓународни прашања“. Од друга страна, од Украина доаѓаат гласини дека Киев би бил подготвен привремено да отстапи територија на Русија, иако претседателот Зеленски рече дека „нема дискусија“ за Крим или кој било дел од Украина.
Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.