Неколку западни земји и Европската унија го осудија зајакнувањето на воената соработка меѓу Русија и Северна Кореја.

Заедничката изјава беше потпишана од министерствата за надворешни работи на Австралија, Канада, Италија, Франција, Јужна Кореја, Јапонија, Нов Зеланд, Обединетото Кралство, САД и Европската унија.

„Директната поддршка на Северна Кореја за руската агресивна војна против Украина означува опасна ескалација на конфликтот, со сериозни последици за европската и индо-пацифичката безбедност“, се вели во соопштението.

Владите на овие земји, исто така, изразија загриженост за економската поддршка што Москва му ја дава на Пјонгјанг, бидејќи ја влошува ситуацијата на Корејскиот полуостров.

„Длабоко сме загрижени за каква било политичка, воена или економска поддршка што Русија може да ја дава на незаконските програми за оружје на Северна Кореја, вклучително и оружје за масовно уништување и нивните средства за испорака, што би ја влошило и онака напнатата ситуација на Корејскиот Полуостров“, се додава во изјавата.

Западните земји ги повикаа Русија и Северна Кореја да ги повлечат своите трупи од Украина.

Четири лица загинаа, а петмина се ранети во пукањето што се случи во христијанското училиште Абндант Лајф во Медисон, главниот град на американската сојузна држава Висконсин.

Меѓу ранетите има и деца. Повредените лица се пренесени во локалните болници, изјави за Си-Ен-Ен началникот на полицијата во Медисон, Шон Барнс.

Полицијата потврди дека е убиен и напаѓачот кој е малолетник, а полицајците повикани на местото на нападот го пронашле неговото тело во училишната зграда.

„Полицајците пронајдоа малолетник во зградата за кој веруваат дека е одговорен за овој напад“, изјави началникот на полицијата во Медисон, Шон Барнс.

Христијанското училиште го посетуваат приближно 390 ученици. Училиштето има кампус од 28 хектари, а на неговата веб-страница се наведува дека има помали класови и го посетуваат ученици од околу 200 семејства во областа Дејн.

Училиштето планираше да затвори за божиќните празници по оваа недела.

Новоизбраниот американски претседател Доналд Трамп изјави дека се обидува да ги ослободи заложниците од Газа.

„Светлината свети на светот. Се обидуваме многу силно да помогнеме во враќањето на заложниците“, рече Трамп на прес-конференција, пренесоа израелските медиуми.

„Ако заложниците не се вратат дома до 20 јануари, денот на инаугурацијата, целиот пекол ќе се ослободи“, додаде Трамп, повторувајќи го предупредувањето од почетокот на овој месец за тоа што ќе се случи ако заложниците не бидат ослободени пред тој да се врати во Белата куќа.

Трамп потврди дека разговарал на телефон во текот на викендот со израелскиот премиер Бенјамин Нетанјаху и дека тоа бил добар разговор.

Израелскиот министер за одбрана Израел Кац, наводно, утринава им рекол на членовите на израелскиот парламент дека Израел е поблиску од кога било до договор за ослободување на заложниците во Газа.

Кац, сепак, посочи дека договорот нема да вклучува неодреден прекин на непријателствата, барање на палестинскиот Хамас, на што се противат многумина во владејачката екстремно десничарска коалиција на премиерот Нетанјаху.

Кац рече дека постои флексибилност од другата страна која разбира дека Израел нема да ја заврши војната.

Израелските медиуми ја пренесоа и изјавата на неименуван лидер на Хамас, цитиран од саудискиот информативен сајт Asharq News, дека на дофат е прекин на огнот и договор за ослободување на заложниците.

„Поблиску сме од кога било до постигнување прекин на огнот и размена на заробеници, доколку Нетанјаху не го попречи договорот“, рече тој, додавајќи дека Хамас бара постепен крај на војната и постепено повлекување на израелските сили во договорениот рок и гаранции од меѓународни посредници.