Свет
Столтенберг: НАТО не планира да испрати борбени трупи во Украина

Генералниот секретар на НАТО, Јенс Столтенберг, изјави дека воената алијанса не планира да испрати борбени трупи во Украина.
Столтенберг за АП рече дека земјите членки на НАТО ѝ даваат невидена поддршка на Украина.
„Тоа го правиме од 2014 година. Сепак, нема планови за распоредување борбени трупи на НАТО во Украина“, изјави Столтенберг.
Отфрлајќи ја можноста за воена акција на НАТО, Столтенберг повтори дека рускиот напад врз Украина сериозно го крши меѓународното право и дека врз основа на тоа украинската страна има право на самоодбрана. НАТО има право да ја поддржи Украина да се брани од руската агресија, рече тој.
Пред посетата на Париз во понеделникот, каде што највисоките функционери од повеќе од 20 земји ќе разговараат за опциите за зголемување на помошта за Украина, словачкиот премиер Роберт Фицо рече дека некои земји размислуваат дали да склучат билатерални договори за испраќање војници во Украина за да му помогнат на Киев да се брани од руската инвазија.
Фицо истакна дека неговата влада не планира да предложи испраќање словачки трупи во Украина, но не даде детали за тоа кои земји би можеле да размислуваат за такви аранжмани или што би направиле тие војници во Украина.
Шведскиот премиер Улф Кристерсон изјави дека нема да испрати војници во Украина додавајќи дека тоа во моментот не е релевантно прашање за НАТО.
„Сега сме преокупирани со испраќање напредни материјали од Шведска во Украина на многу начини, како што тоа го прават многу други земји“, изјави тој за шведските медиуми.
Како што рече, „нема такви барања од Украина“.
Коментарите на Кристерсон дојдоа еден ден откако унгарскиот парламент го одобри членството на Шведска во НАТО, речиси две години по потпишувањето на историски неутралната земја.
Чешкиот премиер Петр Фијала и полскиот премиер Доналд Туск изјавија дека нивните земји не размислуваат да испратат војници ниту во Украина.
Говорејќи на состанокот на 20 претежно европски лидери во Париз во понеделникот, Макрон рече дека во моментот нема консензус за формално испраќање војници, но рече дека оваа опција не треба да се исклучи.
„Ништо не треба да се исклучи. Ќе направиме сè што ни треба Русија да не победи“, рече Макрон.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп го нападна Зеленски за минералите: Доцнат три недели

Доналд Трамп изјави дека работата на мировниот договор меѓу Русија и Украина „тече непречено“.
Во објава на неговата платформа „Truth Social“, актуелниот американски претседател исто така рече дека Украина сè уште не потпишала договор за ретки земјини минерали со САД и изрази надеж дека тоа ќе го стори веднаш.
„Украина, предводена од Володимир Зеленски, сè уште не ги потпишала конечните документи за многу важен договор за ретки минерали со САД“, напиша Трамп.
„Доцнат најмалку три недели. Се надевам дека договорот ќе биде потпишан СЕГА.“ Тој додаде: „Работата на сеопфатен мировен договор меѓу Русија и Украина напредува непречено. УСПЕХОТ се чини дека е на повидок.“
Изјавите на Трамп доаѓаат откако неговиот претставник Стив Виткоф се сретна со рускиот претседател Владимир Путин во Москва, а Кремљ по состанокот соопшти дека Русија и САД се „поблиску“ до договор за „голем број меѓународни прашања“. Од друга страна, од Украина доаѓаат гласини дека Киев би бил подготвен привремено да отстапи територија на Русија, иако претседателот Зеленски рече дека „нема дискусија“ за Крим или кој било дел од Украина.
Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.