Свет
Такер Карлсон ја напушти Москва со лет преку Белград – американскиот новинар фотографиран по интервјуто со Путин

Американскиот новинар Такер Карлсон, кој направи интервју со рускиот претседател Владимир Путин во Москва, утрово ја напушти Русија од аеродромот Шереметјево, со авион на линијата Москва-Белград, пренесува РИА Новости.
На социјалните мрежи се појави фотографија од Карлсон во авионот, наведува руската агенција.
Tucker Carlson left Moscow to Belgrad, Serbia pic.twitter.com/yAywrFqtaV
— Russian Market (@runews) February 8, 2024
Портпаролот на Кремљ, Дмитриј Песков, претходно потврди дека Карлсон се сретнал и разговарал со рускиот претседател Владимир Путин.
Се очекува интервјуто да се појави на страницата на Карлсон на Твитер и неговата веб-страница некаде помеѓу четврток и петок.
„Карлсон има став кој се разликува од другите, тој во никој случај не е проруски, не е проукраински, туку напротив проамерикански. Но, во најмала рака, значително се разликува од ставот на традиционалните англосаксонски медиуми“, рече Песков за тоа зошто Путин му дал интервју на овој новинар.
Такер Карлсон претходно потврди дека дошол во Москва на планирано интервју со рускиот претседател, иако веќе неколку дена е во Русија.
„Тука сум (во Москва) на интервју со рускиот претседател Владимир Путин. Ние го правиме тоа затоа што тоа е наша работа. Ние се занимаваме со новинарство. Наша должност е да ги информираме луѓето“, рече Карлсон во видеото објавено на социјалната мрежа „Икс“.
Тој додаде дека војната во Украина е човечка катастрофа во која загина цела генерација Украинци и дека повеќето Американци не се доволно информирани за тој конфликт.
Според Карлсон, Вашингтон двапати се обидел да го саботира интервјуто, што прес секретарот на Белата куќа Карин Жан-Пјер го негираше.
Во исто време, новинарот објасни дека сопственикот на социјалната мрежа „Икс“, Илон Маск, ветил дека нема да го блокира разговорот со Путин кога ќе биде објавен на таа платформа, пренесува „РИА Новости“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Еден загина откако се урнаа два воздушни балони над долината Ихлара, дел од познатата туристичка област Кападокија

Два воздушни балони се урнаа во централна Турција, при што загина најмалку едно лице, а 19 се повредени, јави турската државна телевизија ТРТ.
Загинатиот бил еден од лицата што управувале со балоните.
Несреќата се случила при лет над долината Ихлара, дел од познатата туристичка област Кападокија, која е позната по балонските летови и живописниот пејзаж.
Свет
Израел испрати предупредување за евакуација

Израел започна нови напади насочени кон нуклеарната програма на Иран, а Иран возврати со ракетни напади во кои загинаа најмалку осум лица во Израел, третиот ден од невидена воена ескалација меѓу двете непријателски земји.
Иранскиот министер за надворешни работи се обрати до јавноста. Абас Арагчи рече дека одговорот на Иран на израелските напади бил чин на самоодбрана.
Тој додаде дека израелските напади, кои беа извршени први, не би биле можни без одобрение од САД. Вашингтон, рече тој, треба да ги осуди израелските напади врз нуклеарните постројки на Иран, додавајќи дека разговорите со САД можеле да доведат до договор.
Но, Израел, тврди тој, сакал да ги саботира тие преговори, кои САД ги сметале за клучни за ограничување на нуклеарната програма на Иран. Тој, исто така, изјави дека Иран не сака да ја прошири војната, освен ако не е принуден да го стори тоа.
Портпаролот на израелската војска издаде предупредување за евакуација до сите ирански граѓани во близина на воени објекти. Авичај Адрае објави „итно предупредување до сите ирански граѓани“ на социјалните мрежи.
„Сите лица што моментално или наскоро ќе се наоѓаат во или околу објектите за производство на воено оружје и сродните институции мора веднаш да ги напуштат тие области и да не се враќаат додека не се издаде понатамошно известување“, напиша тој.
Свет
Трамп: Секоја друга земја ги слави своите победи, време е и САД да почне да го прави тоа

Американскиот претседател Доналд Трамп, во говор за време на воената парада во Вашингтон по повод 250-годишнината од основањето на американската војска, ја одбрани својата одлука за организирање на настанот, истакнувајќи дека парадата е прослава на војската, и покрај критиките дека станува збор за личен спектакл поврзан со неговиот 79-ти роденден.
– Секоја друга земја ги слави своите победи. Време е и САД да почне да го прави тоа, рече Трамп.
Тој ја опиша американската војска како „најстариот огранок на најголемата борбена сила што човештвото некогаш ја познавало“ и испрати предупредување до глобалните противници: „Американските непријатели постојано учат – ако го загрозите американскиот народ, нашите војници доаѓаат по вас. Вашиот пораз ќе биде сигурен. Вашиот крај конечен. Вашиот пад целосен и потполн“.
Нашите војници никогаш не отстапуваат, никогаш не се предаваат и никогаш не попуштаат. Тие се борат, борат, борат – и победуваат, победуваат, победуваат, додаде американскиот претседател.
Тој изрази благодарност до припадниците на вооружените сили и ветераните. – Благодарение на нивната извонредна служба и посветеност, 250 години – Америка стои исправено, Америка стои гордо и Америка стои слободно, истакна Трамп.
Парадата, во која учествуваа над 6.000 војници, 150 воени возила и 50 авиони, вклучуваше воздушен спектакл, коњичка единица и завршен падобрански скок со американското знаме пред Трамп.