Свет
Тајно снимен разговор меѓу папата Франциско и кардинал, објавен транскрипт

Папата Франциско бил тајно снимен за време на телефонски разговор со кардинал, пренесува Си-ен-ен. Судот во Ватикан преслуша аудиоснимка меѓу папата Франциско и кардиналот Анџело Бечиу, обвинет во судскиот процес во кој кардиналот бара од папата да потврди дека одобрил плаќања за помош за ослободување на киднапираната калуѓерка во Африка.
На новинарите не им беше дозволено да ја слушаат снимката, но транскриптот на италијанската финансиска полиција потоа беше објавен од италијанската новинска агенција „Аднкронос“. Тројцата бранители на судењето исто така подоцна им ја потврдија содржината на разговорот на присутните новинари од Ватикан.
Снимката е направена од трето лице, кое било во собата со кардиналот Бечиу за време на телефонскиот разговор што се случил на 24 јули 2021 година. Повикот се случил три дена пред почетокот на судењето во Ватикан, во кое Бечиу беше обвинет за проневера и злоупотреба на службената положба, а само 10 дена откако Франциско бил отпуштен од болница поради операција на дебелото црево.
За време на повикот, Бечиу бара од папата да потврди дека одобрил плаќања од кардиналот на советничката за безбедност, Сесилија Мароња, која исто така е обвинета за проневера, во замена да ѝ плати на британската компанија „Инкерман груп“ за да обезбеди ослободување на киднапираната калуѓерка од исламските милитанти во Мали во 2017 година, се наведува во транскриптот.
Според транскриптот, папата Франциско за време на повикот рекол дека има нејасно сеќавање и побарал од Бечиу да го запише она што би сакал да го види потврдено. Исплатените суми, според кардиналот Бечиу, кој тогаш бил број два во Државниот секретаријат на Ватикан, биле 350.000 евра на британска компанија и 500.000 евра откуп за калуѓерката.
Кардиналот Бечиу, кој беше отпуштен од папата во 2020 година и му беа одземени повеќето кардинални права, секогаш тврдеше дека сите финансиски трансакции што ги презема биле целосно одобрени од неговите претпоставени, вклучувајќи го и папата Франциско. Бечиу и Мароња се изјаснија дека не се виновни за ниту едно од обвиненијата на судењето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.